EZEKIYEL 18 - Boy Lonana

Lona kaɓakŋa kay gegelay ni u dlara nam laɗta

¹ Boy Yawena mbay egen dan ana,

² «Vun ŋgolna di hu mbassa vi suu Israelna ana, Somira muɗ gugutlu ma bay nera, sii gorra halaŋ dlay ki may.

³ An suu u iiri manda di ni Bu Suuna, Yawe, ana, Agi ka a di vun ŋgol namma duk suu Israelna oloɗi.

⁴ Gola iirira halaŋŋi manda, iirira vi buna u iirira vi goona halaŋŋi manu. Sa may ma li dla corana ni ma hin miɗ kina.

⁵ «Sa ma ɗegeena nam mba li ni dlara ɗegeera may.

⁶ Nam ka tuɗ ti kolo kay ɦiniraɗi. Nam ka gol irim u fuli suu vi suu Israelnaɗi lay. Nam ka taɓ u caŋ ndarammaɗi lay, ka tin tam eg cara hu li ma ndaɗ ki njenjenaɗi lay.

⁷ Nam ka li mbeleŋ ma yow va vi sa ki ɗi. Nam hoŋ va ma nam deŋem ka balnana kiyo. Nam ka kulɗi. Nam ɦal fuumma ki maŋ suu mayra casina. Sa ma ki siilina nam ɦam barawna egemu.

⁸ Nam ka ndi vaam kay sa a mboɗi, nam ka ndi tlena u mbo cocoɗi lay. Nam ka tin kom eg dlara guniɗi. Nam ka ii ɓak ma ndi duk hoŋ suu mbana ni u gasira.

⁹ Sa namma poy ni u gaɗ manda, hum u neenda may. Li ni u gasira sa namma ni sa ma ɗegeena. Nam hin kak iiriya. Di ni Bu Suuna Yawe.

¹⁰ «Na may sa namma vuɗ goo ma dlam cona, ma ci maɗna, ma li tlesuu co suu ndumusi wanna.

¹¹ Na may bum li dlara na ka na dewɗi. Nam goona may ni ti kolo kay ɦinira lay, taɓ u boyogi suu vi ndaryammana lay.

¹² Nam li mbeleŋ ma yow begera vi suu wi hawra ki lay. Nam li dlara kulla lay, va ma nam deŋem ka balna nam ka hoŋommaɗi lay. Nam gol irimmi u fulina, li ni dla mayra cora tew tew.

¹³ Nam ndi tlena ki kay suuna ni a mbona, ndi tlena ki cocoo. Nam ka iiri may, hin ka kak iiri ta taɗi. Nam li dlara ka u voɗoɗira cocoo. Na daŋ may nam hin miɗa. Busuɗum hin hoŋŋi kamu.

¹⁴ «Na may sa ma co namma hin vuɗ goona. Goorom wi dla cora nam laɗta na ni min ka a li ko nam naɗi.

¹⁵ Nam ka ti kolo kay ɦiniraɗi. Nam ka gol irim u fuli suu vi suu Israelnaɗi. Nam ka taɓ u caŋ ndarammaɗi lay.

¹⁶ Nam ka li mbeleŋ ma yow bege vi sa kiɗi. Nam ka ti bal vi saɗi lay. Nam ka li dlara kulɗi lay. Nam ɦal fuumma maŋ suu mayra casina. Sa ma ki siilina nam ɦam barawna egemu.

¹⁷ Nam ka tin kom eg dlara guniɗi. Nam ka ndi va ki kay sa a mboɗi lay. Nam poy ni u gaɗ manda hum u neenda. Sa namma ka ndak a miɗ ki ko dla cora bum laɗtaɗi. Gasira ni nam hin kak iiriya.

¹⁸ Na may ni bum sa ma li dla cora, ɦul tlesuu vi wayammana layna, min ka a li dlara jivi duk suu mamsinaɗi. Gola nam hin miɗ kiyo. Coomba cammi ndaɗu.

¹⁹ «Agi hin ɓak ana, goona ka zii dlara vi bumbaɗi ni kay mege? Na may kay ana goona li dlara ɗegeera. Nam li u gaɗ manda halaŋ a gasira ni nam hin kak iiriya.

²⁰ Sa ma li dla cora, sa namma hin miɗ ni namu. Goona ka zii cora vi bunaɗi. Buna ka zii cora vi goonaɗi may. Ɗegeera vi sa ma ɗegeena hin li ni kam may. Cora vi sa ma cona hin li ni kam may.

Gi humba kay a li jivira

²¹ «Lini sa ma cona nam hin dlaamba cora ki wa halaŋ, nam li ka li u gaɗ manda, li ka li dlara ɗegeera u jivira ni nam hin kak iiriya, nam ka miɗ oloɗi.

²² Sa ka saa kay dla cora nam laɗ ay jewra oloɗi, nam kak iiri ni kay dlara ɗegeera nam ka laɗ wandara.

²³ Na ni an furi gasi kay miɗ ma vi suu cona su? Di ni Bu Suuna Yawe. Ҥawaa, an min ni na ɗow ana asi hin dla coosira ki ta ni lak iiriya.

²⁴ Lini sa ma ɗegeena hin dlara ɗegeera ki ta ni li dla cora ko suu li dla cora laɗta na, ni nam hin ndak a kak iiri olo su? Ҥawaa, ɗegeera nam laɗ ay ki fok jewra halaŋ sa ka ndumuɗ oloɗi. Kay cora nam laɗta nam hin miɗa.

²⁵ Agi hin di ana, Voɗta vi Bu Suunara ka jivi oloɗi. Humugi haa, agi suu Israelna, voɗ manda ka jiviɗi ni ndaɗ na ɗow su? Voɗ magira ka jiviɗi ni ndaɗ na ɗow.

²⁶ Lini sa ma ɗegeena hin ɗegee mamba ki wa, mbuɗ li dla cora ni nam hin miɗa. Nam miɗ ni kay dla coomba nam laɗta.

²⁷ Lini sa ma cona hin dla coomba ki mbuɗ irim a li dlara ɗegeera ni, nam hin fi iirira may.

²⁸ Humum gam kay dla cora nam laɗta halaŋ nam hiniɗ kiyo, ni nam hin kak iiriya ka miɗ oloɗi.

²⁹ Na may suu Israelna hin di ana, Voɗta vi Bu Suunara ka jiviɗi. Suu Israelna voɗ manda ka gasi jiviɗi su? Voɗ magira ka jiviɗi ni ndaɗ na ɗow.

³⁰ Kay ndaɗta agi suu Israelna gegelay ni an hin kaam ɓakŋa kam ni u voɗ mamba nam tlaɗta. Di ni Bu Suuna Yawe. Hoŋogi aya, hinigi dlaagira co ndaɗta ha kiyo. Hinigi dlara zuɗugi a li dla cora egegi oloɗi.

³¹ Cukugi dla cora ci maɗna ta mbuɗugi ki suu ci maɗnara kiyo, mbuɗugi hurugi ni huu ma wilina u ŋgussa wilira may. Agi suu Israelna, agi min a ci tagi ki ni kay mege?

³² An ka furi kay maɗ ma vi sa ma miɗ kinaɗi. Di ni Bu Suuna Yawe. Hoŋogi aya, mbay lakagi iiriya.»