EZEKIYEL 17 - Boy Lonana

Ndal boyna kay gugutluna u bakŋa

¹ Boy Yawena mbay egen dan ana,

² «Goŋ sanna mbay tin ndal boyna maŋ suu Israelna.

³ Aŋ tuɗ dasi ana, Bu Suuna, Yawe, di ay ana, bak ma ŋgolna u garaŋam ta ŋgol cocora, tlimiɗim fiyeki cocoo, tam ki tlimiɗ coco ɦay lay. Col irim ay Liban na ɗow. Nam mba kus yam gu ma yam ana sedrena kiyo.

⁴ Nam kaam gogor kom ma kolo day dayna kiyo. Nam tuɗum ha ki hu mbassam mayra li paara. Nam pam ha ki hu ɦoŋzi ma vi suu li paarana.

⁵ Ŋgoo dagan nam yow njaf tlesuu daŋŋa suu ay hu mbassa Israella tuɗ zaarasi ha ki hu sene ma daŋ ma ki horokina. Nam zaarasi ni fun mbo ma law cocona na tok ko ndal ŋgusugi suu fun mbonana na.

⁶ Ii tle asina day ki kolo day ni mbuɗ ki a gugutlu ma ɓo jivi coco ɦayna, la ki cocoo. Nam la ni tuɗ irim ha fun mbona na ɗow dow u sariyam um ga may. Nam mbuɗ ki a gogor guna, vuɗ vuɗta may, kom la ha fok may.

⁷ Na may ni bak ma ŋgolna col aya, garaŋam ŋgolo cocoo, tlimiɗta egem coco may. Sari gugutluna tuɗ iriɗ ha ni eg bak namma na ɗow a nam yorokoɗ yona ay kaɗta.

⁸ Doliɗi ni ndaɗ ni hu sene ma jivina fun mbo ŋgolna may. Paɗ hu ni a ndaɗ ɗuf cocora, vuɗ vuɗta uɗ may, a li ni sene gugutlu ma jivi ɦayna.

⁹ «Bu Suuna, Yawe, joɓ tam di ana, na ni ndaɗ hin zul may su? Bakŋa hin ka paɗaɗ sariyaɗ ki koloɗi su? Hin ka hiniɗ ɓooɗ u vuɗuɗ so ki ɦawaɗi su? Koɗ ma kus kina halaŋ hin so kiyo. Suu hin paɗaɗ kina ni ka u saɓak oloɗi, ka suu bolow oloɗi lay.

¹⁰ Gugutluna pi vam jivi may ni ka laay cocoɗi. Hu li ma babaa ma col ay u maɗiinana mba kaɗ wa ni ndaɗ hin so kiyo, hu sene ma ndaɗ a wul gin hu jivina ni, ndaɗ hin so ki ni sooy na ɗow.»

Gi u ndal boy namma kiyo

¹¹ Boy Yawena mbay egen dan ana,

¹² «Di suu babali asina ana, agi ka wagi u ndal boy nammaɗi su? Gologiya mul ma Babilonna mbay hu Yerusalem. Nam vi mul ŋgolna u muli mam suu funumma halaŋ, tuɗusi ha ki um hu mbassa Babilonda.

¹³ Nam hin tli sa maa dew duk njaf suu vi mulnana, vi vunum ki u nam ana nam hin lam jiviya. Suu kaɓakŋa vi mulnana halaŋ nam tuɗusi ki hu mbassa daŋga.

¹⁴ Ni kay ana mulla ndaɗta mbuɗ ki gooro, ka ndak a yow kolo egembi. Nam li galam mamba u asi ndaɗta gak gak may.

¹⁵ Na may mul ma kak wili namma hin mbuɗ yara u namu, sun sa sunda hu mbassa Egiptera ana asi ɦam kulumina u asgaa suu duuna aya. Na ni nam ndak a fasi gasi may su? Sa ma li dla ndaɗta nana hin ndak gasi funuɗ may su? Nam bulum galamba vaɗ duk tasi ndaɗta kiyo.

¹⁶ An Bu Suuna Yawe, Lo ma iirina, suu tan ki ana, mul namma hin nda miɗ ni hu mbassa vi mul ma tinim ka kay mulla wanna. Nam li ka u vi vun ma vam duk tasinaɗi, bulum galamba vaɗ duk tasi ndaɗta kiyo. Nam hin nda miɗ ni hu mbassa Babilonda.

¹⁷ Faraw u suu duuna varam bolow coco lay ni ka ndak a njun umbi. Hu buu ma suu Babilonna mba ŋguf zina, to gulumunna ki, ci suuna coco lay.

¹⁸ Nam suu tam ay kiyo, vi galamba kiyo, vi kom ki u nam lay, hin bulum galam ndaɗta kiyo ni nam ka ndakgi, kay nam li ni coo.

¹⁹ «Kay ndaɗta Bu Suuna, Yawe, di ana, An suu u iiri manda, suura asi suu tasi ki kay ɗegeera nam hin li ka uɗɗi, galamba nam bulumuɗ ki ndaɗta, dla ndaɗta an hoŋomba ni kamu.

²⁰ An gunum bay manna ki fokomu. Nam hin vi ni hu bay manna. An hin tuɗum ki hu Babilon. An hin kaam ɓakŋa ha kammi huwa kay dla cora nam landa egenda.

²¹ Suu duu mam suu nam manasina asi hin casi ki u ŋgewna. Suu suɗ dew dewna hin njay ki may. Ni agi hin wi ki ana an ni Yawe. Di dla ndaɗta ni an daŋ may.»

Vi vun ma vi Bu Suunana

²² Bu Suuna, Yawe, di ana, An hin kus yam gu ma yam ana sedrena ta dukka. An hin paɗu. Gogor koɗ ma hu fun kolona an kusumu, an hin pam ga ni u tanda, ha kolo kay yam ɦinira fiyek su ndaryaɗnara.

²³ An pammi kay ɦinira kolo dayra vi suu Israelna. Nam hin ɗuf humba cocoo, vuɗ vuɗta lay hin mbuɗ ni a gu sedre ma jivina. Njaf layagina zeɗ zeɗ hin buu ni humumu. Asi hin basa ni hu ŋgusum kolo hu gogor komu.

²⁴ Na ni ŋgusu ki suu ŋgoo bagina halaŋ hin wi ki ana an ni Yawe, ma bow ŋgusu ma coli kolona ki gana, ma col ŋgusu ma bowi gana ki kolona. So ŋgusu ma ŋgolomma kiyo, ŋgusu ma sooyna hoŋ ɗufum mayna. An, Yawe, di dlara wa ni an hin laɗ kiyo.