EZEKIYEL 16 - Boy Lonana

Yerusalem ni ko cara dalamba na

¹ Boy Yawena mbay egen dan ana,

² «Goŋ sanna, suu may suu Yerusalemma aŋ takasi coosira ki irisiya.

³ Aŋ hin dasi ana, Bu Suuna, Yawe, di suu Yerusalemma ana, Ukka col ayra u vuɗ makka halaŋ ndak ay ni hu ndaŋgara Kanaanda, bukŋi ma Amorna, sukŋi ta Hetta.

⁴ Hu vuɗ makka ndak vuɗ ki gaa kay ndaŋgarara li ni ko wanda na. Sa ŋgaɗak fukuk kaɗi lay, mbusuk ka ki a mbuɗuk ki teteɗɗi lay. Sa lak vuvu ka egekgi lay, baarak baraw ka kakgi lay.

⁵ Sa ma wak hahawak na dew a lak dlara wanda egek na ni kaɗi. Sa ma ndak irim hahaw na dew kaɗi. Buu ma ndak vuɗna asi gikik ha ki ni ŋgoo bagi hu senena ɦawaa.

⁶ An jak keŋek na tok wak gi ga bulum duk busuna. An di ana ndak kak iiriya u busu ma taɓaki takŋa lay ni an min ana ndak kak iiriya.

⁷ An mbuɗuk eŋ coco ko ndal usu ma ŋgolomma na. Ndak wulla, wul ki ŋgol cocoo. Cemi ni ndak mbuɗ ki jivi cocoo, pona kal ki lay, tlimiɗ yak ɗuf ki jivi ɦay lay. Ndak ay jew ni baraw ka takgi lay, tuɗ ki ni siiliya.

⁸ An jak egek na ni waku, ndak ki jeŋi hu li ma a li zoŋga lay. An baarak baraw manna kaku, kuluɓuk siili makka kiyo. An suu tan kiyo, vi galamba u ndaku. Di ni Bu Suuna, Yawe. Ndak hin ki ni manu.

⁹ An mbusuk ki u yona. An mbusuk busu ma taɓaki egekŋa kiyo, lak mbul ma his jivina ki egek lay.

¹⁰ An ɦak baraw ma vunum ɦosi luy luyna egeku, cukuk tuɓuru ɗikŋa seku, njunuk gandi ma jivi ɦayna ki huruku. An baarak ki u top ma jivi cocona.

¹¹ An minik tlesuu jivina ki egeku, gak walakka jivira ki del koku, cukuk ɦedewra jivira ki kelek may.

¹² Kalak walakka ki cinik may, cukuk walakka ki humuk may, tinik jumba weleɗ cocora ki kak may.

¹³ Tlesuu egek asina ni gi lorra u doonora, barawi maksina cili ni u baraw dlemba dereŋga, top baraw ma jivina ma vunum ki ɦosi luy luyna. Ndak ti ni fuɗta ki tlumi u mbul yumma ta tegeɗii cocora u mbulna may. Kay ndaɗta ndak mbuɗ ki jivi coco ɦay. Ndak mbuɗ ki ni ca mulla.

¹⁴ Dla jiv makŋa sem tii ha ki duk njaf suuna halaŋ, kay ndak mbuɗ ki jivi coco u tlegesuu an miniksina egekŋa. Di ni Bu Suuna, Yawe.

Yerusalem mbuɗ taɗ ki gawlaŋga

¹⁵ «Na may ndak tin saarak kay jiv makŋa cocoo u sek ma tii ki coco namma ndak mbuɗ tak ki gawlaŋga, ɦal tak ki maŋ gegelay ma jak voɗta egekŋa.

¹⁶ Ndak yow baraw mak ma ɦiw lam ki a ndal ta li ma mbuy kolona a goɓ Lona hura, li namma ndak mbuɗum ki a li ma li dlara zoŋga may. Ko dla ndaɗta mba liɗi, ka hin a li ha fok oloɗi lay.

¹⁷ Tlegeyek suu an miniksina egekŋa ndak yowosi yoorosi ki a loogi suu njufiina suu ndak goɓ fokosina, gi lorra u doonora.

¹⁸ Ndak yow baraw mak ma vunum ɦosi luy luyna baaram ki kay tle asina. Mbul manna u mbitla his jivira ndak tininsina ki fokosiya.

¹⁹ Fuun ma an ɦakŋana, fuɗta, mbulna, u mbul yumma suu an ka ɦaksina a tira, ndak tinisi ki fok tle asina lay, u mbul ma his jivina, gola ni dlara ndak laɗta. Di ni Bu Suuna, Yawe.

²⁰ Ndak yow gor njufii maksina u gorɓii suu ndak vuɗunsina manna lasi ki ɓivunna maŋ loogi suu ɦawa asina. Dlara co ndaɗta na ni bay ndakak tu su?

²¹ Ndak ŋgaɗan goryon kiyo, ndak ɦasi ki a li ɓivunna.

²² Hu dla cora ndak ka laɗ ndaɗta halaŋŋi humuk ka gak kay buu ma ndak ay u way takŋaɗi su? Hu li ma ndak ay ki siiliya, baraw ka egekgi lay, hu li ma ndak ay mbusuk ga duk busuɗukŋa.

²³ «Ŋgoo dlaakka ndak laɗ co ndaɗta halaŋ, hahawra, hahawra ka kaku. Di ni Bu Suuna, Yawe.

²⁴ Ndak min ziginina ay a li dlara zoŋga, mbu li ma kolo dayna kay a goɓ loogi suu ɦawana ki hu li ma tokka halaŋ.

²⁵ Keŋ voɗta halaŋŋi ndak mbu li ma jivina ki kolo dayna, ndak li dla cora ɓalak jiv makŋa ki wa. Ndak ɦal tak maŋ gegelay ma jak tuɗta voɗna, zul dla cora ha kak zuli na ɗow ɗow.

²⁶ Ndak li dlara gawlaŋga u suu Egiptena suu ziisi ii hakara u ndakŋa suu zew ŋgolona, ndak zul dla cora kakŋi zuli na ɗow ɗow a ɓalakan hurunda.

²⁷ Gola an tin kon kak wa. An hin dagarak suu maksina kiyo. An hin hinigi ni duk ko suu babali maksina, gorɓii suu Filistinna tasi mbuɗ ki zolona ko dlaagira cora.

²⁸ Ndak hin li zoŋga u suu Asirina lay, kay dla ndaɗta ka ndakakgi. Ndak li u asi na lay, ni ka hoɓbi lay.

²⁹ Ndak zul dla cora ay kak coco hu mbassa ndak li paara ay hura lay, mbassa vi suu Kaldenara. U asina hu na lay ni dla ndaɗta ka a ndakakgi.

³⁰ Bu Suuna, Yawe, di ana, dlara zoŋga su ki kak cocoo. Dlara ndak laɗta halaŋŋi dlara sulukŋa.

³¹ Hu li ma ndak min li ma mbuy kolo dayna keŋ voɗta halaŋ halaŋŋa, min li ma jivina hu lima tokka halaŋ lay, ndak li ka ko gawlaŋii suu daŋŋa naɗi lay, min ka a joɓ warakɗi lay.

³² Cara dalam ndakka hin dlara taɓ u njufukka ta ni hal ni njufii suu daŋŋa.

³³ Suuna ɦal tlegena ay ni maŋ gawlaŋina na ɗow, ndak may ni hin ɦal tlena ha ki ni maŋ suu minikŋa na ɗow a mbaarasi ay egekka, suuna ay hu lina zeɗ zeɗ mbay egeku, mba cuk tasi hu dlaakka cora.

³⁴ Ndak hu dla cookka li ni dla mayra ndarak ca laɗ ka dewɗira, sa halak ka ko ndal suuna a hal gawlaŋina naɗi. Ndak ka min a vi warak kay dlaakkaɗi, ndak pereɗ yam dlara suuna laɗta ki ga na ɗow.

³⁵ «Gawlaŋga, hum boy ma vi Yawena haa.

³⁶ Bu Suuna, Yawe, di ana, hu li ma ndak ɓalak bege makka kiyo, tak siili makka ki ii suuna coco lay u dla cora ndak laɗta, tokol fulina, vo busu goryok ki maŋ fuli asina lay.

³⁷ Kay ndaɗta an min tok suu mak suu ndak minisi asina ay ga na halaŋ u suu ndak ka minisiɗina lay. An tokoksina ay kakŋi keŋ lina zeɗ zeɗ bel. An hin takak siili makka ki irisiya. Asi hin wak siili makka ki halaŋ halaŋ.

³⁸ An tinik kakŋi gaɗta vi boyogi suu dalamba u suu vo busu suuna kina may. An cukuk yaanda u hurun ma ɓeŋa ni kak bel bel.

³⁹ An hin hinikŋi hu duk ko banayakŋa. Asi hin took liik ma mbuy kolona kiyo, ɓalakak tlesuu ndali jivi asina kiyo. Asi hin ɦurumuk barawi maksina kiyo, yowok gi walak makka mini egek jivi mbuura ki lay. Asi hin hinik ki ni siili bay baraw egeku.

⁴⁰ Asi hin yowok suuna ay kolo kaku. Suu asina hin gikik u gogoyra. Asi hin cak ki u ŋgewi masisina lay.

⁴¹ Asi hin ŋgalak ziikŋa kiyo. Asi hin lak dlara gaɗta daɗta ki egekŋi ii boyogi suu daŋŋa halaŋ. An hin doorok dlaakka gawlaŋ ndaɗta kiyo. Ndak ka ndak a warak sa oloɗi lay.

⁴² An hin heɓ hurun ma yara ki egekŋi na halaŋ. An hoŋ hurun ma ɓeŋŋa ni kak bel, yaanda hin heɓ ki gaa ka lak oloɗi.

⁴³ Kayra humuk gak ka kay buu ma ndak ay u way takŋaɗira. Ndak hin li ni dla cora egen na ɗow. An may ni hin hoŋok dla cook ndaɗta ni duk yak may. Di ni Bu Suuna, Yawe. Na ni ndak li dlara zozoɗ ndaɗta ka gasi kay dla cora ndak laɗ wandaraɗi su?

Yerusalem mbuɗ ki co su ɦoŋzi ma daŋŋa halaŋ

⁴⁴ «Gola, suu gi ndalla hin tin ndal dlara ni u ndak dew dew ana, sura li coo ni goora hin li ni na may.

⁴⁵ Ndakŋi goŋ ca mayra ka min njufuɗ u goryoɗɗira. Ndak ni wayaŋ gorsek suu ka min njufusiɗira, ka min goryosiɗi lay. Sugi ni goora Hetta. Bugi ni sa ma Amorna may.

⁴⁶ Wayakka ŋgolla ni Samari. Ndak ay cuki bikik gulu na u goryoɗ may. Wayakka goora cuki bik njuf na may ni Sodomma u goryoɗ may.

⁴⁷ Lini ndak li dlara ko asi na njunusi vunusira ndakak ka tuɗi lay. Dlaakka jak su ki ni kay masira na ɗow.

⁴⁸ Bu Suuna, Yawe, di ana, an suu u iiri manda, wayakka Sodomma u goryoɗ lay ni coosira tew ka ko makka naɗi.

⁴⁹ Cora vi wayakka Sodomma ay ni ŋga tara, hoɓi tew tew, ka saa kay vaɗi. Asi ka njun u suu wi hawraɗi lay, ka wi hahaw saɗi.

⁵⁰ Asi mbuɗ ŋga tasi ɦay. Lini dlara an ka miniɗɗira kay ndaɗta an cukusi kiyo, ko ndak wi u irik wandara na.

⁵¹ Suu Samarina suluk masina tew ka nus suluk makŋaɗi lay. Dlaakka cora ni zuli coco sura vi Samarira. Cora ndak laɗta gorsekŋa mbuɗ ni ɗegee suuku.

⁵² Ndak may ni zii zolo makŋa. Ndak cara dla cookka su ki kay masirara. Asi keŋekŋi mbuɗ ni ɗegee suuku. Ndak may ni vi zolo makŋa, zii zolo makŋa may, kay ana dlaakka mbuɗ ki co sura vi gorsekŋara.

⁵³ An hin mbuɗusi dlaasira, ko dlara vi Sodomma u goryoɗta na, vi Samari u goryoɗ may. An hin mbuɗuk dlaak ndak takkara dukusi ni zeɗ may.

⁵⁴ Kay ana ndak zii nek dlaakka mbuɗ ki zolona ko dlara ndak laɗta halaŋ. Ni asi irisi hin ɗil may.

⁵⁵ Gorsekŋa, Sodomma u goryoɗ hin hoŋ hu balamasi ma jewna. Samari u goryoɗ hin hoŋ hu balamasi ma jewna may. Ndak u goryok may ni hin hoŋ ay hu balamagi ma jewna.

⁵⁶ Hu li ma ndak li ay u takka na ni sem wayakka Sodomma ay ka funuk ko va ma co ma tak suuna kina naɗi su?

⁵⁷ Hu li ma dla cookka bay tak ki kiɗik tunaɗi su? Ko ndaɗta na may ndak hin cemi fun gorɓii suu vi Sirina ni a va ma ndal ndalla, u ndaryasi suu vok zina halaŋ. Gorɓii suu Filistinna ka ŋguluk ay keŋ hu gak lay.

⁵⁸ Ndak ka zii ni nek suluk makŋa u dla cora ndak laɗta. Di ni Yawe.

⁵⁹ «Bu Suuna, Yawe, di ana, an hin lakŋi ko ndak lira na may. Ndak gol dla mayra givunna ka jiviɗi, bulum galamba an vaɗ u ndakka kiyo.

⁶⁰ An humun gan kay galam manda an vaɗ u ndakka hu li ma ndak ay u way tak tuna. An hin vi galamba tuɗ din dinda u ndaku.

⁶¹ Humuk hin gak kay dlaakka jewra hu li ma gorsekŋa mbay egekŋa ni ndak hin mbuɗ ki zolona, wayakka ŋgolla u ta goora. An ɦaksina ni a goryoku, asi ka masi hu galamba an vaɗ u ndakkaɗi lay.

⁶² An hin hoŋ galam manda u ndaku, ndak hin wi ki ana an ni Yawe.

⁶³ Kay ana humuk hin gaku, ndak hin mbuɗ ki zolona. Hu li namma ni ndak ka a mal vunuk a di boy oloɗi. Hu li ma an bulumuk dla cookka ndak laɗta kina. Di ni Bu Suuna, Yawe.»