EZEKIYEL 14 - Boy Lonana

Suu Israelna hin fulina kiyo

¹ Suu ŋgolo suu Israelna suu ɦiw mbay lak ga fokonu.

² Boy Yawena mbay egen dan ana,

³ «Goŋ sanna, suu asina fokoŋ ca ni fuli masisina vi hurusi kurufuwa. Asi gi ki fokosi ni va ma daɓasi sesi a asi li cora na. Na ni an hin a hin tan a asi joɓon gasi may su?

⁴ Aŋ dasi ana, Bu Suuna Yawe, di ana, suu Israel suu ŋgay fuli masisina hurusi kurufuna, gi ki fokosi ni va ma daɓasi sesina ni va ma zuɗusi a li dla cora, hin mbay fok sa ma jok vun Lona. An, Yawe, hin hoŋosi dira ni u ndum fuli masi suu asi zulusi vo varasina may.

⁵ Hoŋ diinda hin vi suu Israelna cocoo kay asi ɦuɗun ha ki egesi day ni u goɓpa asi goɓ fulinara.

⁶ Kay ndaɗta aŋ tuɗ di suu Israelna ana, Bu Suuna, Yawe, di ana, hoŋogi aya, hinigi fuli magisina ha kiyo. Pereɗegi ŋgorogi maŋ dlaagira cora halaŋ.

⁷ «Lini sa ma Israelna ma hu dee suu Israelna, ɗowba ŋgay ma ka cuki duk suu Israelna ɦuɗ tam ha ki egen day, vi fuli mamsina hurummi asiya, nam tin fokommi dlara daɓ sem a kalam hu dla cora, hin tuɗ eg sa ma jok vun Lona a joɓomba may. Ni an Yawe hin hoŋom dira ni u tanda.

⁸ An hin mba li sa namma ni an gaw. An hin mbuɗum ki ni a va ma ndalla ii suuna halaŋ. An hin paɗam ki duk suu mansina. Agi hin wi ki ana anni Yawe.

⁹ «Ɗowba lini sa ma jok vun Lona ganyam tam a di dla mayra ka u voɗoɗira, ni an Yawe hinim li ko ndaɗta na. Sa ma jok vun Lona namma an hin lammi u tanda. An hin paɗam ki duk suu man suu Israelna.

¹⁰ Suu asina jakŋi hin zii nek dla coosi ndaɗta. Sa ma jok vun Lona u sa ma ganam yamma may.

¹¹ Ni kay ana suu Israelna tuɗ ha ki egen day oloɗira, ka asi mbuɗ tasi ki njenjera u hurusi ma co namma oloɗi may. Asi li ni a suu mansina, an li ni a Loosina may. Di ni Bu Suuna Yawe.»

Va ma doo kaɓak ma vi Lonna ki kaɗi

¹² Boy Yawena mbay egen dan ana,

¹³ «Goŋ sanna, lini mbas taa dew li dla cora egenu ni, an hin kaɓakŋa kay mbas ndaɗta. Mbas ndaɗta ka jiv va oloɗi. Suu huna ka fi funaɗi, mayra hin ndi kasiya. An hin ci suu warna ki u yoorina lay.

¹⁴ Lini suu hindi cana, Nowa, Danyel u Job ka hu mbas ndaɗta lay ni asi hin suɗ ki ni iiri masira doy hol, kayra asi ni suu ɗegeenara. Di ni Bu Suuna, Yawe.

¹⁵ «Lini an sun vabakgi suu cona ay hu mbas ndaɗta asi ci suu hu mbas ndaɗtana kiyo. Mbassa mbuɗ ki ni ŋgoo bagira. Sa ka tuɗ hu oloɗi ko vabakgina.

¹⁶ Lini suu hindi asina ka hu mbas ndaɗta lay, an suu u iiri manda, di ni Bu Suuna, Yawe, suu asina ka ndak a suɗ go njuf ɗowba go tama na dewɗi lay. Asi tasira hin suɗ ki ni. Asi hol. Mbassa hin mbuɗ ki ni ŋgoo bagira.

¹⁷ «Ɗowba an di ana suu duuna cuk kay mbas ndaɗta, an di ana ŋgewna kal hu mbas ndaɗta ci suu warna u yoorina kiyo.

¹⁸ Lini suu hindi asina ka hu mbas ndaɗta lay ni, an suu u iiri manda, di ni Bu Suuna, Yawe. Asi ka suɗ go njuf ɗowba, go tama ki na dewɗi. Asi tasira hin suɗ ki ni asi hol.

¹⁹ «Ɗowba lini an gi tuguɗira cora ay hu mbassa. Lini hurun ɓeŋ eg mbas ndaɗta wa, gi tuguɗira duk busuna, a ci suu warna ki u yoorina halaŋga ni,

²⁰ Lini Nowa, Danyel u Job ka ni hu mbas ndaɗta lay, an suu u iiri manda, di ni Bu Suuna, Yawe, asi ka suɗ go njuf ɗowba go tama na dewɗi. Asi u ɗegee masira hin suɗ ni iiri masira doy hol.

²¹ «Kay Bu Suuna, Yawe, di ana, lini an sun gaɗ manda kaɓakŋa kay mbassa fiɗi cara ha kay zi ma Yerusalemma lay, ni ana ŋgewna, may ŋgolla, vabakgi suu cona u tuguɗira cora kay a ci suu warna u yoorina kira.

²² Na lay ni u suu hin hin na ew. Asi hin cuk gor njufiina u gorɓiina ay ki hu ɦoŋzina. Gola asi ka tuɗ ay egegiya. Agi hin golosi poy masira u sunda asi laɗta. Hu li namma ni agi hin ɗil irigi kay hahawra an mbaaraɗ kay zi ma Yerusalemma wandara u dlara an mbaaraɗ kaɗta halaŋ.

²³ Asi hin ɗiligi irigiya. Hu li ma agi hin wasi poy masira u sun masirana, ni agi hin wi ki gasi ana dlara an laɗ eg ɦoŋzina wanda ni laɗ ni ka ɦawaɗi. Di ni Bu Suuna Yawe.»