EZEKIYEL 13 - Boy Lonana

Dlara kay suu jok vun Lona suu kaboyna

¹ Boy Yawena mbay egen dan ana,

² «Aŋ goŋ sanna, di boyna maŋ suu jok vun Lona suu Israelna, suu yi tasi ana asi ni suu jok vun Lonana, di ni boy masi ma col ay hurusina, humugi boy ma vi Yawena haa.

³ Bu Suuna, Yawe, di ana, Hahawra kagiya, agi suu jok vun Lona suu bay yalna, suu di dlara u min masira bay wi va ay tu layna.

⁴ Aya, suu Israelna, suu magi suu jok vun Lona ni ko ndal bayakka viɗ ki bagi u lambara na.

⁵ Agi ɗiŋ ka kolo kay gulumunnaɗi agi min ka a min gulumunna kolo a doo kay suu Israelna ko suu duuna hu Buu ma Yawe a mbanaɗi lay.

⁶ Asi wi ni wira kaboyna ɦawaa, asi di dlara ha fokka ni dlara mbaɗ tara ɦawa lay. Asi suu di ana Yawe di ay na, bay Yawe cukusi ay layna, asi ka juɓmi ana nam hin lasi dlaasira asi daɗta kiyo.

⁷ Agi wi ni ka wira kaboyna ɦawaɗi su? Agi di dlara ha fokka ni ka dlara mbuɗ vun tara ɦawaɗi su? Agi suu di ana Yawe di ana, bay an ɓak layna.

⁸ Kay ndaɗta Bu Suuna Yawe di ana, agi di dlara kaboyna ni, wi ni wira mbaɗta lay ni, an hin mbay kagiya, di ni Bu Suuna Yawe

⁹ An hin tak saɓakan ki eg suu jok vun Lona suu kaboyna u suu wi wira mbaɗ vun tara. Asi ka hin li duk tokka vi suu mansinaɗi, sesi ka ɓii hu magaara vi suu Israelnaɗi lay, ka cuk kay ndaŋgara vi suu Israelnaɗi lay. Agi hin wi ki ana an ni Bu Suuna, Yawe.

¹⁰ «Asi viɗin suu mansina ki ana heɓpa mba wa, doliɗi ni heɓpa kaɗi may. Asi hoo ta gulumunna kiyo, gulumun ma suu mansina minim kasina.

¹¹ Aŋ di suu hoo ta gulumunna ana nam hin bow ki gaa. Lo ma si u babaana cocona hin mbaa, agi tagira may ni dlaŋmagina hin cagi kiyo, babaa ma ko bil mbona nana hin mba kagiya.

¹² Hu li ma gulumunna bow ki ga wa ni suuna hin ka dagi ana, Hoo magira agi hoorom tamba ni ara daŋ ologe, naɗi su?

¹³ Kay ndaɗta Bu Suuna, Yawe, di ana, u hurun ma ɓalakina an hin gagi babaa ma ko bil mbona nana kagiya, yaanda hin sagi mbo lo ma paɗ baŋana cocona ay kagiya, hin sagi dlaŋmagi ma to ziginina kina kagiya.

¹⁴ An hin to gulumun ma agi hoorom tam kina kiyo, an hin cukum ki gaa, um mayra ay ki gara hin hin ki kiɗiki. Nam hin bow kiyo, agi hin njay ki may. Ni agi hin wi ki ana anni Yawe.

¹⁵ Yaanda tuɗ ta ta eg gulumunna u suu may suu hoorom tamma. An hin dagi ana gulumunna ka oloɗi, suu hoorom tamma ka oloɗi lay.

¹⁶ Suu jok vun Lona suu di dlara kay zi ma Yerusalemma ka oloɗi lay, suu may suu di ana heɓpa kaa na, doliɗi ni heɓpa kaɗi may. Di ni Bu Suuna, Yawe.

Dlara kay suu li dlara kumuna

¹⁷ «Cemi ni aŋ goŋ sanna hum haa, tuɗ di boyogi suu Israelna suu di dlara kay tasi tok tokŋa, aŋ tuɗ dasi dlara hin lasira ha kiyo.

¹⁸ Aŋ dasi dla mayra an Bu Suuna, Yawe, daɗta ana, hahawra ka kay boyogi suu gan ganda njunuɗ del kosina, ɗee barawna baaram ki kay suuna u wulusi zeɗ zeɗ halaŋ, a casi iiri masira kira, agi min ba iirira vi suu mansina kiyo, agi tagira min a suɗ magira may su?

¹⁹ Agi mbuɗungi sen ki njenjera fok suu mansina ni kay fu ma agi a fam funugi na ew daŋŋa, u komnjoɗi orge ma ewna may. Agi cagi suu maɗ ka kasi tuɗina kiyo, suu a miɗ ki ginna agi mbuɗusi iiri may. Agi ganan yam suu mansina u dlara kaboyna suu min a hum dla ndaɗtana.

²⁰ Kay ndaɗta Bu Suuna, Yawe, di ana, An min di dlara kay gan magira agi njunuɗ del kogi ba iirira vi suuna ki u ndaɗta. An hin njaagira ki del kogiya, ŋgus suu agi vasi kogina an hinisi asi tuɗ may.

²¹ An hin haragi baraw magi ma baari kagi namma kiyo. An hin ɓaɗagi suu mansina ay ki hu duk kogiya. Agi ka ndak a vasi ga kogi oloɗi. Agi hin wi ki ana anni Yawe.

²² Agi ka viɗ suu ɗegeena ki u boy ma kaboyna, suu an min ka a lasi dla co egesiɗi na. Kay agi so u suu cona ha hu dlasira cora ka min a asi hoŋ ay hin poy masira cora ki lak iiriyaraɗi lay.

²³ Kay ndaɗta agi ka a fi wira ganyam ndaɗta oloɗi. Agi ka ndak a di dlara ha fokka oloɗi lay. An hin ɓaɗ suu mansina ay ki hu duk kogiya. Agi hin wi ki ana anni Yawe.»