EZEKIYEL 12 - Boy Lonana

Ezekiyel ɓak ki kay dlara hin li ha fokka

¹ Boy Yawena mbay egen dan ana,

² «Goŋ Sanna, aŋ cuki zina ni duk suu gonokka suu dlasi cona, asi u iira kasi a wira ni ka wiɗi, u humba kasi a humba ni ka humbi lay, kay asi ni njaf suu li dla cora.

³ Goŋ sanna, aŋ may ni njun tlegeyeŋu tuɗ ŋgayra, aŋ njun tlena ki faali irisina halaŋ, hin li ma aŋ cuki huna tani tuɗ ki hu li ma daŋŋa, kala na ni asi li hin wi ana asi ni suu gonokka u Lona kalage.

⁴ Aŋ yow tlegeyeŋ ay ki kiɗik ko tlesuu ŋgayra na, ki irisi faali halaŋ, aŋ taŋga hin kal ay ki fiɗigi ni ko ndal sa ma tuɗ ŋgayra ki hu li ma daŋŋara na may.

⁵ Ii suuna halaŋ aŋ co ii goŋ maŋga kiyo, kal tlegeyeŋ ay ki ni ii li ma cooy namma.

⁶ Aŋ tli tlegeyeŋ kaŋŋi irisi halaŋ, aŋ kalasi ay ki duk ndufunda, aŋ baa iriŋ kiyo, kay a iriŋ wi mbas ndaɗta oloɗi, kay an mbuɗuŋŋi a sa ma an kaɓakŋa kay suu Israelna u aŋŋa.»

⁷ An li ko ndal nam danda na may, an cuk tlegeyen ay ki kiɗik faaliya, ni tlesuu vi sa ma tuɗ ki ŋgayra. Fiɗigira ni an co ii goŋ manda ki may, duk ndufunda an cuk tlegeyen ay kiɗiki, an tlasi kelen ii suuna bel.

⁸ Vin maɗiira Boy Yawena mbay egen dan ana,

⁹ «Goŋ sanna, suu Israel suu gonok suu dlasi cona daŋ ka ana aŋ a li na ni dla mege naɗi su?

¹⁰ Aŋ dasi ana, Bu Suuna, Yawe, di ay ana, boy ma nam damma ni maŋ mul ma ka hu Yerusalemma u suu Israelna halaŋ, suu ka hu Yerusalemma.

¹¹ Aŋ dasi ana, anni a va ma hin a kaagi ɓakŋa kagina, ko an li wanda na, dla ndaɗta hin nda lasi ni na may. Asi hin tuɗ ki ŋgayra hu li ma daŋŋa may.

¹² Mul ma dukusi wanna hin yow tlegeyem kam ii ndufunda, nam hin kal ki ni ii goŋga asi hin coomba ha ki kamba, nam hin baa irim ki ana ko irim wi mbas ndaɗta oloɗi.

¹³ An hin gun bay manna ki fokomu, an hin vamu, an hin tuɗum ki hu mbassa Babilonda, mbassa vi suu Kaldenara, nam hin miɗ ha ki ni hu mbassa nam waɗ ka dewɗira.

¹⁴ Suu may suu ŋguyumma, suu juɓum umma, u suu duu mamsina halaŋ an hin njayasi kiyo, asi hin njay ki keŋ ndaŋgara fiɗi halaŋ. An dikisi ha usi dagan u suu duuna lay.

¹⁵ Asi hin wi ki ana anni Yawe, hu li ma an njayasi ha ki duk njaf suu daŋŋa zeɗ zeɗna. Hu li ma an mbeeresi ha ki duk suunana.

¹⁶ An hin suɗ suu taa dukusi ɦiw, suu may suu suɗ ha fun duunana u suu suɗ ki ko mayra, ko tuguɗirana, a asi tuɗ cuɗ boy namma ha ki hu mbassa asi tuɗ ha hu wandara duk njaf suu daŋŋa dla cora li ay egesi wanda. Ni suuna hin wi ki ana anni Yawe.»

¹⁷ Boy Yawena mbay egen dan ana,

¹⁸ «Goŋ sanna, aŋ hin ti fuuŋŋa ni u dlakka, aŋ hin ci yona ni u ndaana cocoo.

¹⁹ Aŋ hin jok boy namma ki maŋ suu hu mbas ndaɗtana, ana Bu Suuna, Yawe, di suu cuki hu Yerusalem kay ndaŋgara vi suu Israelna ana, asi hin ti tiisina ni u ndaana, hin ci yona ni u ndaana lay, kay yam mbassa hin oy ki u suu daŋŋa tlesuu huruɗ jewna ka li oloɗi, kay dla cora vi suu li cuki huna laɗta.

²⁰ Ҥoŋzi ma suuna cuki huna hin ɓalak kiyo, mbassa hin mbuɗ ki ni ŋgoo bagira, agi hin wi ki ana anni Yawe.»

Boy ma Bu Suuna damma hin li kiyo

²¹ Boy Yawena mbay egen dan ana,

²² «Goŋ sanna, an hum vun ŋgolna dukugi di ana, lini tuɗ ni tuɗiya dlara di kaɗta halaŋ taa ka li dewɗi ni kay mege?

²³ Aŋ tuɗ dasiya, Bu Suuna, Yawe, di ana, vun ŋgol namma an hin bulumum kiyo, sa hin ka di boy namma duk suu Israelna oloɗi. Aŋ dasi ni na ɗow ana buu ma mbay wanna dlara daɗ wandara hin li ki halaŋ halaŋ.

²⁴ Kay dlara waɗ ndaɗta halaŋ ta mbaɗ mbaɗi ka huɗi, dlara ganyam ka huɗi lay, dukugi agi suu Israelna.

²⁵ An Yawe dlara an daɗta li ni nanagelay, ndaɗ hin li kiyo ka juɓ ta taɗi. Boy namma hin li ni kay suu magi suu iiri wanna, suu ka duu u anna. Di ni Bu Suuna, Yawe.»

²⁶ Yawe hin dan olo ana,

²⁷ «Goŋ sanna, gola suu Israelna di ana, tlesuu sa namma wasi asina ka li ni vin gawɗi, ni dla mayra hin li ha fok day tura.

²⁸ Kay ndaɗta aŋ dasiya, Bu Suuna, Yawe, di ana, boy ma an damma halaŋ ma hin bay li ki ka oloɗi. Boy ma an damma bel hin li kiyo, di ni Bu Suuna, Yawe.»