EZEKIYEL 11 - Boy Lonana

Bu Suuna kaɓakŋa kay suu ŋgolo suu Israelna

¹ Musukka tlan koloo, tuɗun ha ki fun Ziŋ Yawera ii u maɗiina vun goŋga u maɗiinara na gay. Hu vun zira a kal ha kalafira ni suuna ka laki hu na dok-mba' yam vadl. Duk suu asina ni an wi Yazaniya ma goŋ Azurna u Pelatiya ma goŋ Benayana. Asi ni muli suu fok suunana.

² Musukka dan ana, «Goŋ sanna, gola ni suu may suu mbaa dla cora u ci maɗna ay hu ɦoŋzinana ɗaŋ.

³ Asi di ana, tami ka mini a min zina tuɗi, ɦoŋzina ni doyra, ami ni a tliwna may.

⁴ Kay ndaɗta aŋ tuɗ dasi dla cora lasira kiyo, goŋ sanna.»

⁵ Musukka vi Yawe mbay kanu, dan ana an tuɗ dasi boyna ana, «Yawe di ana, agi suu Israelna ɓak dlara na ni an huma, an wagi saa magira ki jiviya.

⁶ Agi zul maɗna coco hu ɦoŋzi namma lay. Voɗta hu ɦoŋzinara halaŋ ki oy u maɗ suuna.

⁷ Kay ndaɗta Bu Suuna, Yawe, di ana, maɗ ma agi cam hu ɦoŋzina coco wanna ni a tliwna, ɦoŋzina tamba ni a doyra may. Na may agi tagira an hin cukugi kiyo.

⁸ Agi li ndaana ko ŋgewna cocoo, may an hin mbaaragi ŋgew namma ay kagiya, di ni Bu Suuna Yawe.

⁹ An hin cukugi ki hu ɦoŋzina, an hin ɦagi ki ko suu daŋŋa. An hin kaagi ɓak manna kagiya.

¹⁰ Suu duuna hin cagiya, an hin kaagi ɓakŋa kagi ni hu mbassa vi suu Israelnara ni gaw. Agi hin wi ki ana anni Yawe.

¹¹ Ҥoŋzina ka hin li a doyra oloɗi. Agi ka hin li a tliw ma huna oloɗi lay. An hin kaagi ɓakŋa kagi ni hu mbassa vi suu Israelna gaw.

¹² Agi hin wi ki ana anni Yawe, an ma agi hum ka u gaɗ mandaɗina, lagi ka u neendaɗi lay. Kay agi li ni u nera vi suu ŋguyugi zina wanna.»

¹³ Hu li ma an ka cuɗ boy ma vi Lona namma ki na ni Pelatiya ma goŋ Benayana, ni ana u suu vi Lona suu suɗ ay ndena, ndi ga miɗ ni na gaw. An kuluɓ kaŋga u vun dikin, sawalla ha kolo u delenda eŋga ana, «Ҥii Bu Suuna, Yawe aŋ min a daɓ u suu Israel suu hin ndena ki gaw su?»

Lona hin tok yam suu njay kina

¹⁴ Boy Yawena mbay egen dan ana,

¹⁵ «Goŋ sanna, suu laki hu Yerusalemma u gorseŋ suu hu njafaŋŋa u suu Israelna halaŋ ana, lakagi ha ki na day eg Yawena, ndaŋga ndaɗta cemi ɦamira ki ni mamiya.

¹⁶ Aŋ tuɗ dasi ana, Bu Suuna, Yawe, di ana, lini an njayasi ha ki na day duk njaf suu daŋŋa lay, dikisi ki hu mbassa daŋga lay, hu mbassa asi tuɗ ha ki hura an ay ni a ziisira gaw.

¹⁷ Aŋ dasi ana, Bu Suuna, Yawe, di ana, an hin tokogi yagi ay ki duk njaf suuna halaŋ, an hin tokogi ki hu mbassa agi njay ha ki huruɗta, hin ɦagi mbassa Israella may.

¹⁸ Asi hin mbaya, hin yow dla cora lira ki halaŋ, u dla mayra ɓalakasi kira.

¹⁹ «An hin ɦasi huu ma wilina u ŋgussa wilira. An hin paɗasi hurusi ma sooy eŋ ko ndal gogoyra nana kiyo, an hin ɦasi huu ma lumuɗna hurusiya.

²⁰ Ni asi hin li u gaɗ manda, golon gaɗ manda u neenda jivi may. Asi hin mbuɗ ni a suu mansina. An hinni a Loosina may.

²¹ Na may suu hurusi ki tini kay fuli na gak gakŋa u suu li dla cora, an hin hoŋosi sun masira co ndaɗta ni kasi may. Di ni Bu Suuna, Yawe.»

Bibiŋilla hin ɦoŋzina kiyo

²² Serubimma ko garaŋasiya piira, sem pupusna usi may. Bibiŋilla vi Lo ma vi suu Israelna ha ki kolo kasi may, ha ki kasi kolo na day.

²³ Bibiŋilla vi Yawera hin ɦoŋzina ka kiyo, tuɗ ha ki kay yam ɦinira coli u maɗiinara na.

²⁴ Musuk Lonara tlanu, an wi tanu ni ha ki ni duk suu yowosi ha ki hu mbassa Babilonda gaw. Dla ndaɗta an waɗ ni hu takka vi Musuk Lonara, wira an waɗ ndaɗta su ki ni kolo kan na ɗow.

²⁵ An ɓak dlara an waɗ ha ndaɗta ki maŋ suu yowosi ha ki balna hu Babilonna halaŋ, kay dlara Yawe landa egenda.