EZEKIYEL 10 - Boy Lonana

Lona hoŋ tak tam ii Ezekiyel olo

¹ An gola ni kolo kay huulona ma kuluɓi kay Serubimma nana, an wi vana ha duk ko ɦini mayra yaɗ ana safirra na, ndaɗ gol ha tinira ko ndal dlamba mulla na.

² Lona di sa ma baraw dlemba cuki tamma ana, «Kal ha hu va ma ŋguy ga u Serubim ko sem pupusna nana, yow murus kura ga usi wanda ay duk koŋu, njayaɗ ha kolo kay ɦoŋzina.» Sa namma kal hu irinni na gaw.

³ Hu li ma sa namma kal ha nana ni Serubim ki coli bik njuf na may. Ɗugulla oy ki vo kurufu hu kaana ni na ndiŋ ndiŋ.

⁴ Bibiŋilla vi Yawera tak ki kolo kay Serubim ha eg zira na tok, huu zira hin oy ki u ɗugulla may, li ma kurufu hu kaanana oy ki u bibiŋilla vi Yawera may.

⁵ Soora garaŋ Serubim soo ay kalafira hum ha ki bunsu ŋgoo kaana, ko ndal del Lona ma Saɓakŋa Kom Belna ɓakka na.

⁶ Hu li ma nam ɦal voɗta maŋ sa ma baraw dlemba cuki tamma ana, «Kal koŋ yow murus kura ay hu va ma ŋguy ga u Serubim ko sem pupus nana ayra ni.» Sa mbaya mba col eg sem pupusna.

⁷ Serubim maa dew ni maɗ kom ki yow kura ay duk ɦoŋ va ma ko sem pupusna nana ga u Serubim suu hiŋŋa ɦaɗ maŋ sa ma baraw dlemba cuki egemma. Nam vaɗ kay ni kal ay ki u ndaɗu.

⁸ Vana ay ga u garaŋ Serubim ko ndal ko sa warna na.

⁹ An gola ni sem pupusna ka na fiɗi ga u Serubim, Serubim dew ni sem pupus mamma um dew may, sem pupus namma halaŋŋi weleɗ ko ndal ɦinira yaɗ ana krisolitta na.

¹⁰ Asi fiɗi halaŋŋi weleɗ ni ko tasi na dew, sem pupusna fiɗi halaŋ gol ni ko ndal ki kali huu tamba na.

¹¹ Hu li ma asi a tuɗta ni tuɗ irisi zeɗ zeɗ keŋ lina fiɗi halaŋ, asi ka gunɗi lay, tuɗ irisi ni hu li ma vogosi wak ha kamma na gay, ka gun keŋgi.

¹² Ta Serubim ŋgorosiya u kosiya u garaŋasi halaŋ iira ki huwa u sem pupusna fiɗi halaŋŋi irim ki kamu, asi weleɗ cocoo.

¹³ An hum nam tinisi semma kay sem pupus namma ana, «li ma ŋguy huɗuɗna.»

¹⁴ Asi halaŋŋi irisi kasi fiɗi fiɗi, iira jewra ni ii Serubimma, iira mbara ka vok sa warna na, iira hindira ni ko vok dlona na, iira fiɗira ni ko ndal bakŋa na.

¹⁵ Serubimma pii koloo, ni ko ndal tlesuu iiri suu an wasi ay fun mbo lum ma Kebarna na.

¹⁶ Hu li ma Serubimma tuɗ na ni sem pupusna tuɗ usi may. Hu li ma Serubimma ko garaŋasi a pii kolora ni, sem pupusna ka hin ka kiɗi, tuɗ usi may.

¹⁷ Asi col wa ni, nam col gaw may. Asi pii wa ni, nam pii u asi gaw may, kay ana ŋgus tlesuu iirina ka hurusiya.

Bibiŋilla vi Bu Suuna hin Ziŋ Lonara tuɗ kiyo

¹⁸ Bibiŋilla vi Yawera hin Ziŋ Lonara ki tani, tuɗ col ki kolo kay Serubimma.

¹⁹ Serubimma ko garaŋasi na ni, pii tuɗ kolo irin an wasi ha na gok gok, asi kal ki ni u sem pupusna lay halaŋ. Bibiŋilla vi Yawera tuɗ col ni fun Ziŋ Lonara hu vunuɗ ma ii u maɗiinana na. Bibiŋilla vi Lo ma vi suu Israelna ay coli kolo kay Serubimma.

²⁰ Ni tlesuu iiri suu an wasi ay u Lo ma vi suu Israelnana tok fun mbo lum ma Kebarna, an wi ki ana gasi ni Serubimma.

²¹ Serubimma fiɗi halaŋŋi ma dewna irim fiɗi fiɗi, garaŋam fiɗi fiɗi may. Va gol hu ko ndal ko sa warna na may.

²² Vogosi tli tam ko ndal va ma an wam ay fun mbo lum ma Kebarna na. Asi tuɗ ni gegelay ni tuɗ irim ha ni fokom na ɗegee ka gunɗi.