EZDRAS 3 - Boy Lonana

Josuwe u Zorobabel hoŋ tokka

¹ Til ma kiɗisiyana ndak ndakŋi, ni hu li ma suu Israelna ay ki hu ɦoŋziisinana ɗaŋŋi, suuna tok tasi taɓ ki dew hu Yerusalem.

² Josuwe ma goŋ Yosadakŋa col kolo u gorsem muli suu li ɓivunna, u Zorobabel ma goŋ Salatiyelna u gorsemma lay. Asi hin min givin ma togolla ma vi Lo ma vi suu Israelna a hin lam ɓivun ma ŋgalam ki ŋgalina huna ko ndal ki ɓiiri hu magaara gaɗta vi Moiz, sana vi Lonara na.

³ Asi hoŋ givin ma togolla minda hu li ma um ay gii huna, kay ana asi li ndaana ko suu hu mbassana. Asi hin li ɓivun ma ŋgalam ki ŋgalina maŋ Yawe, ɓivun ma ŋgalam ki maɗii may, fiɗigi mayna.

⁴ Olo, asi hin li luu mbutluɓma ko ndal ki ɓiirira na, li ɓivunna hu buuna tew tew daɓ buu ma ŋgaam ki u gaɗtana ki u ndaɗta.

⁵ Ŋgoo dagan wanni, asi hin li ɓivun ma ŋgalam ki ŋgali ma zeɗ zeɗna, ɓivun ma ŋgalam ki ŋgali ma vun til ma teteɗ ma vi Yawena hu buuna tew tew, kay suu ɦal ɦalla ɦawara u hurusi maŋ Yawena halaŋ lay.

⁶ Hu buu ma fok jew hu til ma kiɗisiyana, asi gijaŋ mbay u ɓivun ma ŋgalam ki ŋgalina maŋ Yawe. Doli na ni u Ziŋ Yawera ni bay gi kaŋga tu lay.

⁷ Asi ɦal gursuna maŋ suu ceɗ gogoyra lay, maŋ suu ɓal guna kay zirana u tlesuu tira lay, summa lay, mbulna lay maŋ suu Sidonna, maŋ suu Tirna a asi mba gu sedrena ay ki duk mbo lum ma ŋgolna, dol ay hu Liban ta ta Yoppe, tuɗ ay hu voɗta mul ma Persna, Sirus, ɦasirara.

⁸ Olo, hu basara mbara hu mbaasira hu Ziŋ Lonara hu Yerusalem hu til ma mbana, Zorobabel ma goŋ Salatiyelna u Josuwe ma goŋ Yosadakŋa u gorsesi suu usi hinna, u muli suu li ɓivunna u suu Levina u suu hoŋ ay ki hu mbaɓura Yerusalemma gijaŋ tin suu Levi suu basaɗasi su ki kay dok-mbarana a tuɗ li sun Ziŋ Yawera.

⁹ Josuwe may ɗaŋŋi, goryom u gorsemma, Kadmiyel u goryomu, goryoŋ Yudana, ko tasi dew njaa tasi ki a gol gegelay ma li sun Ziŋ Lonara, ɓak ka kay goryoŋ Henadadna koɗi goryosi u gorsesi suu Levina.

¹⁰ Na ɗaŋŋi suu minda gi u Ziŋ Yawera kaŋga, hu li ma asi ka tin suu li ɓivunna u baraw masira egesiya, bu tokolomma lay, tin goryoŋ Azaf bu darina usi lay, a asi ŋga Yawe u gaɗta David mul ma Israelna ɦaɗta.

¹¹ Hu geleɗta u gi deɓpa maŋ Yawera asi hoŋ dira ana, «Kay ana nam jiviya, ɗegee mamba kay Israel ni a fafaɗta.» Suuna halaŋ yi ha kolo u furira, geleɗ Yawe kay u Ziŋ Yawe ta gaɗ kaŋgara.

¹² Na ɗaŋŋi suu li ɓivunna, suu Levina, suu malyaŋ zina duk suu basaɗasi ki jaki ŋgolna bolowo, suu wi zira vi Lonara ay jewna tii ki kolo u delesi eŋga hu li ma asi ka gi u zi ndaɗta kaŋga irisi gaw mayna. Na may suu daŋŋa bolowo yi kolo u delesi li furira gaw may.

¹³ Na ɗaŋŋi suuna ka ndak a ɓorow ii vun ma suuna lam a furirana ki u tii ma vi suu bolownanaɗi, kay ana suuna yi kolo u delesi li furira ni hum ha ki na day lay.