EZAYI 66 - Boy Lonana

Suu ɗegeena u suu ka ɗegeeɗina

¹ Yawe di ana, Huulona ni dlam manda kakŋa, ndaŋgara ni va ma an tin sen kamma ɦawaa. Zi ma agi hin mininnana ni manage? Li ma an hin a koɗ tan hurumma ni manage?

² Olo ni, tle asina halaŋ kon lasi ni namu, asi halaŋŋi varanu. Yawe di na ni namu. Asi halaŋ an ka golosiya, suu may suu hahawra suu ka lasna halaŋ. Suu ka dlak ndaana ko boy mannana.

³ Suu ka li ɓivunna hu mbutlnana hin ci sa warna tok may, suu li ɓivunna u timigiina hin ŋgaɗ del dina lay. Sa ma ŋgalan mbul ma hisna, hin goɓ fulina lay. Asi manni voɗ masira hurusi ka furi kay sun masira co ndaɗta.

⁴ An may ni hin lasi dlara asi miniɗ ndaɗta may, an hin mbaarasi dla cora asi li ndaana koɗ ndaɗta kasiya. An yasiya sa humun ka dewɗi, an ɓakasiya, sa ma tin humum a hum kaɗi. Dlara an goloɗ irin cora asi manaɗ ni ndaɗu, ni dlara ka irin jiviɗira.

Kaɓak ma kay zi ma Yerusalemma

⁵ Humugi boy ma vi Yawena haa, agi suu lam ndaa boy mammana, gorsegi suu li gonokka u agina, suu dikigi ki kay senna, asi di ana, Yawe tak bibiŋil mamba ay ɗaŋgi su, ami wagi ki agi su ki kami ɗaŋ. Na may asi suu asina hin hom yasi gaa.

⁶ Humugi della ɓak ay kolo wanda ay hu ɦoŋzi ŋgolna, hu ziŋ Lonara. Ni del Yawe, nam hoŋ ay ni hin warak suuna, suu babali mamsina nam kaasi ɓak masina ki may.

⁷ Jew a gijaŋ tii tara vuɗta ni ndaɗ vuɗ goona, jew hu li ma ti tara a mba kaɗna ni ndaɗ vuɗ go njufna.

⁸ Sa ma hum boy ma ko namma nana sem dewna ni gege? Sa ma wi dlara ko ndaɗta nara dewna ni gege? Mbassa ɗowba suu warna ndak a vuɗ hu buu ma dewna na gaw su? Na may Siyon vuɗ goryoɗ ki hu buu ma dewna.

⁹ Yawe di ana, «Lini an tew cara ki hu tiliɗ ma vuɗta, an hin doo gogoona bay vuɗ ki su?» Lona di ana nammi sa ma vuɗ gorra ay kina. Kay ndaɗta an ka mbuɗ vuɗta vi cara loɓ cocoɗi.

¹⁰ Furiyugi u Yerusalem, ayagiya, agi suu maɗsina halaŋ, agi suu li tii kay Yerusalemma furiyugi u ndaɗ cocoo.

¹¹ Agi hin caɗ mbiiriɗu, hoɓogi u tlegeyeɗ may ko gogoona furi u po sumba na. Ko agi fi ŋgol coco, furiyugiya u pooɗ ma dlam ŋgol cocona.

¹² Yawe di ana, an hoŋ irin eg Yerusalem ko mbo lum ma mbaa heɓpa na. Begera vi njaf suu daŋŋa mba ki varan ko mbo lumma tli sulul kira na. An gologi ko cara gol goroɗ ma ci pona koɗna na, ndaɗ tlam koloo, kisikim u tlawaɗu.

¹³ Ni ko sa ma sum lam um cocona na, an may ni hin lagi ugi ni na may. Na daŋ may agi hu Yerusalem halaŋ hin fi saɓakŋa.

¹⁴ Agi hin wi na ni hurugi hin furi cocoo, sokogi hin mbuɗ eŋ coco ko usu ŋgolomma ɗuffa na. Yawe hin tak kom ii suu sunumma. Tak yaamba maŋ suu babali mamsina may.

Kaɓak ma kay suu dlasi cona

¹⁵ Yawe hin mbay ni u kura, pus pus mam ma kulumina ni ko babaana na, oy u yaamba ku cocora balaf mam ma gaɗ suuna ni sin kura.

¹⁶ Na daŋ may, Yawe suu duu mamsina ni kura ay kommi ndaɗu. Kay a duu tlesuu iirina ni ŋgew ma ŋgolna ay komu. Suu Yawe a casi ki u ŋgewnana bolow cocoo.

¹⁷ Yawe di ana, Suu may suu goɓ fulina suu wak yasi day a hal fulinana suu kom tliw kosoŋŋa u suu kom ki kolomba u suu li dlara njenjera halaŋ hin ba kiyo.

¹⁸ An wasi sun masira u saa masira lay. An hin mba ni tok yam njaf suuna halaŋ, hu li ma asi mba wa ni asi hin wan bibiŋil manda.

Buu ma daɓ daganna

¹⁹ An hin pi va ma tak kina kolo huwa. An hin sun u suu hin ay hu li ma daŋŋa nde ndena ay huwa, ay eg njaf suu daŋŋa halaŋ halaŋ. Suu Tarsisna, suu Pulna u suu Loudna mbas mayra duu u mburra, suu Tubalna u suu Yavanna u suu ay ki day day suu humun dlan ka dewɗina, suu wan bibiŋil manda ka dewɗi layna, asi hin di ki kay ŋgol manda duk njaf suuna halaŋ.

²⁰ Suuna hin mbaaragi gorsegi suu ay ki hu li ma daŋŋana aya, mbaarasi ay ko poora na maŋ Yawe. U kulumina u pus pusna u tlena gani kolo kay kulumina, lay ma buuna lay, koro ma Makkana u jamballa, mbaaasi eg ɦini manda teteɗta. Ko ndal suu Israelna ɦal tlena ay man ŋgoo bagi hu fullara na may.

²¹ Duk suu asina ni an hin yow muli suu li ɓivunna, suu vi Levina may, di ni Yawe u tamba.

²² Na daŋ may ko huulona ma wilina u ndaŋgara wilira na an min a colosi fokon eŋ didin di na ni Yawe u tamba. Njafagi hin lak ka eŋga ni na gak gak, segi hin yi ka na didin.

²³ Hu buu maragelay luuna hin li ha ni na gak gak, buu ma vi Lonna ha ni na gak gak koɗ tara mba wa kay suu goɓonna hu Yerusalem. Di ni Yawe u tamba.

²⁴ Asi cuk ay ki kiɗik wa ni wi ni maɗ suu babali mansina sak sak. Njuful masina ka miɗɗi. Kura ŋgalasira ka tewɗi lay. Maɗ masina hin tuɗ ta suu warna halaŋ halaŋ.