EZAYI 64 - Boy Lonana

¹ Aŋŋi ko ndal kura zak usuna kira na, ko kura zal mbona kira na, aŋ hin tak taŋ ki ii suu babali maŋsina ana, aŋŋi Lona, njaf suuna halaŋ mbuɗ ki ndaana koŋu.

² Lini aŋ a li dlara mbuɗ mbuɗta ka juɓbira ni na daŋ may, aŋ cuk seŋ ay kaŋga ni ɦinira halaŋ geŋeɗa.

³ Fok jew ni aŋ li dlara mbuɗ mbuɗta sa waŋ kaɗi, Lo ma daŋ ko aŋ na kaɗi, aŋ li ko ndaɗta na kay suu may suu ka tin saa masira kaŋŋa.

⁴ Aŋ mbay ŋgaf vok suu may suu li min maŋgana, suu laɗ u furira, suu saa a tuɗ hu voɗta aŋ takaɗta. Li ni aŋ mbuɗ ya lay ni kay ami li cora, na may ami hin suɗ ki ni kay ami ka tuɗ hu voɗta tew tewra.

⁵ Ami halaŋŋi suu cona, sunda ami laɗta halaŋ iriŋŋi ko baraw ma zoɗina na. Dla coomira felemi kolo ko hum bubura sooyra na, babaana siiriɗ kiyo.

⁶ Sa ma yaŋ seŋ kaɗi, sa ma dliɗ tam kolo a vaŋ kom kaɗi lay, kay aŋ ŋgay taŋ ki irimi wa, aŋ hinimi ko dla coomira ka lasami ni ndaɗu. Ami mbuɗ ni suu ka hu yoorana.

⁷ Na may ni Yawe aŋŋi bumiya, ami ni lubuna ɦawaa, aŋ minimi ni aŋu, ami halaŋŋi sunda aŋ laɗ u bik koŋga.

⁸ Yawe mbuɗ yara ta ta a kal ki saɓakiɗi, humuŋ gaŋ kay dla coomira na gak gakgi, na may gol iriŋ ay kami halaŋ, ami ni suu maŋsina.

⁹ Ҥoŋziiŋ ma teteɗna mbuɗ ki ni ŋgoo bagira, Siyon mbuɗ ki ni ŋgora. Yerusalem ɓalak ki wa.

¹⁰ Ziimira teteɗta, ta jivi cocora, ta somoyomi gi soolla geleɗeŋga ay hura, kura ŋgalaɗ ki wa. Li ma jivi ma ami minim cocona mbuɗ ki ni delbuɗna.

¹¹ Yawe, ɓalak ndaɗta na ni aŋ kak na en, ka di vaɗi su? Aŋ ndak seŋ taŋ na gak gak, hinimi ami las tu su? Hin a dlara su ki kami saɓaki tu su?