EZAYI 61 - Boy Lonana

Sa ma sunum ay a di dla suɗta kina

¹ Musuk Bu Suuna Yawera ka kanu, Yawe ŋgaɓan a di boy ma ayra maŋ suu hahawra, ɗil ii suu hurusi ki ɓalakina, nam sunun ay a di boyna cuk suu hu daŋgaynana kiyo. Suu ay ki vii balnana tuɗ ki voo.

² Nam sunun ay a di ki kay basara oora vi Yawera. Ni buu ma sa sukulna vi Looygina. Ɗil ii suu ka li hahawrana.

³ A ɦal jumba furira maŋ suu hu Siyon suu ka yoona, kay balam buɗ masina. Ҥasi mbul ma his jivina, ka yoora oloɗi. Cukusi baraw ma ŋga tara, ka baraw bolna oloɗi. Asi hin yasi ana, ɦoy ma suuna ŋga Lona u namma, sene ma vi Yawena, ma suuna ŋgaam u namma.

⁴ Asi hin min tlesu suuna toosi ki gana ki koloo, hahawra li ay kay somoyosira asi hin daɓaɗ kiyo. Ҥoŋzi ma suuna toom kina asi mbuɗum ki wiliya. Tlesuu ay ki ii somoyosi day dayna min kiyo, yoo ka oloɗi.

⁵ Suu koyogina hin juɓugi u ziigina ni asiya, asi hin taaragi yori magisina ni asi lay, asi hin horokogi sene gugutlu magina ni asiya.

⁶ Agi tagira may ni suuna hin yagi ana, «Muli suu li ɓivunna vi Yawena.» Asi hin yagi ana, «Suu ŋgolo suu vi Loominana.» Agi hin ti begera vi njaf suuna ki halaŋ halaŋ. Agi hin ɦis tagi ki u tlegeyesiya.

⁷ Pan ma suuna panagina u zolona ka lagi oloɗi, agi hin yowosi nus ndaŋga masira ay ki a jona. Furi magira hin li ha ni na gak gak.

⁸ Kay an, Yawe, an minni ɗegeera. An ka min ɦulaɗi, ka min li iiraɗi lay. An hin ɦal warakŋa maŋ suu mansina. Galamba an vaɗ u agi ni a fafaɗta.

⁹ Njafagi ka hin viɗ ka ki duk njaf suunaɗi. Goryogi dlasi hin li ni ŋgolo ii suuna halaŋ. Suuna fasi ni aragelay ni wasiya, asi ni njaf ma Yawe paɗ vunum ki kamma.

Soolla Gi deɓpa

¹⁰ Yerusalem ŋga Lona di ana, an furi cocoo, furi coco ni kay Yawe, iri manda furi coco kay Loonna, kay nam cukun baraw ma suɗta egenu, nam kalan hu baraw ŋgol ma kaɓakŋa, ko ndal goora min taɗ a hal njufna, ɗowba mul ma li ɓivunna tin jumba jivira kamba na, ko goora hal a i njufna min taɗ ki jivira na.

¹¹ Na daŋ may, ko ndaŋgara day ii tlena ay ki kolora na, ko senenna day tlesuu hurumma kira na, ko ndaɗta na may Yawe day ɗegeera u geleɗta ki kolo fok njaf suuna halaŋ halaŋ.