EZAYI 60 - Boy Lonana

Kiɗikka wilira kay Yerusalem

¹ Col koloo, weleɗa, kay kiɗik maŋga kal ay ki wa. Bibiŋilla vi Yawera ka kolo kaŋu.

² Ndufunda kuluɓ duliyara ki halaŋ, njeŋgera ka ki kay njaf suuna halaŋ. Na may kaŋ aŋ taŋga ni Yawe ka ɓo kiɗik mamba, bibiŋil mamba ka tak ki kaŋu.

³ Njaf suuna halaŋ hin poy ni u kiɗik maŋga, mulina lay hin tuɗ ni u kiɗikka hin li kaŋga.

⁴ Tli iriŋ kolo, gol gige, suuna halaŋ tok tasiya, mbay ni egeŋu. Goryoŋ hin mbay ni, col ay ni hu mbassa dayra, gorɓii maŋsina hin col saɓak cocoo.

⁵ Aŋ hin wi u iriŋu, aŋ hin furiya, huruŋ hin oy ki u furira cocoo, kay begera ay hu mbo lum ŋgolnara mbuɗ ki ni maŋu, begera vi njaf suu warnara halaŋ hin mba ki ni koŋu.

⁶ Jamballa hin oy ki varaŋ tani, jamballa col ay vi suu Madiyanna u suu Efana, suuna ay hu Saba halaŋ hin mbaa, asi hin mbay u lorra u mbitla his jivira. Asi hin di ki kay ŋgara ŋga Yawera.

⁷ Yoori suu gori suu hu Kedarna hin ki ni maŋu, gamlagi suu varasina hin ki ni maŋ a li ɓivunna, asi hin ɗiŋ ki kolo kay givin ma togolla vi Bu Suuna. Ziŋ Lonara, Bu Suuna, hin mbuɗuɗ dlaɗ ŋgol a sura jewra.

⁸ Va ma tuɗ ay kolo ko ndal ɗugulla na ni mege? Pii ko ndal gugukka a tuɗ hu ziiɗta na ni mege?

⁹ Na daŋ may, suu kay daarna ka tuɗ ay egenu, suu ay Tarsis dayna vogŋa ay ni masiya. Asi mbaa kemba ay ni na day. Asi mbay u doonora u lorra, kay a ŋgaaŋ Yawe, Looŋŋa. A ŋga ma teteɗ ma vi suu Israelna kay nam ɦaŋ kiɗik mambara.

¹⁰ Koyogina hin minigi gulumun magina ki kolo, muli masisina hin ɦagi tlesuu li ɓivunna ay lay. Kay hu li ma hurun ɓeŋŋa ni an cagiya, na may u oo manda may ni an min takagi ɗilira.

¹¹ Vun grek magina hin li ki mali tew tew, faali lay, njeŋge lay, nam ka dug oloɗi. Kay a cuk njaf suu col ay day suu mbayna vora. Muli masisina mbaa begera ay u tasi ni na zomolok.

¹² Njaf suuna u muli suu ka min a sunugiɗina hin ba kiyo, njaf suu asina halaŋŋi hin dik kiyo.

¹³ Ŋgolla vi gu ma Libanna hin ki ni magiya, Gu ma yam ana Sipre, orme u buis halaŋ mba ki ni varagiya. Ni kay a minin ziinda ki jivira. An hin tak bibiŋilla vi li ma an tin sen huna kiyo.

¹⁴ Suu may suu lasagina hin mba cok yasi ga fokogiya, suu may suu panagina halaŋ hin mba goɓ ga u segiya. Asi hin yagi ana, «Ҥoŋzi ma vi Yawena,» «Siyon ma vi ma teteɗ ma vi suu Israelna.»

¹⁵ Jew ni suuna noyogi kiyo, sa ma minigi kaɗi, sa ma mba a heɗegi kaɗi lay. Cemi ni ka na oloɗi, agi mbuɗ ni li ma furira a fafaɗta, furi ndaɗta ha ni na gak gak.

¹⁶ Agi hin ci mbii njaf suuna ki halaŋ, agi hin ti begera vi muli suu daŋŋara ki halaŋ. Agi hin wi ki ana saagi ma suɗta ni an Yawe. Sa ma tuɗugi ay kina ni ma vi Yakob ma Saɓakŋa Kom Belna.

¹⁷ An ɦagi lorra balam kawi ma tlawna, balam kawina an ɦagi doonora, ɦagi a guna ni kawi ma tlawna, ɦagi a ɦinira ni kawi ma warna. An hin tin a sa ŋgol ma gologina ni heɓpa. Mul ma hin ti kagi halaŋŋa ni ɗegeera.

¹⁸ Hin ha fokka ni della ya ta las suuna ka njaɗ hu mbas magira oloɗi. Ka li ii hagara u suu ŋguy kay mbas magiranaɗi lay. Aŋ hin tin sem gulumun maŋŋa ni ana, «Suɗta.» Vun grekŋa aŋ hin yammi ana, «Geleɗta.»

¹⁹ Hin fokka ni faɗta ka li kiɗikka kagi faali ni ndaɗɗi, tilna ka li kiɗikka njeŋge ni nambi lay. Yawe u tamba hin li a kiɗik magira ni nam a fafaɗta. Loogina hin a bibiŋil magira ni nam dew.

²⁰ Faɗ magira ka ɗik oloɗi, tilna ka kal ndufunɗi lay kay Yawe hinni kiɗik magira a fafaɗta. Buu magi ma hahawra daɓ ki wa.

²¹ Suu magisina halaŋ mbuɗ ni suu ɗegeena. Asi hin ti mbassa halaŋŋi asi a fafaɗta. An tinisi ni anu, an tinisi na ni kay a suuna halaŋ ŋgaanu.

²² Njaf suu vo kaɗakina hin mbuɗ na buɓ buɓ. Suu may suu wi hawra hin mbuɗ ni suu zuli cocoona. An, Yawe, hin li dla ndaɗta ki hu liiɗ ni cem cem gaw.