EZAYI 58 - Boy Lonana

Lona minni laara u lira li u buu ma vi Lonna

¹ Bu Suuna di ana, Oo uŋ koloo, sawalla loɓbi, ko ndal tokolomma bura na, tli deleŋ koloo. Dla cora suu mansina laɗta dasira ha kiyo. Di goryoŋ Yakobma ha ki kay suluk masina.

² Anni sa ma asi a halan hu buuna tew tewna. Jivira ni asi ɦal tasi a wan voɗ manda. Ni ko suu ka hal a li dlara jivira na, ka min a hin ɗegeera vi Loosinara kiɗi. Asi ka hal ni kaɓak ma ɗegeena fokonu. Asi tin hurusi ni kay dlaanda.

³ Asi dan ana, ami li laara aŋ ka wamiɗi ni, jivira ni arage? Lini ami hoŋ yami gaa, aŋ ka wamiɗi lay ni, nanage? An hoŋosi dira ana, hu li ma agi li laara ni agi ka li paa magira may, agi ka las suu li sunda fokogina lay.

⁴ Laara agi laɗta tuɗugi ni hu dlara honira u ciwayra na ɗow. Ta ta agi ci suuna poŋga u hurugi ma cona, agi ka li laara ko hu buuna dew a an humugi cen magira naɗi.

⁵ Laa mayra an miniɗta li ni na su? Buu ma sana a hoŋ yam gana li ni ko ndaɗta na su? Ka ni ko ndal sana gi yam ga ko nekka camba ɦawa naɗi. Agi buu kay baraw bolna may, ga duk buɗna may ni laara gaw su? Ni a buu ma ii Yawe jivina gaw su?

⁶ Laara an miniɗta ni ko wandara na. Buɗ zew yara hurugira kiyo, fokogi zew nek dlaagira cora kiyo, hin suu li sunda fokogina ki buɗiya, lassa agi las suu fokogina halaŋ hiniɗ kiyo.

⁷ Ni ana ɓorow fu ma aŋ tamma u sa ma mayra camma. Olo ni suu wi hawra zi ka kasiɗina minisi zina kasiya. Lini aŋ wi sa maa ki siili wa ni, ɦam barawna tamu. Aŋ ka njun huruŋ ki eg wayaŋŋaɗi.

⁸ Na ni kiɗik maŋga hin tak ki ko faɗta day maɗiira na. Mbil ma egeŋŋa hin cil ki ni na zak gaw. Suɗta hin tuɗ fokoŋu, bibiŋil Yawera ha ŋgorogi daganna.

⁹ Hu li ma aŋ yina Yawe hin humuŋu, lini aŋ joɓom a nam njunuŋu ni nam di ana, «An wanni.» Lini aŋ hin pan ma pan suu maŋ suu vo varaŋŋa, u ɓak ma ɓakasi u deleŋga cora kiyo.

¹⁰ Lini aŋ ɓorow fuuŋŋa u sa ma mayra camma. Lini aŋ ɦal tina maŋsuu ka lasna, ni kiɗikka hin dik ndufunda aŋ ka dukuɗ cemi wanda kiyo. Hin dla mayra kak duk ndufunda njeŋgera ki tani, aŋ mbuɗ poy ni ko hu faalira na.

¹¹ Lini ki ŋgoo bagi duk gura lay, Yawe ni sa ma goloŋŋa, nam hin hoɓoŋ hayaŋu, ɦaŋ saɓakŋa. Aŋ hin mbuɗ ni ko sene ma malamma yorokom mbona um tew tewna na. Ni ko goloŋga mbii coco ta ka soɗira na.

¹² Ni aŋ hin tok tlesuu toki ga jewna kiyo, hin min kolo kay u zi ma gi gana, ma suuna noyom ka ki day dayna, asi hin yagi ana, suu may suu min gulumun ma ɓeŋ ay ki day dayna, hoŋ mbuɗ ɦoŋzi namma kolo wili olona.

Buu ma vi Lonna

¹³ Yawe di ana, Lini agi saa kay buu ma vi Lonna jiviya, lini agi ka li paara hu buu nammaɗi, lini agi li buu namma ki teteɗ, furi kamu, ŋgaamu, ka goɓ fuli magisina oloɗi lay, ka li paa oloɗi lay, ɓak boy ma hawanaɗi lay ni,

¹⁴ hurugi hin fi dlara furira fokon, an, Yawe. An hin tiirigi segi ki hu duliyara halaŋ, agi hin furi hu ndaŋgara an ɦaɗ maŋ bugi ŋgolo Yakobpa. Di boy namma ni an, Yawe daŋ may.