EZAYI 56 - Boy Lonana

Suu vi Lonana ni njaf suuna hu halaŋ

¹ Yawe di ana, Lagi dlara jivira, tuɗugi u ɗegeera. Kay suɗ manda hin tok a fagira, ɗegee manda tak taɗ ki wa.

² Furira ka kay sa ma li ko ndaɗta nana, goŋ Adam ma vi tamma, gol buu ma vi Lonna jiviya, hum um may. Ɗoo tam ka li dla coɗi may.

³ Koy ma vi tam eg Yawena di ana, «Yawe manan ki ni kay tan zeɗ ka taɓi u suu mamsinaɗina» naɗi. Sa ma huɗum ki paɗina di ana, «Anni ko gu ma ki sooyna ɦawa naɗi sura?» naɗi.

⁴ Kay Bu Suuna di ana, lini sa ma huɗum paɗina li u buu ma vi Lona, lini nam min a li dlara hurun miniɗta, lini nam min li u dlara an daɗ maŋ suu mansina ana asi laɗura,

⁵ an hin kakam hu ziinna, hu gulumun manna, u sem ɓiiri huwa, ni nam hin fi ni dlara jivi su gorrara. Sem hin li ɓiiri kon na din din, ka bulum kiɗi.

⁶ Koyogi suu vi tasi eg Yawena, suu ka ŋgaamu, suu min a sunumma, Yawe di kasi ana, lini asi li u buu ma vi Lonna jiviya, lini asi min li u dlara an daɗ maŋ suu mansina ana, laɗura ni,

⁷ an hin tuɗusi kay ɦini manda teteɗta, an hin oyosi u furira, hu ziinda cenda. Ɓivun masi ma asi lamma an vam u furira kay ziinda asi hin yaɗ ana, zira cenda vi suuna halaŋ.

⁸ Bu Suuna Yawe ma taɓ yam suu Israelna kel tasina di ana, «Cemi an tok suuna ay ki kel tasi wa, suu hinna an hin taarasi ay ki hu olo.»

Ɓakŋa kay suu ŋgolo suu Israelna

⁹ Agi mburii suu ŋgoo bagina halaŋ mbaagi aya, mbay komogi tlena, agi mburii suu duk gurana halaŋ.

¹⁰ Suu ŋgolo suu fok suu Israelna ni suu dugina, asi ka wi yal dla na ndeɗi, asi ni digini suu ndumuna. Asi ka wi yal buraɗi lay, asi buuri ni na doyra dasiya.

¹¹ Asi ni digini suu kurufukka ka hoɓbi lay, asi tasira ni a suu taa yoorina gaw. Asi ka wi dira di ana ndagami waraɗi lay. Asi ka wi ɓorow ii tlenaɗi lay. Gegelay dukusi ni hal ni fiimma. Gegelay hal ni ɓaɗta kay tam.

¹² Gegelay di ana, mbaya an hin tuɗ ci suma, caygiya furuyuygiya, vinda hin li ni ko karamba na olo, li su ɗow.