EZAYI 55 - Boy Lonana

Suɗta ɦaɗ ki hawara maŋ gegelay

¹ Agi suu may suu laara cagina mbaagi ay eg mbona, sa ma gursu ka kombina lay mbaya, joɓogi tlesuu tira tagiya, mbay cagi sum veŋŋa u mbiira bay gussa.

² Agi bas gursura ki kay ti ma ka hoɓogiɗina ni kay mege? Gagi zamalagi ki kay tlesuu ka a hoɓogiɗina ni amege? Humugi haa, humungi vunun haa, tagi tlesuu jivina na ɗow, tlesuu a lagi tagi furira.

³ Tinigi humugi huma, mbaagi ay egenu, humugiya ni agi hin lak iiriya. An hin vi u agi ni galamba din dinda. Na daŋ may an saa tew tew kay jivira vi Davidta.

⁴ An tinimmi a sa ma diki maŋ njaf suuna halaŋŋa. Nammi sa ma saɓakŋa kom bay njaf suuna belna.

⁵ Gola njaf suu aŋ ka wasiɗina lay aŋ hin yasiya. Njaf suu waŋ ka dewɗina lay hin liŋ ay mbay egeŋu. Kay ana Yawe ni Looŋŋa. Na daŋ may ni kay ma teteɗ ma vi suu Israelna mbuɗuŋ a sa ma bibiŋilnara.

⁶ Halagi Yawe kay nam tak tam irigi wa. Yagina kay nam ka ni na tok daŋ.

⁷ Ko suu li dla cora hin dla coosira kiyo, sa ma las ndarayamma hin saa mam ndaɗta kiyo. Ko nam hoŋ ay ni eg Yawe ma ka takam ɗili mambana eg Looygina, ma bulum cora vi suuna ki halaŋŋa.

⁸ Kay ana saa manda ni ka ko saa magira naɗi, voɗ manda lay ni ka ni ko voɗ magira naɗi. Yawe di na ni namu.

⁹ Huulona ki kolo day eg ndaŋgara, ni na may voɗ manda ki kolo day eg voɗ magira, saa manda lay ki ni day u saa magira.

¹⁰ Ko ndal mbo lona si ay kaŋga kay ndaŋgara, ɗowba dlaŋmagina siya, nam ka hoŋ kolo ɦawa bay laɓ yam ndaŋgara kiɗi, ka hin bay day ii tlena kiɗi, ka hin bay ɗuf hum tlenaɗi lay, ka hin bay a ɦal njaf tlena ka maŋ sa ma zaarasinaɗi, ɦal tina maŋ sana a tira lay.

¹¹ Boy manna ni ko ndaɗta na may, hu li ma nam kal ay ki fununna. Nam ka hoŋ ay egen bay li vaɗi, ka hin bay li dlara an miniɗta kiɗi. Kay ndaɗta an dammi na.

¹² Na daŋ may agi cuk ki ni u furira, agi hin tuɗ ni u heɓpa, ɦinira u li ma mbuy kolo dayna hin ko kosi li furira ha fokogiya, ŋgusugi suu bagina lay hin ko kasiya.

¹³ Wayra hin dlara day hu liigina tani, day ni ŋgusugi suu ŋgolona, usu ma cona ka day hu sene maginaɗi, day ni mbitl mayra his jivira. Tle asina a tak ki ni ŋgolla bibiŋilla vi Yawera. Ni dlara a tak ha ki na gak gak ka daɓ kiɗira.