EZAYI 54 - Boy Lonana

Yawe ka hin Yerusalem ki oloɗi

¹ Yerusalem aŋ sa ma goo ka koŋ oloɗina furiya, aŋ sa ma vuɗ goo ka dewɗina, cemi ni aŋ oo uŋ kolo u sawalla furira. Kay Yawe daŋ ana, aŋŋi ko ca mayra njufuɗ noyoɗ kira na, cemi ni goo ka koŋgi, mbuɗ ni cara njufuɗ miniɗ coco ɦayra.

² Ҥuɗ hay mbutluɓ maŋŋa ki dagan huwa, min lii buu ma daŋŋa keŋ hu olo maɗ hay zew maŋŋa kiyo. Pi u guna ki kaŋga jiviya.

³ Kay suu maŋsina hin njay ha ki ni ɓik njuf lay, ɓik gulu lay. Njaf suu maŋsina hin tli li ma vi njaf suu daŋŋana ki lay. Ҥoŋzi maŋ ma ki ko ŋgoo bagi nana suuna hin zul ki huwa.

⁴ Li ndaaɗi, kay dlara zolo ka faŋ oloɗi. Li zoloɗi kay sa ma ndak a panaŋ ka oloɗi. Aŋ hin maa zolo ma laŋ ay u goo taŋŋa kiyo, humuŋ hin maa dono maŋga ay jewra ki lay.

⁵ Kay sa ma mbuɗ tam a njufukŋa sem ana Yawe, ma Saɓakŋa Kom Belna, ma Teteɗ ma vi suu Israelna, ni sa ma buɗuŋ ay kina. Yam ana, Lo ma kay ndaŋgara belna.

⁶ Agi suu Israelna ni ko ndal cara njufuɗ hiniɗ kira na, huruɗ ki ɓeŋi cocoo. Cemi ni Yawe ka yagi olo di ana, cara aŋ ɗumuɗ u zoŋ taŋga aŋ hin hiniɗ ki su?

⁷ An noyogi ay ki ni kay buu nde ɦawaa, cemi ni an hoŋ vagi u furira.

⁸ U hurum ma yara an ŋgay tan ki irigiya day hu buu ew. Cemi u minda ka daɓ kiɗira an tak tan ki irigi wa, wagi ha hawagi wa, di ni Yawe ma buɗugi ay kina.

⁹ Ay hu li ma vi Nowa na ni an suu tan ki ana an ka ɓalak lina ki u mbona oloɗi. Ko ndaɗta na may cemi an suu tan ki ana an ka gaɗagi u yaanda na oloɗi.

¹⁰ Lini ɦinira jok uɗ ki hin liiɗ ka lay, lini lii kolo mbuyna geŋeɗ lay, bana manda u agira ka jokgi. Galam manda vaɗ u agira ka bulum kiɗi. Galam manda an ɦagi heɓpara ka daɓ kiɗi. An daŋ boy namma ni an daŋ may, an Yawe hurun oy u mind tew tew.

Yerusalem ta wilira

¹¹ Bu Suuna di ana, Yerusalem ndak wi hawra cocoo, babaana hawaɗak ki lay, sa ma ɗilik irik kaɗi lay. Gola an min minik gulumun makŋa kolo kay ɦinira gus loɓ cocora. An gam um ga u ɦinira yaɗ ana safira.

¹² An min fiyek gulumuna kolo ni u ɦinira yaɗ ana rubissa. Vun grekŋa ni u ɦinira taɗ weleɗta, ŋguyum yam ki halaŋ u ɦini mayra gus loɓ cocora.

¹³ Goryoŋ halaŋ hin mbuɗ ki ni a suu haɗi mansina. Asi hin lak ka u heɓpa na gak gak.

¹⁴ Aŋ hin kak eŋŋe va ma ŋgeneŋ kaɗi. Aŋ ka li ndaa ko suu babali maŋsina oloɗi, aŋ buɗ ki wa ko dlara laŋ ndaana, ndaɗ ka laŋ va oloɗi.

¹⁵ Lini suu mba ndaŋ ya lay ni col ay ka konɗi, gegelay ma mba ndaŋ yarana hin puk kaŋga fokoŋu.

¹⁶ Aŋ gol gige, sa ma gi u caffa ay kina ni gege? Ni ka anɗi su? Sa ma ka bu vugumma dli kawina zeɗ zeɗna. Na may an hin tli sa ma ɓalak kawi namma kina ni an lay.

¹⁷ Kawi ma asi dlam a laŋ hawra u namma halaŋ ka ndak a laŋ vaɗi. Suu may suu ka di dlara kaaŋ ɓakŋa kaŋga halaŋ aŋ hin su kasiya. Gola ni dlara an, Yawe, a laɗ kay suu man suu sununara. Dla ndaɗta daɗ kasi ni an Yawe daŋ may.