EZAYI 52 - Boy Lonana

Lona buɗ Yerusalem kiwa

¹ Dliɗ ki koloo Yerusalem, cuk saɓak maŋŋa egeŋu. Cuk baraw maŋ ma dlam ŋgolna egeŋu, Yerusalem ɦoŋzi ma teteɗna, kay hin ha fokka ni suu bay caw ɗiwisina u suu ka wi Lonɗina ka fi va huruŋ oloɗi.

² Col ki koloo, po gugumma ki egeŋu, Yerusalem aŋ buɗ ay ki hu daŋgayna wa, agi suu Yerusalemma halaŋ buɗugi ki wa.

³ Yawe di ana, asi gusugi ha ni ɦawaa, agi hin hoŋ ay vo ni ɦawa bay gursu may.

⁴ Bu Suuna Yawe di ana, fok jewra ni suu mansina ay ki mbabura hu Egipte, ŋgoo dagan suu Asirina lasasi bay u boyna.

⁵ Cemi ni va ma an famma ni mege? Asi yowon suu mansina ha ki ɦawaa, asi lasasiya, suu mansina ka tiira, asi ka ti u senu, suuna ka panan senu. Yawe di na.

⁶ Cemi ni suu mansina hin wan sen kiyo, asi hin wi ki ana an ka ni ko jewra na, ma di ay ki ana, an wanni na.

Bu Suuna hoŋ ay Yerusalem

⁷ Jivi coco kay hum sem sa ma di boy ma ayra tuɗ ay kolo kay ɦinira. Nam mbaaraygi ni heɓpa, mba day dlara jivira u suɗta. Nam daŋ ana, «Yerusalem, Looŋŋa ni mulna.»

⁸ Hum del suu maŋsuu aŋ cukusi a juɓ u lina, asi ka sawalla furira, kay asi wi Yawe ki u irisiya, nam hoŋ ay hu Yerusalem.

⁹ Gagi soolla furira agi suu Yerusalemma halaŋ suu las ayna, kay Yawe ɗil ii suu mamsina wa, nam suɗ Yerusalem ki wa.

¹⁰ Yawe tak kom ma teteɗna ki fok njaf suuna halaŋ. Suuna hu duliyara halaŋ wi ki ana Lona suɗ suu mamsina ki wa.

¹¹ Tuɗugiya, tuɗugiya, cukugi kiyo, hinigi li ma njenjena kiyo, lagi tagi ki teteɗ, agi suu zii tlesuu teteɗ suu vi Yawena.

¹² Agi cuk ki ni ka u liŋŋa oloɗi, agi ka tuɗ u ndaanaɗi lay kay sa ma tuɗ fokogina ni Yawe. Sa ma ha ŋgorogi daganna ni Lo ma vi suu Israelna.

Wihawra vi sa ma sun Lonna

¹³ Bu Suuna di ana, saan ma sunda suuna hin ŋgaamu, dlara nam a laɗta nam hin faɗu.

¹⁴ Suu daŋŋa wam na ni hin li ndaana kay tam jok ki zeɗ, nam tli tam ka u sa warɗi. Nam tli tam ka u goŋ Adambi lay.

¹⁵ Ko ndaɗta na njaf suu daŋŋa mbuɗ lagira na jim kay dlaamba. Mulina ka wi dlara asi daɗtaɗi lay. Kay dlara asi waɗta su ki kay dlara asi cuɗusira jewra. Asi gol dlara asi humuɗ ka jew ɗira.