EZAYI 49 - Boy Lonana

Kiɗikka kay njaf suuna halaŋ

¹ Humungi vunun haa agi suu kay daarna, humugi haa agi suu ha ki dayna. Yawe yan ay ni hu li ma an ka huu sun tuna day. Ay bay vuɗ ki tu lay ni, nam yan ana zoŋ mamma.

² Nam lan vunun ko ŋgew ma siina na. Nam ŋgomon ga u ŋgus komu, nam ŋgomon ko mbuuru mayra cuki hu guuruɗ siiɗ zalira na.

³ Nam dan ana, «Aŋ Israel saan ma sunda, an hin tak bibiŋil manda ki ni u aŋu.»

⁴ An may ni hin ɓak tan ana, «An loɓ tan ki ni ɦawaa, an ba lina ki egenni ɦawaa, fi va ka huɗi. Jivi manda ni Yawe dew, warak manna ha ni ko Loonna.»

⁵ Cemi ni Yawe ɓak wa, nammi sa ma minin ay huu sun dayna, mbuɗun ki a sa sunumma, kay a hoŋom njaf suu vi Yakobma ay egemu, kay a taɓ yam suu Israelna kay tasi u mamu. Cemi ni an mbuɗ ni sa ma ii Bu Suna jivina. Saɓak manna ni nam Lona.

⁶ Nam dan ana, «An yaŋ a saan ma sunda ni ka kay a mbaa njaf suu vi Yakobma, a suɗ ki ni suu Israelna holɗi. An manaŋ ay ki ni a kiɗikka fok njaf suuna halaŋ. Kay ana suɗ manda li ha ki ni kay yam mbassa halaŋ halaŋ.»

Suu ay ki ŋgayrana hoŋ ay voo

⁷ Yawe di ana, sa ma buɗ suuna kina, ma Teteɗ ma vi suu Israelna, nammi sa ma suuna noyom kina, suuna halaŋ golom ko sa ma puluɗiina na, lasam cocoo. Mulina hin wam wa ni hin yow kolo fokomu. Ni kay Yawe ma ɗegeena. Ni kay ma teteɗ ma vi suu Israelna ma manaŋŋa.

⁸ Yawe di ana, hu li ma oora ni an humuŋ cen maŋga. Hu buu ma suɗta ni an mbay njun kaŋu. An goloŋ ŋgayaŋ ki vay daŋ zeɗ. Aŋŋi a galamba an vaɗ u suunara, a aŋ min yam mbassa halaŋ. A aŋ ɦal ɓorow ma vi njaf suu ay ki njayna may.

⁹ A di suu ka hu daŋgaynana ana, «Selegi ay kiyo.» Suu ka duk ndufundana tak tasi ay ki kiɗiki. Asi mbuɗ ni ko yoori suu ka taarasi hu li ma haɗ ma jivina na, ka fi tiisina halaŋ.

¹⁰ Suu asina may ka casi oloɗi, laa ka lasiɗi lay. Sa ka poŋosi oloɗi. Faɗ ka ŋgalasi sesi oloɗi lay kay sa ma hurum haɗ kay suuna cocona ka taarasi ni namu, nam tuɗusi ni fun mbo ma jivina asi ci kay laa masira.

¹¹ Kay yam ɦinira halaŋ an hin wak voɗ bulna ki huwa. Voɗ manda hin mbuɗ ni voɗ ŋgolora kay ndaŋgara halaŋ.

¹² Ay day lay ni suu mansina ka tuɗ ay huwa, suu daŋŋa col ay mbayawi, suu hiŋŋa ay u fiɗigina, suu daŋŋa col ay hu mbassa Sinimba may.

¹³ Huulona gi soolla furira, ndak ndaŋgara li furira, agi ɦinira saagi walla furira may. Kay Yawe so u suu mamsina wa. Suu mam suu yasi li homi kaŋgana nam wasi hahawasi wa.

An may ni ka maa ki kaŋgi

¹⁴ Siyon di ana, «Yawe maa ki kan wa, Yawe noyon ki wa.»

¹⁵ Cara ndak a maa goroɗ ma ci pona ki su? Huruɗ ka haɗ kay goroɗ ma huruɗnaɗi su? Lini cara maa ki kay goroɗ lay ni, an may ni humun ka maa kaŋgi.

¹⁶ Gola an ɓiiriŋ seŋŋi hu duk konu. Ziiŋ ma minina ka fokon buuna tew tew.

¹⁷ Suu miniŋ ziŋŋa ka ɓaɗ tasiya, suu min a tooŋ ziiŋ ki gana cuk ki bunsuwa.

¹⁸ Gol li ma ŋguyuŋŋa halaŋ, asi tok tasiya ka mbay egeŋu, ko an Yawe, an ka iiri tew tew, an suu tan ki ana, asi hin lak egeŋŋi ko ndal baraw ma cuki taŋŋa na, ni ko gandi ma njuni huruŋŋa na.

¹⁹ Na daŋ may mbas maŋga ki ɓalakiya, suuna ka hu ŋgolɗi lay. Tuɗ fok nde ni, mbas ndaɗta hin mbuɗ goora, suuna ka fi li ma cuk zinaɗi lay. Suu gaŋaw maŋsina halaŋ hin njay kiyo.

²⁰ Suu maŋsina mbuɗ ɓak humuŋ ana, «Li ma ami laki hu wanna ka ndakamiɗi, halami li ma daŋ a ami cuk ki huwa.»

²¹ Aŋ hin ɓak taŋ huruŋ kurufu ana, «Suu asina sana vuɗunsina ni gege? An jew ni goo ka konɗi, an ka vuɗɗi lay. An ay ki ŋgayra duk suu daŋŋa, suu ca asina sana wulusi ni gege? Gola an ay kagi ni u dew tanu. Suu asina ay ni arage?»

²² Bu Suuna Yawe di ana, An hin tli kon kolo tak dlara maŋ njaf suuna halaŋ, asi hin hoŋogi goryogi aya, yowosi ay kosi koloo, gorɓii magisina asi hin kakasi ay kelesi koloo.

²³ Mulina hin mbuɗ ni a suu haɗagina, gorɓii suu vi mulinana hin mbuɗ ni suu wulugi goryogina. Asi hin goɓ vogosi ga halaŋ goɓ fokoŋu. Asi hin tanaɗ gugum ma ŋgoo seŋŋa ki u sinisiya. Ni aŋ hin wi ki ana anni Yawe. Suu tin hurusi kanna ka mbuɗ zoloɗi.

²⁴ Suu saɓak suu suuna yowosi ha fun duunana hin cukusi ki su? Muli suu asi vasi ha fun duunana hin cukusi ki su?

²⁵ Na daŋ may Yawe di ana, Suu saɓak suu suuna yowosi ha fun duunana hin cukusi ay kiyo. Muli suu asi vasi ha fun duunana hin cukusi ay ki lay. Suu li honira u aŋŋa an hin li u asi ni anu. An hin suɗuŋ goryoŋ ki ni an lay.

²⁶ Suu lasaŋŋa an hin ɦasi tliwisi asi komomu, asi hin guruɗ u busuusi ko ndal suuna guruɗ u summa na. Suu warna halaŋ hin wi ki ana sa ma suɗuŋ kina ni an Yawe. Sa ma buɗun ay kina ni Lo ma vi Yakob ma Saɓakŋa Kom Belna.