EZAYI 48 - Boy Lonana

Yawe di ki kay dlara ha fokka

¹ Humugi haa, agi suu vi Yakobma, agi suu yi tagi ana suu Israelna na. Agi suu njaf ma vi Yudana. Agi suu suu tagi u sem Yawena. Humugi gagi a suwa kay sem Lo ma vi suu Israelnana. Na may agi ka laɗ u gasiraɗi, ka u ɗegeeraɗi lay.

² Agi yi tagi ana suu hu ɦoŋzi ma teteɗna. Agi suu deŋ tagi eg Lo ma vi suu Israelna ma yam ana Yawe, ma Saɓakŋa Kom Belna.

³ Dlara li fok jewra an di ay ki kaɗ ni fok jew day day. Boy namma kal ay ki ni funun daŋ may, an dagi agi humum kiyo, na gaw ni dla ndaɗta li wa may.

⁴ An wi ana agi yagi eŋ cocoo, delegi ki sooyra ko ndal kawina na. Vogogi eŋga ko kawi ma tlawna na.

⁵ An dagi dla ndaɗta ay ki ni fok day. Jew bay dla ndaɗta mba lay ni an dagira ay kiyo. Ni kay a agi wi ki ana dla ndaɗta laɗ ni an daŋ may, ka fulɗi, foto magi ma agi goɓomma di dla ndaɗta ka ni nambi.

⁶ Agi hum dlara di ay ki jew ndaɗta, waɗ ndaɗ li ki u irigi lay. Agi may ni ka di ki kay dla ndaɗtaɗi su? Cemi ni an takagi tlesuu wilina ni suu ay ki ŋgay agi wasi ka tuɗina.

⁷ Tle asina lasi ni wan daŋŋi, ay ka fok jew dayɗi. Hu gijaŋ masina ni agi wasi ka tuɗi, ka sa di ana ami wasi ay ki jeweɗi.

⁸ Gasi daŋ may agi humusi kaɗi. Gasi daŋ may agi ka wasiɗi. Gasi daŋ may ay jew day day humugi ay ka ki maliɗi. An wi ki gasi ana agi ni suu ŋgeŋŋa, ay hu sugi day suuna yagi ana suu ci maɗna.

⁹ An vi yaan ga ni kay sen ɦawaa, an vi tanni kay ŋgol manda bibiŋilla. An ka min bulumugi ki hu duliyaraɗi ni kay sen ma yina ɦawaa.

¹⁰ Gola an mbuɗugi ki teteɗ ni ka ko suuna yoo doonora naɗi, an mbuɗugi ni u lassa.

¹¹ An li dla ndaɗta ni u min manda daŋ may. An ka min a sa panan senɗi, an ka ɦal ŋgol manda ki maŋ saɗi lay.

Yawe buɗ suu Israelna kiyo

¹² Humungi vunun haa, agi suu Israelna, agi goryoŋ Yakobma, agi suu an yagina, anni Lona, anni ma ay jew dayna, ma daɓ daganna lay.

¹³ Na daŋ may, kon li ndaŋgara ni namu, kon ma njufna li huulona ni namu, lini an yasiya ni asi mbay fokonni na zak gaw.

¹⁴ Tokogi ay halaŋ humugiya, duk tlesuu agi ŋgaasina halaŋ sa ma di dlara ko ndaɗta nara ni gege? Sa ma Yawe minimma ma nam manamma hin li dlara ndaɗta ni namu. Nam hin faɗan vun dlaanda ay ki hu Babilon duk njaf suu Kaldena.

¹⁵ An di ni an daŋ may, an yammi anu. An mbaaram ay wa, dlara nam mba kaɗta hin li kiyo.

¹⁶ Ҥuɗugi tagi ay egenu, humugi haa, ay hu gijaŋŋa day an di dla taa ka ki ŋgay gumunɗi. Hu cokira dla ndaɗta lira ni an kaa. Cemi ni Bu Suuna Yawe, sunun ay u Musuk mamba.

Dlara Yawe ŋgaaɗ kay suu mamsinara

¹⁷ Gola Yawe magina, ma teteɗ ma vi suu Israelna di ana, anni Yawe, Loogina, an haɗagi ni dlara lagi jivira, an tinigi hu voɗta agi tuɗ hura.

¹⁸ Lini agi hum ay u gaɗ manda ni, heɓpa li kagi ni ko ndal mbo lumma na. Ɗegee magira tak ki ni ko mbo ma ɓatna na.

¹⁹ Njafagi hin zul ni ko ŋgetlna na, asi hin mbuɗ ni ko ii ŋgetlna zuli wanda na. Sesi ka viɗ ki irinɗi, na may agi hin li ka u gaɗ mandaɗi.

²⁰ Cukugi ay ki duk suu Babilonna, liŋigi ki ko suu Kaldena. Della ka ɓak aya, dasira ha ki u furira, jokogi boy namma ha ki kay yam mbassa halaŋ, dagi ana, «Yawe buɗ zoŋ mamma Yakob ay ki wa.»

²¹ Hu li ma nam cukusi ay ki ŋgoo bagi hu fulla ni laa casi ka voɗɗi lay, nam lawasi mbona ay ki duk ɦinira. Na daŋ may, nam wak ɦinira kiyo, mbona ɓaɗ ay ki huwa.

²² Yawe di ana, paɗvun namma ka kay suu bay wi Lona koɗi.