EZAYI 47 - Boy Lonana

Kaɓak ma kay Babilonna

¹ Agi suu Babilonna wagi hahaw magira, hin dlamba mulla lakagi ki ga duk buɗna. Babilon ay jew ni ko goo wayra jeŋiira na. Suuna ŋgaam ana zi ma jivina, cemi ka na olodi.

² Tuɗ tli ɦinina luɗ fuɗ maŋga kay taŋu, ɗuɗ gojoli ma boɗi kaŋŋa kiyo, ɗuɗ baraw maŋŋa ki kolo, hin gayaŋ ki ha wa a taɓa lumma.

³ Suuna waŋ gandala maŋga kiyo. Suuna waŋ dlaaŋga aŋ laɗ ki ŋgay gumunda kiyo. Cemi ni an sa ki ni sukulna. An ka caa yan a hum boy ma vi saɗi lay.

⁴ Sa ma buɗumi ay kina sem ana Yawe, ma Saɓakŋa Kom Belna, ma Teteɗ ma vi suu Israelna.

⁵ Bu Suuna di ana, Babilon seŋ taŋ na yerek yerek di vaɗi, kal duk ndufun maŋga, kay aŋ ka ndaki a yaŋ malaŋ mulinaɗi a aŋ ti kasi oloɗi.

⁶ An hurun ɓeŋ ay eg suu mansina, An mbuɗ suu mansina ki zolona. An hiniŋsina ki aŋ lasasiya. Aŋ wasi hahawasi ka na ndeɗi lay. Aŋ las suu maarina lay, golosi kaɗi.

⁷ Aŋ ɓak taŋ ana, «An hin a ti mulla kasi ni a fafaɗta,» dlara li coco wanda aŋ saa ka huruŋ kaɗ na ndeɗi lay, saa ka ana boy li hin mbuɗ dagan kalageraɗi lay.

⁸ Cemi aŋ hum ha ɗaŋ, aŋ sa ma kaki jivi en, furina, aŋ ɓak taŋ ana, «An dew ni anu, sa ma daŋ kaɗi, an ka ndak a hin li donoɗi, goryon va ka lasiɗi lay.»

⁹ Tlesuu mba' asina a mbay kaŋŋi cem cem, goryoŋ hin ba ki lay, aŋ hin hin ki donora lay, asi hin ba ni hu buu ma dewna. Lini aŋ ka min taŋ maŋ coco lay ka ndakgi, gari maŋga u kumuna ki ni ɦawaa.

¹⁰ Aŋ tin saa maŋga kay tlesuu aŋ lasina, di ana, «Sa ma wan kaɗi.» Aŋ ŋga taaŋ mayra ana aŋ wi cocora u haɗ maŋga tuɗuŋ ki ni hu li ma aŋ ba kina. Aŋ di ana, «Anni an dew sa ma ko an na kaɗi.»

¹¹ Gola dlara yoora ŋgolla hin mba kaŋu, ni ta aŋ ka ndak funuɗira. Tuguɗii bona hin ndi kaŋu, aŋ ka ndak a hoŋoɗ ki dagan u tlesuu aŋ ɦasinaɗi. Na daŋ may hin mba kaŋŋi dlara aŋ saa ka gin kaɗ naɗira.

¹² Col kolo tin gari maŋga ɗaŋgi su, hal suu maŋ suu masira suu aŋ loɓ taŋ ay u asi u goo taŋ dayna, kala asi li ndak a suɗuŋ ki kalage, kala aŋ ndak a mbuɗ suu duuna ndaa su.

¹³ Aŋ loɓ taŋ coco u suu ka daŋ gaɗtana, asi mbay suɗuŋ ki daŋgi su? Suu gol dlara ay huulona, suu wi dlara u ciciwra, asi mbay njun kaŋ daŋgi su? Suu di dlara u til ma day wilina tew tewna mbay daŋ.

¹⁴ Suu asina mbuɗ ni ko usuna na, kura hin ŋgalasi kiyo. Asi ka ndak a suɗ ki ko ku ndaɗtaɗi. Ndaɗ ni ka ko kura suuna ŋgalaɗ lak funuɗ a holla hawa naɗi.

¹⁵ Gola suu maŋ suu kumuna hin ba ki ni ko ndaɗta na, suu maŋ suu aŋ loɓ taŋ kasi coco asina. Asi suu daɓaŋ tlegeyeŋ ki tin ay u goo taŋ dayna. Agi halaŋ sa ma suɗ ki dew kaɗi.