EZAYI 46 - Boy Lonana

Loogi suu ɦawa suu vi suu Babilonna u Lo ma gasina

¹ Lo ma yam ana Belna mbuɗ ki maŋiya, lo ma yam ana Nebona hoŋ yam ki ga wa. Foto masina mbuɗ ki ni kay yoorina ɦawaa, suu ziirisina asi mbuɗ casi nekka. Yoori asina loɓ ki wa.

² Loogi suu mbuɗ ki maŋi hoŋ yasi ki gana, ka ndak a njun kay foto masina oloɗi, asi tasira lay suuna yowosi ha ki hu mbassa daŋga lay.

³ Agi suu Israelna humungi vunun haa, agi njaf Yakob suu hin ka iiri ndena. Agi ni suu an gologi ay hu vuɗ magira dayna. Agi ni suu an tlagi kon gaw hu li ma agi vuɗ ay kina,

⁴ ta ta hu maa magira lay an u agi ni ko ndaɗta na, ta ta hu li ma tlimiɗ yagi mbuɗ haɓpa lay, an ziirigi gak gak, An ni sa ma njun kagina. Anni sa ma ka ziirigina, Anni sa ma ka sipma, buɗugi ay kina lay.

⁵ Agi hin ŋgaanni u gege? An tli tanni u ge daŋge? Sa ma tli tam ko ndal an nana ni gege?

⁶ Suu daŋŋa ɓalak lorra ki yooroɗu yow doonora ŋgolo tlam kelewem lay. Yoo loogi suu ɦawana ki u namu. Asi hoŋ yasi gaa, goɓ fokomu.

⁷ Asi tasira hin ziirim kelesi ni asi tok lay. Asi tinim hu li ma nam koɗ tamma ni asi lay. Nam hin sami ni hu li ma dewna ka jok umbi lay. Sana yam kolo lay ni nam ka humbi lay. Nam ka suɗ sa hu hahaw mambaɗi lay.

Buɗta buɗuŋ kira ka dayɗi

⁸ Humugi gagiya, agi suu babalira, lagi tagi jiviya, ɗiligi irigiya.

⁹ Humugi gagi kay dlara li ay ki fok jewra. Na daŋ may an ni Lona, Lo ma daŋ kaɗi. Va ma ŋgaa ko tam u an Lona kaɗi, tlena halaŋ ki ni ɦawaa.

¹⁰ Ay hu gijaŋŋa day ni an di dlara, an min a laɗta ay kiyo. An di dla mayra hin a lira, ta bay sa waɗ tura ay ki jewe. An di ana gola dlaanda hin li ni na, ndaɗ hin li ki may. Dlara an miniɗta halaŋ an laɗu.

¹¹ Ay u faɗta maɗiira day An yi bakŋa ay kay ɦaana. Ni sa ma hin lan dlaanda an min a laɗta kina. An yam ay ni hu mbassa dayra. Dlara an daɗta na zak gaw ni ndaɗ li may.

¹² Humungi vunun haa, agi suu yagi kaɗina, agi suu may suu ka min dlara ɗegeeraɗina.

¹³ Dlaanda an a laɗ kira hin ka day oloɗi, hinni na tok daŋ. Buɗta kira ka day oloɗi, an mba buɗ mbassa Siyonda ki ni u tanda. Na daŋ may suu Israelna an hin ɦasi bibiŋil manda.