EZAYI 45 - Boy Lonana

Sirus ni sa ma Lona a tak dlaamba ki u namma

¹ Yawe di saam ma Lona fuurumma ana, Sirus ni mul ma Bu Suuna manamma. Nam vam kom ma njufna koloo, njaf suuna halaŋ cuk kaŋga fokomu. Mulina halaŋ malam vun kaana ha ki fokomu. Yawe di ana,

² An ka tuɗ fokoŋŋi u tanda, ɦinira kolo dayra an kaaɗ kiyo, kawi ma ki caki voɗna an kusum kiyo. Vun zi ma duki u kawinana an kusum ki lay.

³ Begera ka ŋgay hu li ma ndufunna an hin ɦaŋga kiyo, ɦiz mayra faɗ ka u voɗoɗɗira halaŋ. Ni aŋ hin wi ki ana anni Yawe ma yaŋ ay ki u seŋŋa, Lo ma vi suu Israelna.

⁴ Ni u min mayra an min Yakobpa, Israel saan ma sunda an yaŋ u seŋu, An ŋgaɓaŋ ay kiyo na may ni aŋ ka wanɗi.

⁵ Anni Yawe, sa ma daŋ ka ko ndal an na kaɗi. Ni an dew daŋ, lo ma daŋ kaɗi. An ɦaŋ saɓak ma namma lay ni aŋ wan kaɗi.

⁶ Ni kay a suuna wi ki ana col ay u maɗiina ta ta u fiɗigina ni sa ma daŋ kaɗi ni an dew daŋ. Anni Yawe, sa ma ko ndal an na kaɗi.

⁷ An li kiɗikka ni anu, ndufunda laɗ ni an lay. An mba furira, hin mba hahawra ni an lay. An Yawe li dla ndaɗta halaŋŋi anu.

⁸ Huulona ay kolo day si mbona ay gaa, ɗugulla si ɗegee maɗta ay ga ko mbona na. Ndaŋgara mal ki a suɗ suuna, ndaŋgara vi saɓak namma a day tlena halaŋ u jivira. An Yawe li tle asina bel ni anu.

Luɓuna u sa ma minimma

⁹ Hahawra ka kay sa warna, nammi doyna ɦawaa, nam ka ndak a ci way u sa ma lammaɗi. Luɓuna ndak joɓ sa ma minimma ana, «Aŋ li na ni mege?» na su? Nam ka ndak di sa ma minimma ana, «Aŋ ka wi mindaɗi,» naɗi lay.

¹⁰ Hahawra ka kay sa ma di bum ana, «Aŋ vuɗun ki na ni kay megena?» Ɗowba di sum ana, «Ndak vuɗun ki na ni kay megena?»

¹¹ Yawe ma Teteɗna ma vi suu Israelna di ana, agi hin joɓon kay dlara an a laɗ kay goryonda su? Agi hin takan dlara an a laɗta ni agi su? Ҥawaa.

¹² Anni sa ma min ndaŋgarana, cuk tlesuu iirina kaɗ ni an lay. An li huulona kolo ni u bik kon lay. Suu kolo huulonna halaŋ an golosi, ɦasi gaɗta ni anu.

¹³ An u ɗegee manda buɗ sa ma agi wam wanna ay ki ni anu. An hin minim voɗta ha ki fokom halaŋ. Nammi sa ma hin minin ɦoŋzi man ma Yerusalemma kolona. Nam hin cuk suu ay ki ŋgayrana ay ki ni ka u warakgi lay. Yawe ma Saɓakŋa Kom Belna di na.

Suu Israelna Lona ka varagiya

¹⁴ Yawe di suu Israelna ana, sunda suu Egiptena laɗta, u warak ma vi suu Etiyopina u suu may suu ay hu ɦoŋzi ma Sebana, suu wuli fiyeki cocona, halaŋ ca ni hin mba ki varagiya. Asi hin cuɗugi ugi ni u galina cuki sesiya, asi hin goɓ ga fokogiya, cenegi di ana, Lo ma daŋ ma ko magina na kaɗi, aragelay kaɗi.

¹⁵ Gasi daŋ may, aŋŋi Lo ma ay ki ŋgayna, Lona vi suu Israelna, ni Lo ma suɗ suuna.

¹⁶ Suu goɓ loogi suu ɦawana halaŋ ki mbuɗi zolona, suu ceɗ loogina halaŋ suuna ka ŋgulusiya.

¹⁷ Yawe suɗ suu Israelna ki ni namu. Suɗ ndaɗta hin ha kasi ni na din din. Agiya zolo ka kagiɗi, ŋgul kaɗi lay, ha ni a fafaɗta.

¹⁸ Yawe li huulona ni namu, nammi Lona, nam li ndaŋgara ni nam lay. Nam laɗ ni hini yaɗ ka ki ɦawaɗi, ni kay a suuna cuk zina kaɗu. Nam di ana, anni Yawe, sa ma daŋ ma ko ndal an na kaɗi.

¹⁹ An njaɗ dlara halaŋŋi ka ki ŋgayɗi, njaɗaɗ ka ki hu li ma ndufunɗi lay. An di njaf suu vi Yakobma ka ana asi halan ha ki ni hu li ma ɦawana naɗi, Anni Yawe, an di ni dlara gasira. An di ki ni dlara ɗegeera.

Homba vi njaf suuna halaŋ

²⁰ Agi njaf suu warna suu hin iirina, tokogi aya, ko tagi dew ɦuɗugi ay egenu. Suu goɓ fuli gugunina, suu cen lo may ma ka suɗ saɗina, suu asina ki ni ɦawaa, yasi kaɗi.

²¹ Dagi boy namma ha ki maŋ suuna, vasi u dla ndaɗta kiyo, lagi tokka ko tagi dew. Sa ma tak dlara li wanda ay ki fok jewna ni gege? Ni ka Anɗi su? Yaweɗi su? Lini anɗi ni lo ma daŋ kaɗi, anni Lo ma ɗegeena, Lo ma suɗ suuna. Lo ma daŋ kaɗi, ni an dew daŋ.

²² Mbuɗugi irigi ay egenu, suɗ tagi kiyo, agi suu kay yam ndaŋgarana halaŋ kay anni Lona dew daŋ, lo ma daŋ kaɗi.

²³ An suu tan ki ni u tanda tok di ana, va ma kal ay ki fununna ni va ma gasina, an di ni boy ma sa ka guri umbina. Vun gif suuna halaŋ hin goɓ ki kaŋga fokonu, vun suuna halaŋ hin mba suu tasi ki fokonu.

²⁴ Asi hin di ki u vunusi ana, suɗta u saɓakŋa ni vi Yawe dew daŋ. Suu ŋgulunna halaŋ hin mba ki fokonu, asi hin mbuɗ ki zolona.

²⁵ U oora vi Yawe njaf suu Israelna halaŋ hin fi ɗegeera umu, asi hin ŋga tasiya.