EZAYI 44 - Boy Lonana

Bu Suuna u dew tam dew ni Lona

¹ Cemi ni humugi haa agi suu man suu Israelna, njaf Yakob, suu man suu an manasi kina.

² An Yawe, an laŋŋi anu. Ay huu suŋ day ni an laŋŋi anu. Anni sa ma njunuŋŋa. Li ndaaɗi, zoŋ manna Yakob aŋ Israel ni sa ma an manaŋŋa.

³ An hin si mbona ki hu li ma yo ka huɗina, gi mbo ma ɓaɗna hu mbas mayra yo ka huɗira. An hin fo Musuk manda kay goryoŋu. Paɗ vunun ki kay njafaŋ halaŋ.

⁴ Asi hin wul ko ndal tlesuu day hu li ma mbiira na. Ko tlesuu day fun mbo lumma na may.

⁵ Gegelay dukusi ni hin di ana, «Anni vi Yawe,» suu daŋŋa hin tin sesi ana, «Yakob.» Suu hiŋŋa hin ɓii ki hu duk kosi ana, «Anni maŋ Yawe,» yi sesi ana Israel.

Lona viɗ loogi suu cona kiyo

⁶ Yawe mul ma vi suu Israelna di ana, nammi sa ma buɗusi ay kina, Yawe ma Saɓakŋa Kom Belna, anni ma jewna, ni ma do daganna lay, ki ŋgoron dagan ni lo ma daŋ kadi.

⁷ Sa ma ko ndal an nana ni gege? Sa namma dan aya. Nam van u dla mayra ka hurumba ay ki jiviya col ay kay dla mayra an li suu warnara, di dla mayra hin li ha fokka ki lay. Ta ka mbay wandaŋga lay nam damira kiyo.

⁸ Lagi ndaaɗi, dlak tagiɗi, boy namma An dagina ay ka ki fok jewɗi su? Agi ni suu wi dla ndaɗta ki a diki kannaɗi su? Gasi lo ma daŋ ma suun ka su? A gasira ni Ҥini ma daŋ ma an wam kaɗi.

Suu min loogi suu ɦawana

⁹ Suu min loogi suu ɦawana ki ni ɦawaa. Sun masira asi laɗta ka fi va huɗi. Suu a diki kasina ka wi vaɗi lay. Zolona vasi wa asi ka wi vaɗi.

¹⁰ Yoo looŋŋa kay taŋu, min zina maŋ fulina ni laɓa me nage?

¹¹ Gola suu goɓ loogi asina halaŋ mbuɗ ki zolona, suu yoo tle asina ni suu warna ɦawaa. Asi tok tasi ay halaŋ, asi dlak ndaana mbuɗ ki zolona u dlasira halaŋga.

¹² Sa ma dli caffa ka kawina gam kuŋgu wa, dli njetna, nam waɗ kawina u saɓakamu, sunda nam laɗ u saɓakŋa nara mayra mbuɗ camu, li ni nam waɗ ka ci yoɗi ni nam mbuɗ ki maŋi cocoo.

¹³ Sa ma ceɗ guna, may ni ŋgaam ki u zewna, nam ɓii va ma nam min a ceɗemma ki jiviya, nam ceɗ guna ki ko sa warna na, lam irim u vogom ki jiviya, tinim kalafi hu zira fulina.

¹⁴ Asi ka ni gu ma yam ana sedrena, gu ɦoyna, ay ni duk ŋgusugi suu ŋgoo bagina. Asi pi gu ziitna may yo lona wulummi namu.

¹⁵ Guna ni maŋ sana a ŋgalla, nam ŋgalamu, hol tamu, nam ŋgalam a yi funa, u gu namma tok nam ceɗ lona goɓ kaŋga fokomu. Nam mbuɗum a fulna, goɓ yam ki ga fokomu.

¹⁶ Umba hinda nam cukum kay kura, zal tliw ma nam komomma u ku ndaɗta. Nam kom tliw ma cufi namma, hoɓ hayamu. Nam ɦol tam may, hin di ana, «Ha ha an hol tanu kura ka vi jivi cocoo.»

¹⁷ U gu namma olo ni nam min ful ma nam goɓomma, goɓ kaŋga fokomu. Nam cenemu di ana, «Buɗun kiyo kay loonna ni aŋu.»

¹⁸ Suu asina yasi ka li sunɗi. Asi ka wiɗi lay. Humusi ka humbi lay. Hurusi ki sooy eŋ cocoo, ka hum dlaɗi, asi ka ɓorow ii dla kiɗi lay.

¹⁹ Sa ma saa hurum ana, an li ni coo kaɗi. Sa ma di ana, «Guna an ŋgalammi an ɗowɗi su?» Kaɗi lay, «An yi funa u nammi anɗi su? An cuf tliwna u nam lay, olo u gu ma hin kon nde namma an goɓ ga ni fokom tok may.»

²⁰ Asi ni suu giniŋŋa, hurusi tini ni kay va ma ti ki buɗnana. Saa masira ka wi vaɗira, viɗisi ki wa. Asi ka buɗ kiɗi lay. Sa ma di ana, «Tlesuu kon wanna ni ganyamba ɦawaa,» kaɗi lay.

Yawe ni sa ma suɗ suu Israelna kina

²¹ Yakob humuŋ gaŋu. Israel aŋŋi saan ma sunda. An laŋŋi a sa ma sununna. Aŋ Israel ka hinin kiɗi.

²² An bulumuŋ cooŋga ki ko ɗugulla valaw kira na. An bulumugi suluk magina ki ko kuɗna valaw kira na. Hoŋ ay egenu, an suɗuŋ ki wa.

²³ Huulona koogi kogiya, kay Yawe ŋgen tam wa. Ndaŋgara furiya, ndak ɦinira li ayra, u ŋgoo bagira u gura huruɗta halaŋ furiya kay Yawe suɗ Yakob ki wa. Nam ka tak ŋgol mamba ki duk suu Israelna.

Sirs, va sunda vi Bu Suuna

²⁴ Yawe ma suɗuŋ ay kina di ana, Sa ma miniŋ ay huu suŋŋa dayna ni gege? Ni an Yawe, ma li tlena halaŋŋa. Huulona halaŋ lammi an dew. Ndaŋgara halaŋ laɗ ni an dew daŋ.

²⁵ An mbuɗ dlara mbuɗ mbuɗta vi suu kaboyna ki ɦawaa, suu may suu gol ciciwra an casi kiyo. Suu wi yalna cocona an hoŋosi ki dagani. An mbuɗusi yal masina ki a dlara ɦawara.

²⁶ An li u boy ma vi saan ma sunda, suu a dan vun sun mandana an njunusi a ndaɗ di ki u voɗoɗu. An di zi ma Yerusalemma ana, nam coli kolo balamamu. Zi ma Yudana an dam ana, ko nam hoŋ ki kolo minda suuna cuk huwa. Tlesuu ay ki hawaɗina an hoŋosi minda hu balamasiya.

²⁷ An aŋ di mbo ŋgolna ana, nam so kiyo, an min so mbo lum ma ŋgolna kiyo.

²⁸ An di Sirus ana, «Aŋŋi saan ma taaran yoorina.» Dlara an miniɗta halaŋ aŋ hin laɗ kiyo. Hin di Yerusalem ana, nam min ki kolo balamamu kay ziŋ Lonara ni ko ndaɗ col ki kolo balamaɗu.