EZAYI 43 - Boy Lonana

Ma Teteɗ ma vi suu Israelna hin suɗusi kiyo

¹ Cemi ni Yawe di ana, aŋ Yakob sa ma laŋŋa ni gege? Israel sa ma miniŋŋa ni gege? Li ndaaɗi kay An suɗuŋ ki wa. An yaŋŋi u seŋu, aŋŋi varanu.

² Lini aŋ taɓa mbona ni an ka u aŋu. Aŋ taɓa mbo lumma ni nam ka tluɓuŋgi. Lini aŋ tuɗ duk kura lay ni ndaɗ ka ŋgalaŋgi. Ndoos kura ka laŋ vaɗi lay.

³ Kay an, Yawe, ni Looŋŋa, ma Teteɗ ma vi suu Israelna ni saaŋ ma suɗuŋŋa. An ɦal suu Egiptena ki a mbuɗuŋga. Suu Etiyopina u suu Sebana varak ki ni kay seŋu.

⁴ Kay ana aŋ irinni dlaŋ ŋgol cocoo, aŋ irin jiviya, an miniŋu. Kay ndaɗta an ɦal suu daŋŋa ki a mbuɗuŋga, suuna bolowo ni kaŋ aŋ dew.

⁵ Li ndaaɗi kay an ka u aŋu. Col ay u maɗiina day an hoŋoŋ njaf suu maŋsina aya. Ay u fiɗigina day an tokogi yagiya.

⁶ An di mbayawra ana, «Ҥansina aya,» di dalira ana, «Vasi haɗi.» Goryon suu ay ki hu mbassa dayra hoŋonsina aya, u goryon suu tamagina suu ay hu vun ndaŋgara dodora bel bel.

⁷ Suu may suu yan u senna halaŋ, an lasi ni kay a asi ŋgaan senda.

⁸ Lona di ana, mbarangi suu mansina ay ki fun ɓakŋa. Asi suu irisi ka may, ka wiɗina. Humusi ka may, ka humbi lay.

Suu Israelna ni suu di ki kay Yawena

⁹ Ko suuna kay yam ndaŋgara halaŋ tok tasiya, suuna halaŋ tokka. Sa ma dukusi ma di dlara hin li ha fokka kina ni gege? Sa ma dukusi ma di ay ki jew kay dlara ka li karam wanda ni gege? Asi mba col saasi ma di ki kasina ki a ɗoɓosi dlaasira kina ki fokoygi tani, aygi humum boy mamma hin di ana ni gasira.

¹⁰ Yawe di ana, agi suu Israelna agi ni suu diki kanna, agi ni suu man suu an managina, a agi wan kiyo, tin hurugi kanu. Agi wi ki ana, anni an daŋ may. Sa ŋgol suun ay ka jewɗi, ŋgoron dagan lay sa ma suun kaɗi.

¹¹ Ni anu, anni Yawe. Bay an bani sa daŋ ma suɗ sa kaɗi.

¹² An dagi dla ndaɗta ki ni an tanda, suɗugi ki may. An dagi ki ana agi vi loogi suu daŋŋa varagiɗi. Kay ndaɗta agi ni suu diki kanna, di ni Yawe. Anni Lona.

¹³ Na daŋ may, anni anu. Va ma an damma sa ndak a buɗuna ki kon kaɗi, sa namma hin li ni gege? Sunda an laɗta sa ndak a ɓeŋeɗ kiɗi lay.

Lona suɗ suu mamsina ay ki Babilon

¹⁴ Ma Teteɗ ma vi suu Israelna, Yawe, sa ma suɗta di ana, Kay dlaagira an sun suu duuna ha hu Babilon. An kaasi kawi masi ma cuk suuna daŋgayna kiyo. An mbuɗusi furi masira ki yoora.

¹⁵ Anni Yawe, Loogi ma Teteɗna. Anni sa ma li Israel, mul maginana.

Voɗta wilira ŋgoo bagi hu fulla

¹⁶ Yawe di boy namma ni namu, nammi sa ma wak voɗta ay jew duk mbo lum ŋgolnana, gi voɗta duk mbo ŋgol ma ɓaɗ cocona.

¹⁷ Nam ba suu duuna ki u pus pus masi ma kulumina duk mbona, asi cuk goloŋ ka yow kolo oloɗi, tew ki ko ndal ku pindilla tew kira na.

¹⁸ Cemi nam di ana, saaragi kay dlara jak kira oloɗi. Gagi humugi kay dlara basiraɗi.

¹⁹ Gola an min a li ni dlara wilira ndaɗ gijaŋŋa da, agi ka waɗɗi su? Na daŋ may an min wak voɗta ki ŋgoo bagiya, an hin ɦagi mbona ha hu lay.

²⁰ Tlebagi suu ŋgoo bagina lay hin geleɗenu. Bayakka u ergetta kay an li mbona ki ŋgoo hu li ma yo ka huɗina, wak lumma ki ŋgoo hu fulla, kay a ɦal yona maŋ suu mansina, suu an manasina.

²¹ Ni suu an lasi ki manna, ni suu ka geleɗen tew tewna.

Suu Israelna li dla cora

²² Bu Suuna di ana, agi yan sen ka hu cen magiraɗi, agi suu Israelna njaf Yakob, agi cen ka kanɗi, dlara agi laɗta halaŋ laɗ ka u senɗi.

²³ Agi mbaaran timigii suu ŋgal a ɓivunna kaɗi lay, agi ŋgaan ka u ɓivun magi ma agi lammaɗi lay, an may ni ka vagi ɦal magira tinaɗi may, ka fuurugi u mbul ma his jivinaɗi may.

²⁴ Agi gus tlesuu his jivina u begera ŋgolla na ni ka manɗi, agi ka hoɓ u his mbul yoori magi suu ŋgalasina ni ka anɗi lay. Ni na ɗow u dlaagira cora agi mbuɗunni a mbaɓu magina, agi loɓon tan ki u ci maɗ magina.

²⁵ Anu, an bulumugi coogira ki wa, an ka saa kay suluk magina oloɗi.

²⁶ Takan ki dla cora an lagira egegira, njaɗaygi dla ndaɗta ko taygiya a wi ki ana gasira ni vi gegera may.

²⁷ Somoyogi suu jewna li cora aya, suu magi suu ŋgolona ci wayra u anu.

²⁸ Kay ndaɗta an mbuɗ suu ŋgolo suu li sunda hu ziŋ Lonara ki zolona. An kaɓak ma ba kina kay njaf suu vi Yakobma, an hin njaf suu daŋŋa las suu Israelna.