EZAYI 42 - Boy Lonana

Sa sunda vi Yawe

¹ Bu Suuna di ana, Gola ni saan ma sunda ma an minimma, saan ma an manama ma an furiyumma, an gi Musuk manda kamu, nam hin tak ɓak ma vi njaf suunana ki halaŋ.

² Nam ka sa ma sawal u dla koloɗi, sa ka humum dlaam ki hu garak voɗtaɗi lay.

³ Cerew ma gunina nam ka kusum kiɗi, Vun kura ka vi cocoɗira nam ka teweɗ kiɗi lay. Nam hin tak kaɓakŋa ki ni u gasira.

⁴ Nam tamba ka daɓ kiɗi, ka maŋ kiɗi lay, ta ta nam tin ɓakŋa ki kay yam ndaŋgara halaŋ. Suu ha ki day dayna halaŋ ka juɓummi haɗ mamba.

Kidikka vi njaf suuna halaŋ

⁵ Lona Yawe di ana, sa ma li huulona ni anu, sa ma beɗem ki kolo nana ni anu. Sa ma ɦal musukka huu tlesuu iiri coco kay ndaŋgara wanna ni anu. An ɦal musukŋa huu tlesuu tuɗ kaɗna halaŋ.

⁶ Ni an Yawe, an yaŋŋi u gasira, an vaŋ koŋ kolo wa, an ka goloŋu, a aŋ faɗan vun galam manda an vaɗ u njaf suu warnara kiyo, aŋŋi sa ma hin takasi kiɗikka kina.

⁷ Aŋ hin mal ii suu dugina kiyo, aŋ cuk suu ay hu daŋgaynana ki kiɗiki. Suu ay duk ndufundana aŋ hin cukusi ay kiyo.

⁸ Anni Yawe, senni na daŋ may. Bibiŋil manda an ka haɗ maŋ sa ma daŋgi. Geleɗta geleɗenda ka geleɗ ful u ndaɗɗi lay.

⁹ Dlara jewra jak wa, an daŋ ha ni ta wilira, an hin daŋ yaŋ ki jew a an hin li dla ndaɗtara.

Soolla wilira

¹⁰ Gagi soolla wilira, geleɗ Yawe, geleɗegina ta ta hu vun ndaŋgara dodora. Suu ay kolo kay mbo ŋgolnana u tlesuu duk mbona halaŋ, daara u suu cuki kaɗna halaŋ, geleɗegi Lona.

¹¹ Ŋgoo bagira u ɦoŋzi ma ka huna tlagi delegi koloo, suu hu ɦoŋzi ma gori ma Kedarna geleɗegina. Suu cuki kolo kay ɦinirana koogi kogiya gagi soolla furira. Ay kolo kay yam ɦinira asi ka sawalla furira.

¹² Ko suuna ɦal ŋgolla ni maŋ Yawe, ko suuna geleɗem ha ki kay yam daara halaŋ.

¹³ Yawe ka kal ay ki ni ko sa ma saɓakŋa na, ko sa ma duuna na, nam ka tak yaamba kiyo. Nam bay bayra eŋga, ni eg suu babali mam suu ŋga tasi u namma.

Dlara Yawe hin laɗta

¹⁴ Bu Suuna di ana, basara ŋgolo an ka di vaɗi, an vi tanu. Nam may cecem wanda, ko ndal cara ka vuɗta na, an zama, musukun yowi kolo coco lay.

¹⁵ An min bow ɦinira u li mbuy kolona ki gaa, ŋgusugi suu kaɗna an hin soosi ki lay. An mbuɗ mbo lumma ki mbasa soom kiyo, mbo ŋgolona halaŋ an soom kiyo.

¹⁶ An hin tuɗ suu dugina hu voɗta asi ka waɗɗira, tinisi irisi hu voɗta asi ka waɗɗira tuɗ u asiya. Ndufunda fokosira an mbuɗuɗ ki kiɗikka. Voɗta gunira ɗoɓoɗ ki may. Dla ndaɗta an hin laɗu, ka hiniɗɗi.

¹⁷ Suu may suu goɓ tlesuu asi minisina, gu ma asi ceɗemma, yasi a loosinana halaŋ hin mbuɗ ki zolona.

Suu may suu dugi lay ŋgeli layna

¹⁸ Agi suu ŋgelina humugi haa, agi suu dugina gologiya, wagi lay.

¹⁹ Sa ma ay dugina ni gege, ni ka saan ma sundaɗi su? Na daŋ may sa ma ŋgeli ko saan ma vun sunda na kaɗi, sa ma dugi ko saan ma vun sunda na kaɗi, sa ma ŋgeli ko sa sunda vi Yawe na kaɗi.

²⁰ Aŋ wi tlena cocoo, tin yaŋ ka kasiɗi, humuŋ ki mali a humba, hin hum va kaɗi.

²¹ Yawe u ɗegee mamba min tak gaɗ mamba ki ana ndaɗ gasi jiviya, dlaɗ ŋgolo.

²² Gola suu asina ni suu asi ɦurumusi tlegeyesi ay kina, yowosi tasira ay ki lay. Asi cukusi ki ni hu zulla, hu zi ma daŋgayna, asi mbuɗ ni ko tlesuu suu duuna ɦurumusi ay fun duuna na. Sa ma suɗusi ki kaɗi, sa ma di kasi ana, ɦansina aya, kaɗi lay.

²³ Sa ma dukugi ma hum dla ndaɗtana ni gege? Ma kak ɗili a hum dlara hin li ha fokka layna ni gege?

²⁴ Sa ma ɦal Israel njaf Yakob ki ko suuna a vamma ni gege? Ni ka Yawe ma aygi li cora egemmaɗi su? Ma aygi ka min a tuɗ hu voɗ mambaɗina ɗi su? Ni kay asi hum ka u gaɗtaɗira.

²⁵ Kay ndaɗta nam vo yaamba kay suu Israelna, cukusi suu duuna kasiya, asi ŋgufusi kura ay ki kasi halaŋŋi asi ka wiɗi lay. Ku ndaɗta ŋgalasi ni asi ka caa yasi huɗi lay.