EZAYI 40 - Boy Lonana

Lona ɗil ii suu Israelna

¹ Ɗiligi irigiya, ɗil irigiya, suu mansina, Loogina di na.

² Di suu Yerusalemma, dasi ana buu masi ma wihawra hin daɓa, dla coosira warak ki wa, an hin ɦasi warak masina u tanda, asi fi warakŋa sesi mba' mba' ko Yawe kay dla coosira.

³ Del sana sawalla ki ŋgoo bagiya, Ɗoɓogi voɗta vi Yawera kiyo, mbuɗ huruɗ kiyo, ni voɗta vi Looyginara.

⁴ Ko li ma ɦuɗugumma halaŋ tos kiyo, ko ɦini mayra kolo fiyekka u li mbuy kolona nja kiyo. Li ma kolo codl codlna mbuɗ ki li ma senena. Li ma mbuy kolona mbuɗ ki li ma ɦuɗugumma.

⁵ Bibiŋilla vi Yawera hin tak kiyo, suuna hin waɗ ki u irisiya. Tlesuu iirina halaŋ hin waɗu, ta vun Yawe ɓak kaɗta.

⁶ Della di ay ana, «Dagi ha kiyo,» ta hiŋga hin joɓ ana, «An di ni ana mege?» Suuna halaŋŋi ko uusuna na, ŋgol masira ni ko ɓo uusuna na.

⁷ Uusuna so kiyo, ɓoom yak ki may hu li ma semeɗna vi Yawe ka siina. Na daŋ may suuna halaŋŋi uusuna.

⁸ Uusuna so kiyo, ɓoom yak ki may, na may boy ma vi Bu Suuna maynana ka ni na din din.

⁹ Agi suu Siyonna ɗiŋigi ki kolo kay ɦinira. Saagi walla, dagi boy ma jivina kiyo. Yerusalem furyugiya, lagi ndaaɗi. Dagi ɦoŋzi ma Yudana, gologiya Loogina wanna.

¹⁰ Gologiya, Bu Suuna Yawe nam mbay ni u saɓakŋa, bigim ndakam ki gasi a ti mul mambara, warak mamma ka tuɗ ay ki fokom jew may.

¹¹ Ko ndal sa ma taa yoorina na, nam ka taa yoori mamsina, nam tokosi yasi ay halaŋ u bik komu. Nam yow gor timigii suu gorina kom koloo, tuɗ cukusi hu li ma asi a ci pona.

Sa ma ndaki ko Lona na kaɗi

¹² Sa ma ŋga mbo lumma hu duk komma ni gege? Sa ma ŋga fiyek huulona u komma ni gege? Sa ma tuk tam a ŋga gugum ma sii kolo wanna ni ge mayge? Sa ma tli nek ɦinira u gogoyra ŋgolora kay kelewna ɦoyna ni gege?

¹³ Sa ma ŋga musukka vi Yawe ni gege? Sa ma ndak a haɗ Lona kay dlara nam laɗta ni gege?

¹⁴ Lona li dlaamba ni gi wayra ni u ge a takam yalna nige? Sa ma takam voɗta kaɓakŋa na ni gege? Sa ma haɗam yalna u nera ni gege?

¹⁵ Njaf suuna halaŋ fok Lona ni ko mbo ma ay hu soona kay cara vunum tol ki ga dewra ɦawana. Suuna ndummi ko gugum ma cuk kolo kay kelewnana ɦawa na. Daara duk mbo ŋgolonara ni ko gu mbalna ɦawa na, nam ndak tlaɗ koloo.

¹⁶ Givin ma togolla hu Libanna halaŋ ka ndak a lam ɓivunnaɗi, ŋgusugi suu huna ka ndak a ŋgalam kuumbaɗi lay.

¹⁷ Njaf suu warna hu duliyara halaŋ fokommi ka va ma nekgi. Asi ni ko va ka kawi komɓira ɦawa na.

Lona va ma ŋga u nam kaɗi

¹⁸ Agi hin ŋga Lona ko tammi u mege? Va ma agi colom a tli tam u Lonana ni mege?

¹⁹ Fulina su? Tle asina yoorosi ni sa warna ɦawaa, suu wi dlara hoo lorra kayammi asi ɦawaa, asi yoo kawi doonora ni asi lay.

²⁰ Sa ma wihawra ma ka hal va ŋgolɗina, man mamma ni guna ɦawaa, hin hal sa ma ceɗ tlena a ceɗem loomma fokomba may.

²¹ Agi wi ka naɗi su? Agi haɗ boy namma kaɗi su? Asi dagi boy namma ay ka ki hu ura tin ay jewra dayɗi su?

²² Bu Suuna dlam mbamba mulla ka ki kolo kay huulona, nam ay kolo day wi suu warna ay ki halaŋ fokommi ko ndal horɓiira na. Nam li huulona ni ko sana a waa barawna ki gara na. Ni ko ndal mbutluɓ ma suuna vam a kak huna ɦawa na.

²³ Suu may suu ka ŋgom duliyarna nam bulumusi ki ni ɦawaa, njaf suu saɓakŋa halaŋ nam bulumusi kiyo.

²⁴ Lini asi pi ŋgusugina lay ni, boy ka huɗi, lini ŋgusugi masisina kal sariyasi ga lay ni, boy ka huɗi. Lini nam fo musukum ay kasi wa ni asi so ki halaŋ halaŋ. Semeɗna hin siirisi ki ni ko ndal sii barra na.

²⁵ Lona di ana, agi hin ŋgaan fun tanni u mege? An tli tanni u mege?

²⁶ Tlagi irigi kolo, gologi ciciwra gige, sa ma lasina ni gege? Sa ma cukusi ay ki fun tasi na halaŋ ko suu duuna nana ni gege? Asi halaŋŋi suu lam sun mamba, saɓak mamma cocoo, mul mamba ti kasi halaŋ. Va ma sem viɗ ki kam na dew kaɗi.

Saɓak ma wilina maŋ suu maŋ kina

²⁷ Agi suu Israelna, agi njaf ma vi Yakobma agi dagi ana, Voɗ maygira tos ki fok Yawe wa, Looygina ka saa kay ɗegee maygiraɗi ni kay mege?

²⁸ Agi ka wiɗi su? Agi ka humbi su? Lona Yawe ni sa ma li duliyara halaŋŋa nam ka dindin, nam ka loɓbi, ka mbuɗ maŋiɗi lay, sa ma daŋ ma wam neemba ki kaɗi.

²⁹ Nam ɦal saɓakŋa maŋ suu mbuɗ ki maŋina, nam so u sa ma saɓakam kaɗina.

³⁰ Zoŋina nam mbuɗusi ki maŋira asi loɓ kiyo. Suu saɓakŋa lay hin puk ki kaŋgaa.

³¹ Na may suu hin tasi kay Yawena hin fi saɓak ma wilina, asi hin mbuɗ ni ko bakŋa na, asi tuɗ fok na ɗow ɗow ka mbuɗ maŋiɗi. Asi huɗ tasi foko ka loɓ kiɗi lay.