EZAYI 39 - Boy Lonana

Ezekiyas vi koyogi suu sunusi ay hu mbassa Babilonda

¹ Hu coki ndaɗta ni Merodak Baladan goŋ Baladanna, mul ma Babilonna, sun magaara ay maŋ Ezekiyas ɦam tlena ay may, hu li ma nam hum ana nam li gin tuguɗiira hin garaɗ kiyona.

² Ezekiyas hurum furi coco u suu mbay asina. Nam takasi huu zi mayra ŋgolla ta tlesuu dlasi ŋgolo ɦayna cuki hura, gursura, lorra, mbitla, u mbul ma his jivina, nam takasi zira kawi ma duuna cuki hura ki lay u tlegeyem suu ŋgay a ŋgom tamma halaŋ halaŋ. Nam ŋgayasi va ka ki kosi na dewɗi, huu ziimba buuna lay, huu zira ŋgolla asi li tokka hura lay, li ma hu mul mambana halaŋ.

³ Sa ma jok vun Lona Ezayi mbay eg mulna Ezekiyas mba joɓom ana, «Suu asina col ay ni arage? Asi mba daŋŋi ana mege?» Ezekiyas hoŋom dira ana, «Suu asina mbay egenni col ay ni hu mbassa dayra, ay ni hu Babilon day.»

⁴ Ezayi hoŋ joɓom ana, «Va ma asi wam ay kalafi varaŋŋa ni mege?» Ezekiyas hoŋom dira ana, «Tlesuu vo varanna halaŋ asi wasi kiyo, va ma hin varan dew ma bay an takasina ki kaɗi.»

⁵ Ezayi hin di Ezekiyas ana, «Aŋ hum haa, ni boy ma Yawe ma Saɓakŋa Kom Belna, damma.

⁶ Buu maa hin mbaa ni tlesuu vo hu ziiŋŋa halaŋ suu somoyoŋ tokosi ka ta ta cemi wanna, suu Babilonna hin yowosi ki halaŋ, va ka hin ka na dewɗi, di ni Yawe.

⁷ Asi hin yowoŋ goryoŋ suu taa ha ki ɦiw suu hu njafaŋŋa, asi hin paɗasi huɗusi ki cukusi a li sunda vo taraŋ vi mul ma Babilonna.»

⁸ Ezekiyas hoŋ di Ezayi ana, «Boy ma vi Yawe ma aŋ dam wanna ni jiviya.» Nam hin di ana, «Na may hu li ma an ka iiri tuna ni heɓpa ka duk ɦoŋomiya.»