EZAYI 38 - Boy Lonana

Ezekiyas vi tuguɗiira hin garaɗ kiyo

¹ Hu buu namma ni Ezekiyas vi tuguɗiira, ndaɗ ki egem eŋ cocoo. Sa ma jok vun Lona Ezayi ma goŋ Amosna mbay egem dam ana, «Gola Yawe di ana aŋ di dlara huruŋga ki maŋ suu maŋsina kay aŋ ka suɗɗi, hin miɗ kiyo.»

² Ezekiyas mbuɗ irim dogooro, cen Yawe.

³ Nam di ana, «Ҥii, Yawe, humuŋ gaŋu kay an poy uŋŋi u ɗegeera u huu ma dewna an li ni dlara iriŋ jivira halaŋ.» Ezekiyas tii u simina.

⁴ Boy ma vi Yawena mbay eg Ezayi dam ana,

⁵ «Tuɗ di Ezekiyas ana, Yawe Lo ma vi buŋ Davidna di ana, an humuŋ cen maŋga wa, waŋ simi maŋŋa wa may. An cukuŋ buu fun maŋŋa basara doogo yam vadl.

⁶ An suɗuŋ ki u ɦoŋziŋŋa halaŋ ko mul ma Asirina. An hin gol ɦoŋzi namma.

⁷ Maŋ aŋ taŋga may ni gola ni dlara Yawe takaŋgara, Yawe hin li dlara nam daɗta.

⁸ Gola (vun goŋga taɓa ha kolora) vi Akazza, an hin hoŋ ŋgusna ay dagan huwa, nam hoŋ ay ta ta ŋga semma doogo, faɗta hin hoŋ ti hu li ma ŋgusna huna ni semma doogo may.»

Cenda vi Ezekiyas hu li ma nam garaɗ kina

⁹ Hu li ma Ezekiyas, mul ma Yudana garaɗ ki hu tuguɗii mambana ni nam ŋga Lona ko wanda na.

¹⁰ An saa kay nus buu man ma hin ewna, an ay ki ni fun lina vi suu miɗina, basa manda hinda lay ɓakŋa ki kaay kanu.

¹¹ An ɓak tan ana an ka wi Yawe hu ndaŋgara vi suu iirina oloɗi, an ka wi ii sa war kay ndaŋgara oloɗi lay.

¹² Iiri manda paɗ kiyo, tuɗ ha ki egen na day ko ndal mbutluɓ ma vi suu taa yorina na. Ko ndal sa ma cil barawna na, an tew ki ni kay mburra vi iiri mandara, zewen ma ay njunina nja ki wa lay. Maɗii lay fiɗigi lay, an saa gin ana Bu Suuna garak ki u an wa.

¹³ Jew maɗiira a fo kira, anni ko va ma ki bulumina na, sokon ki muɗi ko dlona a kom tlenara na. Maɗii lay, njeŋge lay aŋ garak ki u an wa.

¹⁴ Tii manna mbuɗ ni ko ndal ma vi dlemerekŋana na, an tii ko ndal gugukka na. Irinda gol ha kolo egeŋga ka tew oloɗi. Bu Suuna an ki ni gulukiya, mbay njun kanu.

¹⁵ An hin di ni ana me ologe? An ndak di ni ana mege? Nam li dla ndaɗta halaŋŋi namu. Hu li ma an ka hu yoorana senna ka vanɗi lay.

¹⁶ Bu Suuna ka eg suu mamsina, asi ndak lak iiriya. Musuk mamba ka huu suu asina ko ndaɗta na may aŋ colon koloo, mbuɗun iiriya.

¹⁷ Yoo manda mbuɗ ki suɗta wa. Aŋ vi taŋ eg iiri manda kay ana an kal hu zullaɗi. Aŋ cukun coonda ha ki ŋgoroŋ dagan halaŋ halaŋ.

¹⁸ Kay ana lina vi suu miɗina ka ndak a ŋgaaŋgi. Suu cuki kaŋga hu zullana ka saa kay ɗegee maŋga oloɗi.

¹⁹ Sa ma ka iirina gaŋ deɓpa ni nam hol, ko ndal an wanda na. Bu gona takaŋ ɗegee maŋga maŋ goryomu

²⁰ Yawe ko aŋ suɗun ki na ni, ami min bu tlegeyemi hu buuna halaŋ hu li ma ami ka iirina fok ziŋ Yawena.

²¹ Ezayi di ana, asi ɦam vuɗ tulum ma ay nde asi hoorom kay mbil Ezekiyas, nam mulna garaɗ ki gaw.

²² Ezekiyas hin di ana, «Va ma hin tak ki ana an tuɗ kolo hu ziŋ Yawera ni mege?»