EZAYI 37 - Boy Lonana

Ezekiyas yi sa ma jok vun Lona Ezayi ay egemu

¹ Hu li ma mulna Ezekiyas hum boy namma na ni, nam haa baraw mamma kiyo, cuk baraw bolna egemu, tuɗ hu Ziŋ Yawera.

² Ŋgoo dagan nam sun sa ŋgol mam ma juɓ vun ziimma, Eliyakim, u saam ma ɓiira Sebna u sa ma ki maa coco duk muli suu li ɓivunnana halaŋ cuki tasi ni baraw bolna, tuɗ eg sa ma jok vun Lona, Ezayi, ma goŋ Amosna.

³ Asi dam ana, «Gola ni dlara Ezekiyas daɗ ayra, buu ma karamma ni buu ma hahawra, ni buu ma kaɓakŋa u buu ma zolona. Kemba hal a vuɗ kira, saɓak ma vuɗusi kina kaɗi.

⁴ Kala, Yawe, Looŋŋa, hum boy ma sa ma ŋgol kaŋŋa vi suu Asirina ma mul mamma damma ayna wa, sunum ay a ŋgul Lo ma iirina, a kaam ɓakŋa kam kay boy ma co ma nam damma ko Yawe Looŋŋa humba na. Aŋ cenem kay u suu hin ka nde wanna.»

⁵ Suu sunda vi mulna Ezekiyas mba tew eg Ezayi mba damu,

⁶ Nam hoŋosi dira ana, «Agi tuɗ di mul magina ana, Yawe di ana li ndaa boy ma aŋ humum wannaɗi, ca yaŋ kay ŋgulla vi sa sunda vi mul ma Asirinaɗi.

⁷ Gola ni dlara an hin lamba egemba. An hin kalam ŋgussa cora hurumu nam hum boy wanna nde ni hin hoŋ voo, asi hin cam ha ki u ŋgewna hu mbas mamba tana.»

Mul ma Asirina mba lassa daŋga kay Yerusalem olo

⁸ Hu li ma sa ma ŋgol kaŋŋa hum ana mul mamma hin mbassa Lakissa tani tuɗ duu tam u suu Libnana ni, nam tuɗ fam ha ki hu li namma tana.

⁹ Hu li ma mul ma Asirina hum ana Tirhaka mul ma Etiyopina a mba duu u namu ni, nam cuk suu vun sunda ay eg mulna Ezekiyas dam ana,

¹⁰ «Agi tuɗ di Ezekiyas, mul ma Yudana ana, Looŋ ma aŋ tin saa maŋga kam namma baaŋ ki ni baay ɦawaa. Daŋ ana mul ma Asirina ka ndak a tli Yerusalembi.

¹¹ Aŋ hum dla mayra muli suu Asirina laɗ eg mbassa daŋga u humuŋ lay, asi dikisi ki halaŋ halaŋ. Aŋ hin suɗ ki maŋŋi aŋ na dew su?

¹² Loogi suu vi njaf suu daŋŋa suu somoyon ɓalakasi kina, ko ndal Gozan, Haran, Ressef u goryoŋ Edenna suu ay hu Telasarna na?

¹³ Mul ma Hamatna, ma Arpadna, ma Lairna, ma Sefarvaimma, ma Henana u ma Avana muli asina ka ni arage?»

Ezekiyas cen Yawe

¹⁴ Ezekiyas tli magaa ndaɗta kom tani, ndumuɗ ndummi tuɗ kolo hu ziŋ Yawera, buɗ magaa ndaɗta ki fok Yawe.

¹⁵ Nam cen Yawe di ana,

¹⁶ «Yawe, ma Saɓakŋa Kom Belna, Lona vi suu Israelna, aŋŋi ma ay kolo kay Serubim, saaŋ ma sundana, aŋ dew ni lo ma kolo kay muli suu kay ndaŋgara halaŋŋa. Aŋ li huulona u ndaŋgara ni aŋ lay.

¹⁷ Tin humuŋu, Yawe, hum haa, mal iriŋ kiyo, Yawe, gola. Hum boy co ma Senakerib dam ma sun suuna ay a ŋgul Lo ma iirina wanna.

¹⁸ Ni na daŋ may, Yawe, an wi ki gasi ana muli suu Asirina ɓalak mbassa daŋga ki u muli masisina cocoo.

¹⁹ Asi ŋgalasi loosina ki duk kura lay, na may loogi asina ni ka Lo ma gasinaɗi. Asina ni tlesuu sana lasi u komma ɦawaa, ni guna ugi ɦinira. Kay ndaɗta muli suu Asirina ɓalakasi kiyo.

²⁰ Na may ni aŋ, Yawe, Loomina, suɗumi ki ko sa namma kay a mulla kay yam mbassa halaŋ wi ki ana aŋ dew ni Yawe.»

Ezayi jok boy ma Yawe dammana maŋ mulna

²¹ Ezayi ma goŋ Amosna sun suuna eg mulna Ezekiyas dam ana, «Gola, Yawe, Lo ma vi suu Israelna, ma aŋ cenem kay Senakerib mul ma Asirina,

²² gola ni boy ma Yawe damma ay kamma, ndaɗ ka panaŋu, ndaɗ ka san uŋu, gora Yerusalemba. Ndaɗ ka kisik yaɗ ha uŋ dagani.

²³ Sa ma aŋ ŋgulum coco, panamma ni gege? Aŋ oo uŋ kolo na ni eg gege? Aŋ ŋga taŋ cocora na ni eg gege? Ni eg sa ma Teteɗ ma vi suu Israelna.

²⁴ Magaa maŋga aŋ ɓiiriɗ ayra aŋ ŋgul Bu Suuna, aŋ di ana kulumi suu pupusna zuli varaŋ cocoo. Aŋ ki fuli kolo kay ɦinira fiyekka, ha hu Liban zi ma dayna an ka gu ma saɓak coco ma huna kiyo, u tlesuu jivi suu huna. An tew hu liiɗ ma ŋgay cocona lay.

²⁵ An vek goloŋga an ci yona. Sen ma tuɗta so mbo ma hu mbassa Egiptera ki halaŋ.

²⁶ «Aŋ ka wi ana dla ndaɗta an saa ay ki kaɗ ni jewe naɗi su? Ay hu jewra day day an lasi ni anu naɗi su? Cemi ni an hin li dla ndaɗta. An hiniŋ ana aŋ ɓalak ɦoŋzi ma saɓak namma kiyo ni anu.

²⁷ Suu hu ɦoŋzi nammana ka saɓakgi. Asi ki mbuɗi maŋiya, ki ndaa cocoo, asi mbuɗ ni ko usu ma ŋgoo bagi hu senena ɦawa na, ko usu ŋgolomma na, asi ni ko tlesuu day kolo kay yam ziginina ɦawa na. Semeɗ ma siira soosi ki ni nam ɦawaa.

²⁸ Li ma aŋ kaki huna an wam lay, aŋ a kal ki kiɗiki ni an waŋ lay. Ya mayra aŋ ka laɗ u anda an waɗ lay.

²⁹ Aŋ li yara ni egen na ɗow, an humuŋ ŋgul maŋga ŋgulunda lay. Pan ma aŋ pananna cuk ha ki ciniŋu. An hin gaŋ walakka humuŋu, cukuŋ njamara funuŋ may. An hin hoŋoŋ ay hu voɗta aŋ mbay huruɗta.

³⁰ «Ezayi di mulna Ezekiyas ana, dla ndaɗta hin li a takaŋ kira cukuni ni suuna hin ti ni mogoo tlesuu day ay kay tasina. Ha hu basara daara ni na lay. May hu basara hindira ni zaaragi tlena, feɗegisina, pagi gutlu gutluna, hin tagina vuɗum may.

³¹ Suu Yuda suu suɗna hin zula, ni ko ndal gu ma sariyam pii kaŋga day, ma ɗuf kolo dayna na, vuɗ coco lay.

³² Kay u suu hinna hin cuk ay ki hu Yerusalem u suu suɗna cuk ay ki kay yam ɦinira Siyonda. Lalamba vi Yawe, ma Saɓakŋa Kom Belna, hin li dla ndaɗta ni ndaɗu.

³³ «Kay ndaɗta Yawe ɓak kay mul ma Asirina ana, nam ka kal hu ɦoŋzi nammaɗi, nam ka gi mbuuru huɗi lay, ka tli mbari kom ta a duu u asiɗi lay. Nam ka ndak a hawaɗ yam gulumunna a weɗ ha voɗi lay.

³⁴ Voɗta nam tli ay huruɗta hin hoŋ tli ni hu olo, nam ka ndak a kal hu ɦoŋzinaɗi, di ni Yawe.

³⁵ An hin njun kay ɦoŋzi namma suɗum kiyo, ni u min manda ni kay saan ma sunda David.»

Suu Asirina tuɗwa Senakerib miɗ kiwa

³⁶ Hu njeŋge ndaɗtaa gawni, sa sunda vi Yawe kal hu kaŋ ma vi suu Asirina, ci suuna na 185,000 ni njufiina halaŋ. Maɗiira suuna yow ki koloo ni kaŋga ni maɗ suuna na sak sak.

³⁷ Senakerib mul ma Asirina hoŋ dagan tuɗ Ninive kak ha ki huwa.

³⁸ Hu buu maa dew nam kal hu zira a goɓ loomma Nisrok, goryom Adaramelek u Saresser cam ki u ngewna, pii kosi tuɗ ki hu mbassa Araratta. Gooromma A sarhadon varak balamam a mulna may.