EZAYI 36 - Boy Lonana

Mul ma Asirina las zi ma Yerusalemma

¹ Hu basara doogo yam fiɗi, cokira Ezekiyas kaki a mulnara ni, Senakerib mul ma Asirina col ay kolo a duu u ɦoŋzi ma saɓakŋa ma vi suu Yudana, nam tli zina ki halaŋ.

² Mul ma Asirina sun saam ma ŋgol kaŋŋa ay u suu duuna um bolow cocoo, mbay eg mulna Ezekiyas, asi col ay ni hu ɦoŋzi ma yam ana Lakis. Sa ŋgol namma mba vi ziisi ki fun goloŋ ŋgolna ni voɗta tuɗ hu sene ma mbus tlena kina.

³ Eliyakim sa ŋgol ma fun ziŋ mulnara, ma goŋ Hilkiyana, Sebna sa ma ɓii magaara, u Yoa ma goŋ Azafna vun sunda vi mulna, sel ay ki tuɗ egemu.

⁴ Sa ŋgol ma vi mulnana dasi ana, «Tuɗ dagi maŋ mulna Ezekiyas ana, mul ma ŋgolna di ay ana, ni mul ma Asirina, ana aŋ kakira na en, koɗ taŋŋi va ma aŋ tin saaraŋ kamma ni mege?

⁵ Aŋ di ana a fi nera u saɓakŋa ni u boy ma sana dam na dew hu li ma duunana. Sa ma aŋ tin huruŋ kam namma a hin duu u anna ni gege?

⁶ Gola aŋ tin saa maŋga kay mbassa Egiptera, ndaɗ ni ko cerew ma ki kusina na, sa ma tin kom kamma nam hin cokom kom ay tok. Ko ndal Faraw mul ma Egiptena na. Suu tin hurusi kay saɓak mammana halaŋ.

⁷ Kala aŋ hin dan ana, ami tin hurumi ni kay Yawe Loomina. Ha ni ka nam ma Ezekiyas paɗam tlegeyem ay ki kolo kay li mbuyna, u givin ma togolla laynaɗi su? Hin di suu Yudana u suu Yerusalemma ana, Agi goɓ mi fok givin ma togolla ma ka hu Yerusalem wanna doy hol.

⁸ Mariyaɗ ni agi joɓogi sa ŋgol manna, mul ma Asirina, nam ɦagi kulumi ay buɓ buɓ mba', lini agi hin mba hal suu ful kasina may.

⁹ Aŋ hin hoŋ iriŋ ŋgay taŋ u suu kaŋga u saɓak sa ŋgol mannana na ɗow ni nanage? Aŋ tin saa maŋga kay kulumi suu Egiptena u pupusna na ɗow ni nanage?

¹⁰ An duu u mbas ndaɗta ni kay tan su? An li ni u minda vi Yawera, Yawe ɦan voɗ ndaɗta ana an ɓalak mbas ndaɗta kiyo ni namu.»

¹¹ Eliyakim, Sebna u Yoa di sa ma ŋgol kaŋŋa ana, «Ɓak suu maŋsina ni u vun Arameenna, kay ami hummi vun namma, na may ka aŋ ɓakami u vun ma vi suu Juifnaɗi, ka suu ŋguy laki kolo kay gulumunana humbi.»

¹² Sa ma ŋgol kaŋŋa hoŋosi dira ana, «Sa ŋgol manna sunun ay ni eg sa ŋgol maŋŋa u taŋga a dagi boy namma ni magi su? Sunun ay a di boy namma ni ka maŋ suu laki kolo kay gulumuna canaɗi su? Suu asina lay hin ti soɗosiya, ci sumurusi lay ni ko agi tagira na may.»

¹³ Sa ma aŋgol kaŋŋa col kolo sawalla u delemba eŋga u vun ma vi suu Juifna di ana, «Humugi boy ma vi mul ŋgolnana haa, mul ma Asirina.

¹⁴ Mulna di ana, Ezekiyas baagi ki ni baay ɦawaa, nam ka ndak a suɗugi kidi.

¹⁵ Ezekiyas ganagi yagi ana, agi li ndaaɗi, a gasira ni Yawe hin suɗuygi kiyo, ɦoŋzi namma ka ndak a tli ko suu Asirinaɗi.

¹⁶ Ni agi hum ugi vun Ezekiyasɗi, kay mul ma Asirina di ay ana, Vagi banara u an ɗow, mbaagi ay egenu, gegelay ni hin ti vuɗ gugutlu mamma funum u vuɗ tulum mamma ɗow, hin ci yo ma hu goloŋ mambana may.

¹⁷ Minigi tagi ki jew bay an mba, a yowogi ki tuɗugi ki hu mbassa daŋga ko magira nara, mbassa li blena, sum veŋŋa, mbassa funa hu cocora, ta gugutlura hu coco layra.

¹⁸ Ka Ezekiyas ganagi yagi di ana, Yawe hin suɗuygi kiyo. Agi wi ni loogi suu vi njaf suu taa dew hin suɗusi ki ko mul ma Asiri ɦoy su?

¹⁹ Agi wiya loogi suu vi Hamat u Arpadna ka ni ara wange? Lo ma vi Sefarvaimma ka ni arage? Loosina hin doo kay mbassa Samarira bay an tlaɗ ni doo su?

²⁰ Loogi suu hu mbas ndaɗtana halaŋ ma hin doo kay mbas mambana ni manage? A Yawe hin doo kay Yerusalem konda ni nanage?»

²¹ Suuna halaŋ laki ni ɦawa na en ka dam vaɗi. Kay mulna dasi ana sa hoŋom diɗi.

²² Sa ŋgol ma fun ziŋ mulnana, Eliyakim ma goŋ Hilkiyana, Sebna u Yoa sa ma ɓii magaara ma goŋ Azafna, mbay eg Ezekiyas haa barawi masisina kiyo, mba cuɗ boy ma sa ma ŋgol kaŋŋa damma maŋ Ezekiyas.