EZAYI 35 - Boy Lonana

Suu suɗ kina hoŋ ay hu Siyon

¹ Ndaŋgara ki sooyra u li ma ki ŋgoo bagi wasna furyugiya. Tlesuu ŋgoo bagina duffa, ɓo lay.

² Ko asi halaŋ ɓoo, asi weɗ koloo, luura, sawalla furira. Bibiŋilla vi gu ma Libanna ɦasira ki wa. U ŋgolla vi ɦinira Karmella ura Saronda lay. Suuna hin wi bibiŋilla vi Yawe wi ŋgolla vi Looyginara.

³ Ko ma ki loɓina, mbuɗum ki saɓakŋa, vun gif ma ɓulugudina ɗob ki lay.

⁴ Dagi suu ɓik vun digisina ana, Lakagi saɓaki, laki ndaaɗi, gologiya, Loogina mba wa. Sa sugulna mba ni namu. Ni warak ma col ay vi Lonna Nam u tamba suɗugi kiyo.

⁵ Ni ii suu dugina mbuɗ wiya hum suu ŋgelina mal ki lay.

⁶ Suu dalira pii weɗta ko ndal dugina na. Suu vunusi ndumuna mbuɗ sawalla ha koloo. Li ma haw mbona, yona mbuɗ law huwa. Lumma wak ki ŋgoo bagi hu fulla lay.

⁷ Mbas mayra ŋgetlna mbuɗ ki li ma lokka. Ҥoŋzi ma mbo li ka huɗina, goloŋga mbiira hin mbuɗ huwa. Li ma gi bayakka buu huna hin mbuɗ ki li ma cerewna u usu ma yam ana papirusna day ki huwa.

⁸ Voɗ bulna hin wak ki huwa, asi hin yaɗ ana voɗta teteɗta. Sa ma li dlara njenje ka tuɗ hu voɗ ndaɗtaɗi. Kay Bu Suuna u tamba mal voɗ ndaɗta ni namu. Suu giniŋŋa ka viɗ hu voɗ ndaɗtaɗi lay.

⁹ Li namma ni dlona ka huɗi, vabak ma co ka li ha hu li nammaɗi, sa ka fi va ma na huɗi. Suu vi Bu Suunana tli voɗ ndaɗta ni asiya.

¹⁰ Suu Yawe buɗusi ay kina hin hoŋ aya. Asi hin cuk hu zi ma Siyonna ni u soolla furira. Golosi irisi ni u furira ka daɓ kiɗira. Ayra u furira ŋgafasi aya. Yoora u hahawra yow liŋŋa may.