EZAYI 34 - Boy Lonana

Kaɓakŋa kay suu hu duliyara halaŋ

¹ Agi njaf suuna halaŋ ɦuɗugi tagi aya, humugi boyna. Agi suuna halaŋ tin humugi jiviya. Ndaŋgara hum ha u tlegeyeɗ suu kaɗna halaŋ, duliyara u tlesuu huruɗna halaŋ.

² Kay Yawe hurum ɓeŋi eg njaf suuna halaŋ. Yaamba ni eg suu masi suu duuna halaŋ halaŋ. Nam casi ki bel bel, doorosi duu masina ki wa.

³ Suu masi suu dak hu duunana cukusi ha ki kiɗiki. Maɗasi gol ha ki gira na si si, busuɗusi hin weleɗ ha kay ɦinira kolo ni na pilil pilil.

⁴ Faɗta tilna u ciciwra hin yak ki kaŋgaa, huulona hin ɗuɗ ki ko suuna a ɗuɗ dlaɗtara na. Tlesuu ay kolo huna yak ay ki ko ndal hum tulumma u hum gugutlura yak kira na.

Ci maɗ ma cocona hu mbassa Edomba

⁵ Bu Suuna di ana, ŋgew manna ay kolo huulona day guruɗ ay wa. Nam mba ci suu Edomma kiyo, ni suu may suu an kaasi ɓakŋa ki kasi nam vasina.

⁶ Vun ŋgew ma vi Yawena taɓagi u busuna, nam ki hoɓi u mbulna. Busu timigiina u busu ɦugunina u mbul ma kay gilis gamlaginana, kay ɓivun ŋgol ma vi Yawena ka hu Bosra. Ci maɗ ma cocona ka hu mbassa Edomba.

⁷ Hu li namma ni vunda u goo mbutlna, u bolo mbutlugina cuk kaŋgaa, ndaŋga masira hin guruɗ ki ko busu tlena. Gugum ma sii kolona ki tlumira ni u mbul tlena halaŋ halaŋ.

⁸ Buu namma ii Yawe ni a buu ma sa sukulna. Ni basara nam a ŋgab dlara suu duu u nam hu Siyonna kira.

⁹ Mbo lum masina hin mbuɗ ki ko guduroŋŋa na. Gugum ma sii kolona mbuɗ ki suufra. Yam mbas masira halaŋ mbuɗ ki a guduroŋ ma ŋgal faɗta cocona.

¹⁰ Faali lay, njeŋge lay ku ndaɗta ka tewɗi, ndoosna ɗus kolo ni na gak gak, basara u basara. Li namma hin ki ni a ŋgoo bagira sa ka jak hu li namma oloɗi.

¹¹ Hin ki ni li ma lak gi hikŋa ugi cemcemma. Jalyamba u gagawna hin min ziisi ni huwa. Bu Suuna hin taɗ zew ma ɓalak tlena kina huwa u va ma ŋga ɗegee goŋiina lay ka li oloɗi.

¹² Suu ŋgolo masi suu ɓak dla mulla sa ka dew oloɗi. Mulina halaŋ ba ki wa.

¹³ Zigini masi suu saɓak cocona meera day ki hurusiya, zi ma asi ŋgay tasi huna wayra day ki hurusiya, hin ki ni a li ma bayakka etl huna, ni zi ma vi erkettana.

¹⁴ Yarawna u goonira hin ŋgaf tasi ni huwa. Ŋgegina hin poy ni huwa, ni li ma fulina koɗ tasi huna. Tlesuu poy njeŋgena koɗ tasi ni huwa.

¹⁵ Guyugina liisi ma buuna ni huwa, asi gi seesiya, etlemmi hu lay. Kokolora hin ci yam taɗ ki ni huwa.

Boy ma njaɗ kay kokolorana

¹⁶ Halagi huu magaara vi Yawera, ndumugira. Va ma dukusi na dew ma hin bay li ki kaɗi. Sa ma hin a yoo tam kay ndaram kaɗi lay. Kay Bu Suuna ɦal voɗ dla ndaɗta ni u vun tamba. Musuk mamma tok tle asina halaŋŋi namu.

¹⁷ Nam u tamba paɗ dewna kasi ni namu. Nam ɓorowosi ii mbassa ŋgaaɗ ki u zewna ni u kom tamba. Asi hin lak hu mbas ndaɗta ni a fafaɗta, basara u basara.