EZAYI 32 - Boy Lonana

Mul ma ɗegeena

¹ Mulna hin ti mulla ni u ɗegeera, muli suu umma hin ti mulla ni u jivira may.

² Gegelay dukusi ni ko ndal ŋgusu ma kay suunana na, ni ko gi ma doo babaana na. Asi ni ko ndal mbo ma ɓaɗ kay ndaŋgara haw yona na. Ni ko ŋgus ɦini mayra kuluɓ ay kay ɦoŋzi ma faɗta ti hu cocona na.

³ Ii suu may suu wina ka duk oloɗi, hum suu may suu humma ka ŋgel oloɗi lay.

⁴ Suu may suu ka saa dlaɗina mbuɗ lak en a jeɓee dlara. Suu vunusi mbotlona mbuɗ ɓak ki jiviya mbuɗ ɓorow ii dlara kiyo.

⁵ Sa ka ndak yi sa ma giniŋŋa ana dlam ŋgol cocoo naɗi, sa ka ndak ɓak kay sa ma ganyamba ana hurum jivi eg suuna ɦay naɗi lay.

⁶ Sa ma giniŋŋa ɓakŋi dla cora sasak, nam saa hurummi a li ni dla cora. Nam li sulukŋa cocoo. Nam di ni dlara pan Yawera sasak. Suu mayra casina nam ka ɦasi va ma tiɗi. Sa ma laara camma nam ka min a ɦam yonaɗi lay.

⁷ Sa ma ganyamba suu sun mamsina ni suu ci matna halaŋ halaŋ. Nam ka hal ni mbeleŋ ma ba suu hahawra kina sasak, u kaboy ma nam kaamma. Lini boy ma vi sa ma wihawrana jivi lay, nam ka humumbi.

⁸ Na may sa ma hurum jivina saa a li ni dlara jivira may. Sun mamba nam a laɗta halaŋŋi jiviya.

Boyna kay boyogi suu Yerusalemma

⁹ Boyogi suu haw va ka cagiɗina, yowogi koloo, humun ki vunun haa. Gorɓii suu ka yoo haw vaɗina tin humugi ha hum boy ma an min a damma.

¹⁰ Cukuni ni agi ka furi cocoo ka yoo haw vaɗi. Hu basara daara ni ka na oloɗi, tlesuu agi lasi vo wanna hin daɓ kiyo, agi ka hin fi va ma a lam ay vo na oloɗi.

¹¹ Agi suu ka saa kay vaɗina lagi ndaana. Agi suu ɦizina dlakagi ndaana ɗow, fokogi baraw magina kiyo, njunugi doona hurugiya.

¹² Cagi kogi hayagiya, tiirigi kay sene magi ma jivi ma jiv tlena ɦayna ka oloɗi.

¹³ Huu sene ma vi suu mansinana day ki hu ni tlesuu siina, day ki vo hu ɦoŋzi ma jivi cocona lay.

¹⁴ Ziŋ mulna ta ŋgolla sa ka huruɗ oloɗi. Ҥoŋzi ma suuna li vunna hu cocona sa ka hu dew oloɗi. Ҥoŋzi ma yam ana Ofelna u zi mayra mini kolo fiyekka hin ki ni ɦawaa. Kini a li ma buu tlebagina u li ma asi ti haɗna huna.

¹⁵ Ta ta hu li ma Musukka cuk ay kaygi kaŋgana. Li ma ŋgo bagina hin mbuɗ ki sene ma jivina, sene ma jivina mbuɗ ki li ma pi ŋgusugi suu tira huna may.

¹⁶ Dlara ɗegeera hin li hu li ma ŋgoo bagi namma, gasira hin li hu li ma pi ŋgusugi suu tira huna may.

¹⁷ Vuɗ dlara ɗegee ndaɗta tak ki ni u heɓpa. Dlara dadam ka li hu li namma oloɗi kay ɗegeera mbaa heɓpa wa, dlara ndaa ka oloɗi, ni a fafaɗta.

¹⁸ Suu mansina hin lak hu liisina ni u heɓpa. Ni hu zi ma asi lak ki fani dla kaɗina, li ma koɗ tara.

¹⁹ Na may buu namma ni dlaŋmagina si kay ŋgoo bagiya, ɓeŋ ŋgusugina kiyo, hu ɦoŋzina ziginina bow ki lay.

²⁰ Furira ni kagiya, agi hin zaa tlena hu li ma lona si huna halaŋ, mbutlugi magisina u kor magira agi hin cukusi koloo, ka joɓosi dlasi oloɗi lay.