EZAYI 31 - Boy Lonana

Suu Egiptena ni suu warna ɦawaa

¹ Hahawra ka kay suu hoŋ irisi ga tuɗ ŋgay hu Egiptena, suu tin saa masira kay kulumi suu bolow cocona, asi gol ni kulumi suu taɗ pus pusna, kay asi saɓak cocoo. Asi ka saa kay ma teteɗ ma vi suu Israelnaɗi. Asi ka min a hal Yaweɗi.

² Nam may ni wi yal dlara nam a laɗta, nam ndak mbaa dlara hahawra aya. Dlara nam daɗta nam ka hoŋ vunum daganɗi. Nam col kolo eg suu hurusi cona, eg suu may suu li dla cora u suu njun ay usina halaŋ.

³ Suu Egiptena ni suu warna ɦawaa, asi ka Lonɗi. Kulumi masisina ni tliwna ɦawaa, ka ŋgussaɗi. Hu li ma Yawe maɗ kom ki kasi wa ni, suu njun kasina hin cuk gaa, sa ma a doo kasina hin ndi ki ga lay.

Yawe hin njun kay Yerusalem

⁴ Yawe dan ana, ko ndal dlona u gorom gi ŋgomba hu li ma asi vi buunara na. Suu taa yoorina bolow sawalla lay ni nam ka mbuɗ ndaa ko soo masiraɗi. Ni na may Yawe ma Saɓakŋa Kom Belna hin cuk sem ay ga kay ɦinira Siyonda kay a li duuna ni na may.

⁵ Ko ndal layagina baa garaŋasi kay goryosira na, Yawe ma Saɓakŋa Kom Belna, hin njun kay Yerusalemmi na may. Nam hin njun kasiya buɗusi ki lay. Nam fuɗusi kiyo, suɗusi ki lay.

⁶ Agi suu Israelna hoŋogi ay eg sa ma agi mbuɗ ŋgorogi hinim ka ki na dayna.

⁷ Hu buu namma ni gegelay ni mba gik loom ma nam minim u doonora u lorrana kiyo. Loogi suu agi li cora yoorosi u kogi ma cona.

⁸ Suu Asirina hin cuk ga fok ŋgew ma sa war dlam ka u kombina, casi ni ka ŋgew ma vi sa warɗi. Asi hin pii liŋŋa fok ŋgewna, gor zoŋi masi suu duuna, suu daŋŋa hin su kasiya.

⁹ Mul masina hin paɗ liŋŋa ko ndaana. Suu ŋgolo mamsina mbuɗ ki ndaana lay. Ni boy ma vi Yawena kuumba ka hu Siyon. Zul ŋgolla kura ka Yerusalem.