EZAYI 30 - Boy Lonana

Suu Egiptena min galamba u suu Israelnara kaɗi

¹ Yawe di ana, hahawra ka kay gor suu li gonokka u anna. Asi vi vunusi kay dla mayra col ay ka konɗira. Taɓ vunusi kay dlara an ka miniɗira. Tok dla cora ha kay taɗ na ɗow ɗow.

² Asi tuɗ hu Egipte ni joɓon kaɗi lay. Asi min ana suu duu suu vi Farawna njun kasiya, ŋgay tasi u ŋgus suu Egiptena.

³ Saɓak ma vi Faraw namma hin mbuɗugi zolona, ŋgayra agi ŋgay tagi u ŋgus Farawra hin viɗigi kiyo.

⁴ Gola muli magisina tew ki Tanis wa, suu agi cukusi hana tew ki hu Hanes.

⁵ Na may asi halaŋ hin mbuɗ ay zolona fok suu ka lasi vaɗina, asi ka ndak a njun usiɗi, ka lasi va ma jivi na ndeɗi lay. Hin mbarasi ay kasi ni panna u zolona na ɗow.

⁶ Gola ni dlara kay tlebagi suu dalina. Asi hin yow ay hu mbassa dalira na. Ay hu mbassa yoora u hahawra u mbassa haw yona dlona ma gi ŋgoɓpa, makira u dragoŋ ma pii kolona, kolo kay korra may, ka ŋgoo jamballa may. Asi mbay u ɦiz masira u bege masira may, kolo kay kora may, ka ŋgoo jamballa may, ni maŋ suu ka lasi vaɗina.

⁷ Njunda vi suu Egiptena hin li ni ko ndal semeɗna ɦawa na, ko va kaɗira na. Kay ndaɗta an yasi ana va ma ɦawa sunum kaɗina.

Gi humba kay dlara ha fokka

⁸ Tuɗ cemi ɓii dla ndatta ki kolo fokosiya, ki hu tlena zeɗ zeɗ mba'. A dla ndaɗta di ha ki kay dlara hin mbay fokka na gak gak.

⁹ Asi ni suu babalira, ni gor suu ganyamba, asi ka min haɗta Yawe haɗasiraɗi.

¹⁰ Asi di suu wi dlara ha fokka ana, «Wakiraɗi.» Maŋ suu jok vun Lona ana, «Agi jokomi dlara ɗegeeraɗi, dami ni dlara irimi jivira, dami ni dlara mbaɗ ii suuna.

¹¹ Calaɗagi voɗta kiyo, ɦuɗugi ki day eg voɗta, dami boy ma Teteɗ ma vi suu Israelna naɗi.»

¹² Kay ndaɗta ma Teteɗ ma vi suu Israelna di ana, Agi van boy manna kaɗi, agi minigi ni dlara lassa na ɗow. Agi vi kogi ni dlara ganyamba na ɗow.

¹³ Co ndaɗta hin kagi ni ko ndal maragasira vek zulla duk gulumunna, ndaɗ gi seeɗ huwa, wak kiyo, kak na njokŋi gulumunna bow ki ga kirim gaw.

¹⁴ Olo ni, ko ndal doy ma vi sa ma min doyogina to kira na, nam to ki ni na yereɓ yereɓ ka fam kamayambi, aŋ ka fi haɓalaw ma yow kuɗi lay, ka fi li ma go yo ay vo oloɗi lay.

Lakagi na en tin hurugi kanu

¹⁵ Gola Yawe, Lo ma teteɗ ma vi suu Israelna, di ana, Suɗ magira ni homba u lakka enda. Saɓak magina ni hu li ma agi seŋ vunna tin hurugi kanna. Na may agi ka minɗi.

¹⁶ Agi zaŋ di ni ana, «Ҥawaa ami pii u kulumina.» Gasi daŋ may, agi hin piirigiya. «Ami yowomi pus pus ma kulumi suu tuɗ feɗna.» Naa, suu dikigi ugina tuɗ feɗ suugiya.

¹⁷ Suu may suu buɓ duk dewna hin yow liŋŋa fok sa ma dew daŋŋa. Agi hin yow liŋŋa halaŋŋi ko lassa vi suu vadl daŋŋa. Ugira hin vora ni ko gu ma pii kolo kay ɦinira vay dam dewna ɦawa na.

Buu ma suɗta mbawa

¹⁸ Na may Yawe ka juɓmi buu ma nam a li oora kagina. Nam hin col kolo tak oo mamba kiyo, kay Yawe ni Lo ma ɗegeena. Furira ka kay suu tin hurusi kamma.

¹⁹ Na daŋ may, agi suu Siyonna, suu cuki hu Yerusalemma agi ka tii oloɗi. Lini agi yi koloo ni nam lagi oora, Nam humugi delegi wa ni nam ndak hoŋ dira.

²⁰ Bu Suuna hin ɦagi funa u yona hu las magira, sa ma a haɗ suuna ka ŋgay tam kiɗi, irigi hin wam kiyo.

²¹ Humugi hin hum della ɓak ay ŋgorogi daganda, lini agi a tuɗ ni bik njuf ɗowba bik gulu, «Gola voɗta wanni tlagira.»

²² Fuli magi suu agi minisi u lorra u doonora agi hinisi kiyo, u lorra u doonora agi yorosi eg fuli magisinana agi hinisi kiyo. Agi cukusi ki ko tlesuu njenjena na. Agi dasi ana ɦuɗugi tagi ha ki egemiya.

Mbona fi ŋgol cocoo

²³ Nam hin sagi mbona a horokŋa. Agi hin zaa tlena kaŋgaa, tlesuu agi hin feɗesina ŋgol cocoo, jivi ɦay lay. Hu buu namma ni yoori magisina ndak fi li ma ti haɗna, li ma haɗna egesi ŋgol cocoo.

²⁴ Mbutlina u koro suu sunda hin ti haɗ ma jivi ma vuvuna kamma. Yakasina kaŋga fokosi hu senena.

²⁵ Kolo kay ɦinira fiyekka lay, kay li ma mbuyna lay, yona ka hu cocoo, mbo ma cira ki hu lina aregelay, hu buu ma ci maɗna cocona, hu li ma gulumunna bow gana.

²⁶ Kiɗikka vi tilnara hin mbuɗ ni ko kiɗik faɗtara na. Kiɗik faɗta hin mbuɗ seɗ na kiɗisiya sura jewra, ko ndal kiɗikka li buuna kiɗisiyara na. Hu li ma Yawe njun mbil suu mamsinana, tin tlena ii mbil ma asi famma.

Yawe kaɓakŋa kay suu Asirina

²⁷ Yawe col ay day ka mbaya, yaamba ay ŋgal ko kura ŋgalla na, u ndoos ma warna na dim dim. Vunum oy u kura ŋgalla, sinimmi ko ndal kura ŋgalla na.

²⁸ Musukummi ko ndal mbo lumma sulul ay ki funumba na. Nam tli ta ta mba hu del sana koloo. Nam kisik njaf suuna halaŋ hu demena ma ɓeŋesi kiyo, nam cuk njamara fun suuna, tuɗusi hu li ma asi ka min gin a tuɗ huɗina.

²⁹ Magi agi suu Yerusalemma ni agi gi soolla ko suuna gi soolla hu njeŋgera luunara na. Agi hin furi cocoo, ko suu tuɗ u diffa ŋguruɗta a tuɗ kay ɦinira teteɗta vi Yawera na, eg Lona, ɦini ma vi suu Israelnana.

³⁰ Yawe hin tak delemba saɓakŋa kiyo. Asi hin wam kom ma ci suuna hu yaambana duk sin kura vi cocora, duk babaa ma mbo lona u dlaŋmagina.

³¹ Suu Asirina hin li ndaana coco ko del Yawe. Nam hin casi ni u tokolora.

³² Hu waɗta Yawe waɗasi u tokolora dew dew halaŋŋi ci gaŋgana ki u dew dew bel may, bu diffa may. Nam tli kom kolo duu u asiya.

³³ Zulla kura hura ki vegi ni day day. Ndaɗ vegi ni kay mulna lay. Ay kaŋga hu day mba ki kolo funu, ni asi nja guna hu a gam kura. Musuk ma cuk ay ki fun Yawena hin gi kura hu zul ndaɗta ni namu.