EZAYI 29 - Boy Lonana

Yerusalem fi lassa ŋgolla, hin suɗ kiyo

¹ Hahawra ka kay Ariel! Kay Ariel! Zi ma Yerusalemma, zi ma vi Davidna, ka wul hu basaa tew tew, asi ka lam luu mamma hu basara tew tew lay.

² Bu Suuna di ana, An hin lasaŋu, Ariel, aŋ hinni u yoora sak sak, aŋ ka li a givin ma togolla man oloɗi lay.

³ An hin ŋguyuŋ yaŋ u suu duu mansina, an cukuŋ suu duuna kaŋ to gulumunna kiyo.

⁴ Aŋ Yerusalem hin hoŋ ki gaa, aŋ hin ɓak ay ni buuri ga duk buɗna, deleŋ hin hum ay ni ga duk gugum ndaŋgara. Aŋ hin hosok boy maŋŋa ay ni gi ga duk ndaŋgara.

⁵ Suu babali maŋ suu bolow cocona hin mbuɗ ki ni ko gugum ndaŋgara ɦawa na, suu bolow coco asina hin mbuɗ ni ko usu ma semeɗna dolom kolona na. Dla ndaɗta hin mba ni na zak gaw.

⁶ Yawe, ma Saɓakŋa Kom Belna, hin njun kaŋu, u babaa ma ŋgolna, u geŋeɗ ndaŋgara, ɓalak tlena cocoo, mbirwinda u bil mbona u kura ŋgalla may.

⁷ Dla ndaɗta hin li ni ko ndal doy mayra di suuna njeŋge tlena tak tasi irisira na. Ni ii suu bolow coco suu ka duu u Yerusalemma. Kay suu ka duu u asina halaŋ. Suu may suu min hoŋ Yerusalem ki daganna.

⁸ Hin li ni ko ndal sa ma mayra camma doyra dam ana nam fi tina warana. Doli nam dliɗ kolo ni mayra cam tu gak gak, ɗowba ko sa ma laara camma doyra dam ana nam ka ci yona, hin dliɗ kolo ni laara cam gak gak, ɦorom ki sooyra pat pat. Dla ndaɗta hin li u suu babali suu bolow coco wanna ni na may, suu ka duu tasi u ɦinira Siyondana.

Na may suu Israelna ka humbi

⁹ Dlakagi ŋgusugiya, agi viɗ ki duk na viɗ. Agi mbuɗ ki dugiya, lakagi dugiya. Agi ki guruɗiya, may guruɗ ka ni u summaɗi, agi viriw tuɗta hu voɗta, may ni ka u sum ma yaɗi.

¹⁰ Kay Yawe gagi ŋgus mayra senna kagiya, ndaɗ dugugi irigi ki wa, ni suu jok vun Lonna. Ndaɗ baaragi yagi ki wa, suu wi dlara hu fokka.

¹¹ Dlara ŋgay ndaɗta irigi ni ko ndal magaara vunuɗ ki dugi hu enveloppara na. Asi haɗ maŋ sa ma wi ndum magaara dam ana, «Ndumuɗ ay kiyo.» Nam hoŋ dira ana, «An ka ndak a ndumuɗɗi, kay ndaɗ dugi hu magaara.»

¹² Asi hin haɗ maŋ sa ma ka wi ndum magaaraɗina dam ana, «Ndumuɗ ay ki ɗaŋgi su?» Nam hoŋ dira ana, «An ka wi ndum magaaraɗi.»

¹³ Bu Suuna di ana, suu asina ɦuɗ tasi ay egenni u boy ma dira ɦawaa, asi ŋgaanni u vunusi ɦawaa. Na may hurusi kurufu ni ha ki day egenu, Ndaa ma asi lam konna ni u gaɗta vi suu warnara ɦawaa, ni dlara asi haɗaɗta ɦawaa.

¹⁴ Kay ndaɗta an tuɗ fok a lasi dlara mbuɗ mbuɗta na gak gak. An wi kan ana yal ma vi suu wi yalnana ka oloɗi lay. Mbeleŋ ma vi suu wi mbeleŋŋa kaɗi lay.

Agi gol Yawe ni ko ge nage?

¹⁵ Hahawra ka kay suu ŋgay dlaasira fok Yawena, suu li sun masira duk ndufundana, saa ana sa ma ndak waygina ni gege? «Sa ma wi dlara aygi laɗta ni gege?»

¹⁶ Agi hoŋ yam dlara ki ga na ni amege? Sa ma min doyna hin mbuɗ ki a luɓuna ni nam na ɗow su? Va ma sana lamma hin di sa ma lamma ana, «Aŋ lan ka aŋgi.» na su? Doyna ndak di sa ma minimma ana, «Aŋ ka yalɗi.» na su?

¹⁷ Hin a kak na ew ni duk gura Libanda hin mbuɗ ki u ŋgusugi suu tira, li ma ŋgusugi suu tira ka hu cemmina hin mbuɗ ki ni ŋgoo bagira may.

¹⁸ Hu buu namma ni suu ŋgelina hin hum ndum magaara. Suu dugina hin cuk ay ki duk ndufunda mba ki hu kiɗikka, irisi mbuɗ wi lay.

¹⁹ Suu hoŋ yasi gana hin furi coco hu Yawe. Suu hawra hin furi kay sa ma Teteɗ ma vi suu Israelna.

²⁰ Kay hu buu namma lassa daɓ wa, panna ka oloɗi lay. Suu may suu u saara cora a las ndaryasinana halaŋ ka oloɗi.

²¹ Suu may suu kaɓakŋa kay suuna u boy masi ma njaɗtana, suu gun dawna fok ndaryasina u njaɗ masira a vasi u ɓakŋana, cuk suu li va kaɗina ga hu zullusiyana, asi ka oloɗi.

Suu Israelna suɗ ki wa ɗaŋ

²² Kay ndaɗta Yawe, sa ma suɗta vi suu Israelna, di ana, Nammi sa ma buɗ Abraham ay kina, hin ha fokka ni njaf ma vi Yakobma ka li ga u sa oloɗi, vogosi ka gol hahaw oloɗi lay.

²³ Kay asi wi dlara an laɗ eg goryosira na ni, asi hin geleɗen sen ana anni Lo ma Teteɗna. Asi hin dlak ndaana fok Lona vi suu Israelna.

²⁴ Suu yasi ka li sunɗina hin mbuɗ suu wi yalna. Suu li dla cora mbuɗ hin tasi a suuna haɗasiya.