EZAYI 28 - Boy Lonana

Babaa ma ŋgolna hu mbassa Samarira

¹ Hahawra ka kay mulla Efrayimba, bibiŋil maɗta tak ki kolo kay suu ŋgolo maɗsina ko ɓo tlena na, asi tew tew gurɗiya, asi li mbul ma jivina kasiya, na may tew tew ni asi ki gurɗi buuri ga u summa.

² Gola ma saɓak ma duu coco ma vi Bu Suunana tli tam u babaa ma ŋgolna, lo ma dlaŋmagina ko semeɗ ma hawaɗ tlena kina na. Ni babaa ma ŋgol ma sulul mbo lumma kina li ha ki kay yam ndaŋgara tini halaŋ halaŋ.

³ Jum masira mulla tini kasira hin tay ki kaŋga sem suuna, ay mayra vi suu Efrayim suu gurɗi u summana hin daɓ kiyo.

⁴ Bibiŋilla vi suu fokŋa ta tak ki kay yasi ndaɗta, hin viɗ kiyo, yak ki ga ko tulum ma bay nera na, sana wam cecemi na ni tlam tam ki gaw.

⁵ Hu buu namma Yawe, ma Saɓakŋa Kom Belna, hinni a jumba mulla weleɗ cocora. Nammi a walakka humba ura del ko suu mamsinara.

⁶ Nam ɦal ŋgus mayra ɗegeera maŋ suu laki hu dlamba mullana. Ҥal saɓakŋa maŋ suu ka juɓ vun zina a doo suu yara ha kina may.

Suu gurɗi u suumana pan sa ma jok vun Lona

⁷ Muli suu li ɓivunna u suu jok vun Lona viɗ ki u sum ma cira ni na lay. Asi daw kolo ni ka wi li ma asi tuɗ hunaɗi. Sum ma cira viɗisi ki wa, asi mbuɗ ki ni mborɓi summana. Wiisira ha fokka viɗ ki irisi lay. Hu li ma asi a di dlara ni ka di jivi oloɗi daɓ sesi wa.

⁸ Yam tabul masira halaŋ ki taɓagi u vinda. Liisi ma ki mini jivi na wan ka oloɗi lay.

⁹ Asi ɓak tasi ana, «Sa ma min a haɗta ni gege? Sa ma hin gin u haɗ ndaɗta ni gege? Ni maŋ kemba fun ponara su? Ni maŋ kemba noy pona wilira ɗaŋ su?»

¹⁰ Asi gijaŋ di ana, Boyna kay boyna, boyna kay boyna, gaɗta kay gaɗta, gaɗta kay gaɗta, tani nde may, ha tana nde may.

¹¹ Na daŋ may ni u boy ma giniŋŋa, u vun ma daŋŋa, Bu Suuna hin ɓak suu asina.

¹² Nammi sa ma dasi ana, «Gola ni koɗ tara ɗaŋ, hin sa ma ki loɓina koɗ tamu, musukka cuk ga wa.» Na may asi ka min a humbi.

¹³ Olo ni boy ma vi Yawena hin li masi may su? Ko di ana boyna kay boyna, boyna kay boyna, gaɗta kay gaɗta, gaɗta kay gaɗta, tani nde may, ha tana nde may. Hu li ma asi a tuɗta ni asi puk gaa. Asi mun u furusi lay, suuna hin yowosiya vasi balna.

Ҥini ma gi u zina kamma

¹⁴ Kay ndaɗta agi suu mbaɗ suuna suu ka ti mulla kay Yerusalemma, humugi boy ma vi Yawena haa.

¹⁵ Agi di ana, ami vi galamba ki u miɗna wa, ami ŋgaa vunumi ki u lina vi suu miɗina wa, tuguɗiira cora ndi kay suuna lay ni ka famiɗi kay ana kaboy mamina ka ŋgayamiya, dla coomira ka njun kamiya.

¹⁶ Na may Bu Suuna Yawe di ana, gola an gi ɦini ma tuk suuna belna ka hu Siyon. Ni ɦini ma gi u zina kamma, ɦini ma jivi ɦayna. Sa ma tin hurum kamma ka mbuɗ zoloɗi.

¹⁷ An tli ɗegera ni a zew ma ɗegee goŋga, gasira ni a gu ma gol ɗegee goŋga may. Dlaŋmagina hin ɓeŋ li ma ŋgay ma vi suu kaboyna kiyo, mbo ɓatna hin tuɗ u ziigina.

¹⁸ Galam magira u miɗnara ki ni ɦawaa, vunugi ma ŋgaram u lina vi suu miɗinana ki ni ɦawa lay. Tuguɗira cora col ay wa ni ndaɗ hin cagi kiyo.

¹⁹ Hu li ma ndaɗ mbana halaŋŋi hin vagiya. Kay ana ndaɗ hin tin koɗ ki kagi hu buuna tew tew, faali lay, njeŋge lay. Hin li ni ndaa ma cocona ma a tak dlara ŋgayra kina.

²⁰ Hin li ni ko ndal boyna dira na, lay ma buuna mbuɗ geɗeŋe ka ndak a buunaɗi, ladarana mbuɗ geɗeŋe ka ndak a boɗ kay saɗi lay.

Nera kay suu pan suuna

²¹ Na daŋ may Yawe hin col kolo ko nam li ay kay ɦinira Perasimba na, nam hin mbuɗ yara ko ay hu mbassa Gabaonda na, hu li ma nam a daɓ sun mamba kina, sun mamba dlaɗ mbuɗ mbuɗ cocora.

²² Cemi ni agi lagi dlara pan suuna oloɗi, kay ana u zew magina tereɗ eŋ suɗi. Kay an hum ay fun Bu Suuna Yawe, ma Saɓakŋa Kom Belna, ana, dla mayra a ɓalak duliyara ki halaŋga di ki wa.

Yal ma vi Lonana

²³ Tinigi humugiya, humungi haa, lakagi na en humungi boy manna.

²⁴ Na ni sa ma horokŋa zaa tlena ha ga ni hu lina na halaŋ su? Nam zum lina ha ni hu buuna na tew tew su?

²⁵ Jivira ni nam min huu senena ki jewe, zum lina kiyo, hin gijaŋ a zaa ii tlena, wa blena, zoyra, litna, kusira u dagalawna ni na tuɗi su?

²⁶ Halaŋ ca ni Loomma haɗam yal dla ndaɗta ni namu.

To wana ka gulukum ki gawɗi

²⁷ A tok wana ni aŋ ka gulukum irim kiɗi. Ka hin pus pus ma mbutlina tuɗ kolo hu maɗakŋaɗi, na may to wana ni u tokolora, lammi u tlesuu feɗna.

²⁸ Sana ndak a guluk ii wana ki su? Ҥawaa, nam ka toom ha na gak gakgi. Nam ka hin pus pusna a tuɗ kolo kay wana a toom kiɗi.

²⁹ Dla ndaɗta col ay ko Yawe, ma Saɓakŋa Kom Belna, ni na may. Nam ka tak dlara mbuɗ mbuɗta, tak yal ma li tlena may.