EZAYI 27 - Boy Lonana

¹ Hu buu namma ni Yawe hin warak suuna u ŋgew mam ma eŋ ma ŋgol ma saɓak cocona. Nam kaɓakŋa kay Leviyatan guy ma cona, kay Leviyatan guy ma las suuna, nam hin ci dragoŋ ma duk mbo lum ŋgolna kiyo.

Yawe u gugutlu mamma

² Hu buu namma ni gagi soolla geleɗ gugutlu ma li sum ma jivina.

³ An, Yawe, ni sa ma juɓum umma, an lam mbona um tew tew lay, ka hinim a suuna ɓalakam kiɗi. Njeŋge lay, faali lay, an golomu.

⁴ Hurun ka u ya oloɗi, lini an fi gi wayara ugi meera fokon lay ni an tuɗ ha kolo kasiya. An hin ŋgalasi ki ko tasi halaŋ.

⁵ May ni sa ma ŋgay tam egenna, ma hal heɓpa u anna, nam ndak kak u heɓpa u anu.

Ҥal vaɗ huuna maŋ suu Israelna

⁶ Hu basara ha fokka suu Yakobma sariyasi hin kal kaŋgaa, Israel mbuɗ ɓo na mbuguk mbuguk asi hin vuɗa, vuɗusi hin oy ki hu duliyara halaŋ halaŋ.

⁷ Lona casi ka coco ko nam ci suu lasasina na layɗi su? Nam cimisi ki cira coco ko nam cim suu cimisina na layɗi su?

⁸ Bu Suuna ɓalakasi dlaasira asi min a laɗta ki ɓalakŋi digisi kiyo. Nam daɓasi ki u babaa ma ŋgol ma col ay u maɗiinana.

⁹ Cora vi goryoŋ Yakobma hin bulum ki ni ko ndaɗta na may. Ni vuɗ dlara hin tak ki ana coosira bulum kiwara. Asi hin to ɦini mayra asi njaraɗ a givin ma togolla kiyo, to li ma ŋgal mbul ma hisna ki lay. Sa ka wi tle asina u irim oloɗi.

¹⁰ Sa ka kak hu ɦoŋzi ma saɓak namma oloɗi, li namma mbuɗ ki ni ko ŋgoo bagira na. Hin taa gor mbutlina ki ni huwa, asi hin buu ki huwa, ti ko ŋgusugina ki lay.

¹¹ Hu li gorgor ko guna so ki wa ni asi hin kusum kiyo. Boyogina hin ŋgalam kiyo. Na daŋ may suu asina ka wi dlara asi laɗtaɗi. Kay ndaɗta sa ma li dla ndaɗta ka wasi hahawasiɗi may. Sa ma lasina ka wasi hahawasiɗi.

Suu ay ki ŋgayrana hoŋ ay vowa

¹² Hu buu namma ni Yawe tok yam suu mamsina ko suuna a feɗ wana vora na, col ay fun lum ma Eufratna ta ta tew ki fun lum ma Egiptena, hin cagi ɦeleegi ay ki na dew dew halaŋ, agi suu Israelna.

¹³ Hu buu namma ni tokolom ma ŋgolna hin buwa. Suu may suu ay ki viɗi hu mbassa Asirira hin mbay kiyo u suu may suu ɗikisi ay ki hu mbassa Egiptera lay. Asi hin mba goɓ ga fok Yawe, kay ɦini mayra teteɗta hu Yerusalem.