EZAYI 26 - Boy Lonana

Soolla vi ɦoŋzi ma suɗ kina

¹ Hu buu namma ni asi hin gi sool ndaɗta hu mbassa Yudara. Ami ka u ɦoŋzi ma saɓak cocona. Bu Suuna ka gol gulumun ma gi kay zi nammana.

² Mal vun gulumuna kiyo, suu ɗegeena sel voo, ni suu may suu gol tasi ay jivina.

³ Asi ka laki saɓaki, kay asi tin hurusi kaŋu, kay asi hin tasi ni hu duk koŋu asi ka laki u heɓpa.

⁴ Tinigi hurugi kay Yawe a fafaɗta, kay Yawe ɦini ma din dinna.

⁵ Kay nam dik suu ay laki kolo dayna kiyo, zi ma saɓak cocona nam toom ki lay, bulumum ki halaŋ.

⁶ Zi namma suu maŋina tayam ki kaŋga u sesiya, suu hoŋ yasi gana hin tuɗ ki huwa.

Cenda daɓ daganda

⁷ Voɗta vi suu ɗegeena tuɗ ni na ɗegee, aŋ ka minisi voɗ ndaɗta ki fokosiya.

⁸ Ҥii, Yawe, ami tin saa mamira ni kaŋ dew. Ami tuɗ ni hu voɗ maŋga na dew. Ami yaŋu, ceneŋu, hurumi minni dlaaŋga na dew.

⁹ Duk njeŋgera lay an pereɗ iiri manda ha ni egeŋu, ŋgus manda hurun kurufura halaŋŋi aŋu. Hu li ma ɓak maŋŋa ka ka hu duliyara, suu kay ndaŋgarana halaŋ ka haɗaŋ ɗegee maŋga.

¹⁰ Lini wi hahaw suu cona lay ni, asi ka wi ɗegeeraɗi, asi ɓeŋ dlara ɗegee kay ndaŋgarara ki ni ɓeŋi na ɗow ɗow. Asi ka waŋ ŋgol maŋgaɗi lay, Yawe.

¹¹ Cemi Yawe koŋ ka tli koloo asi ka wambi lay. Na may asi wi huruŋ ma haɗ kay suu maŋsinana asi mbuɗ ki zolona. Kura aŋ miniɗ kay suu babali maŋsinara ŋgalasi ki wa.

¹² Yawe, aŋ ɦami heɓpa, dlara ami laɗta aŋ lamira ki komi halaŋŋi aŋu.

¹³ Yawe, Loomina, muli suu daŋŋa ti mulla kamiya, na may ami yaŋŋi seŋ aŋ na dew.

¹⁴ Kaymege suu miɗina ka hoŋ iiri oloɗi, asi ka ndak a yow kolo oloɗi, aŋ kal duk dlara ni a daɓasi kira, aŋ bulumusi sesi ki hu duliyara halaŋ.

¹⁵ Yawe, aŋ wul njaf suu maŋsina. Aŋ wul njaf suuna wa. Aŋ tak bibiŋil maŋga ki wa. Aŋ laami mbas mamira ki ŋgolo, kay ndaɗta seŋ ka tii ki cocoo.

¹⁶ Yawe, hu li ma aŋ ka gaɗ suu maŋsina ni asi halaŋŋi aŋu. Hu li ma gaɗ maŋga fasina asi cuk ga ceneŋŋi aŋu.

¹⁷ Yawe, ami ay fokoŋŋi ko ndal cara wiina tiliɗ ma vuɗta ndakka na, ndaɗ tiira yoo taɗ coco ko ti tara.

¹⁸ Ami ay u wiina, ami ay ni hu ti tara, na may ni ko ami vuɗ ni goo babaana na. Ami ka ndaki a mbaa suɗta kay ndaŋgaraɗi, ka a cuk suu wili hu duliyaraɗi lay.

¹⁹ Suu maŋ suu miɗina hin hoŋ ki iiriya, tliwisi ma miɗina hin paɗ ki kolo iiriya. Asi sawalla furira ana dliɗigi kiyo, agi suu ay ga duk ndaŋgarana, kay mbaɗagi magira ni mbaɗagi kiɗikka. Suu may suu ay hu ndufundana hin wi kiɗikka.

Kaɓakŋa kay ndaŋgara u mbo lumma

²⁰ Agi suu mansina cukugi vo hu ziigiya, dugugi vun zina ha kagi jak. Ŋgayagi tagiya, ta ta hin yara vi Bu Suunara jak ki tuwa.

²¹ Kay Yawe kal ay ki vo hu ziim a sa sugul ci maɗ masina, ni kay suu hu duliyarna halaŋ. Ndaŋgara hin tak busu ma vo ki kaɗna kiyo. Ndaɗ ka baa yam suu casi kina oloɗi lay.