EZAYI 25 - Boy Lonana

Gi deɓ Yawe kay jivi mamba

¹ Yawe, aŋŋi Loonna, an ŋgaaŋu, an gi deɓpa ni maŋ aŋu, kay aŋ li dlara mbuɗ mbuɗta, dla mayra aŋ ŋgaaɗ ay ki jew day dayra ni dlara gasira, ta ka mbuɗɗira.

² Aŋ mbuɗ ɦoŋzi ma ŋgolona ki li ma mol gogoyra, ɦoŋzi ma ŋgolo ɦayna mbuɗ ki li ma ɓalak kina, li saɓak ɦay ma vi suu ka wi Lonaɗina ka hu ɦoŋzina oloɗi. Li namma ka ndak a hoŋ min kolo oloɗi lay.

³ Kay ndaɗta njaf suu saɓak cocona hin ŋgaaŋu. Ҥoŋzi ŋgolo ma las suuna ɦayna mbuɗ laŋ ndaaraŋu.

⁴ Kay aŋŋi mbari ma vi suu maŋinana mbari ma vi suu hawra suu ka hu yoorana. Aŋŋi li ma ŋgay ko babaana, ni ŋgus ma koɗ tara, kay ana boy ma vi suu las suuna ni ko babaa ma bow gulumuna ki gana na.

⁵ Ko ndal faɗta ŋgal hu li ma lokka na, aŋ doo lassa vi suu ka wi Lonaɗina ki wa, ko ndal ɗugulla kuluɓ faɗta tira kira na, aŋ doo tokolom ma vi suunana ki wa.

Lona tin luu ma ŋgolna kay suuna bel

⁶ Yawe, ma Saɓakŋa Kom Belna, hin tin luuna kay ɦini ndaɗta maŋ suuna halaŋ. Ni luu ma ti tliw ma mbulna u sum veŋ ma basina. Tliw ma mbulna ma yulumma u sum veŋ ma jivina.

⁷ Kay yam ɦini ndaɗta ni nam hin yow baraw ma kuluɓ ii suuna kina ki halaŋ, wihaw mayra ka kuluɓi ki ii suu hahawra halaŋ hin paɗaɗ kiyo.

⁸ Nam hin doo miɗna ki a fafaɗta. Bu Suuna Yawe hin saɗ simi ma ii suunana kiyo. Hu mbassa halaŋ nam yow zolona ki kay suu mamsina. Yawe u tamba di na ni namu.

⁹ Hu buu namma suuna hin di ana, Nammi Loomina, ami tin hurumi kamu, nam buɗumi ki wa. Yawe ni sa ma ami tin hurumi kamma. Ŋgaaygina, furiyuygiya kay nam suɗuygi ki wa.

Lona kaɓakŋa kay suu Moabma

¹⁰ Ko Yawe ka gol yam ɦinira wandara, na may suu Moabma hin casi ki hu buu namma, ni ko ndal suuna cuk usuna hu zulla a cimimba na.

¹¹ Suuna hin maɗ kosi ki ko ndal suuna maɗ kosi ki a lus duk mbonara na, suu ŋga tasina yasi hin hoŋ gaa u sun masira asi ka laɗ u suunara lay.

¹² Gulumun ma vi suu Moabma hin to ki gaa, Bu Suuna hin toom kiyo, tinim ki ni kay umba ay ki ga duk ndaŋgarara mbee.