EZAYI 24 - Boy Lonana

Lona kaɓakŋa kay duliyara

¹ Gola Yawe kaɓakŋa kay duliyara wa. Nam ɓalak tlesuu kaɗna kiyo. Nam njay suu cuki huruɗna ki may,

² muli suu li ɓivunna ni ko suu belna na lay. Malaŋ zina ni ko saam ma sunda na lay, cara ni ko gora sunuɗta na lay, sa ma gus tlena kina ni ko sa ma mba gus komma na lay, sa ma ɦal tlena kina ni ko sa ma mba ka vana komma na lay, malaŋ vana ni ko sa ma bal mamma kamma na lay.

³ Ndaŋgara hin ɓeŋ ki ni u dlaɗta bella, tlesuu kaɗna hin ɦurum ki ni na halaŋ halaŋ. Ni ko Yawe u tamba dira na.

⁴ Ndaŋgara ka yoo taɗu, ndaɗ ka so kiyo, duliyara ka daɓ kiyo, huulona ka daɓ ki ko tam u ndaŋgara dew.

⁵ Ndaŋgara mbuɗ ki njenjera ni ko sem suu ka tuɗ kaɗna kay asi ŋgel gaɗta, asi mbuɗ gaɗta ɦasirara ki zeɗ, asi bus galam mayra din din u Lonara kiyo.

⁶ Ni kay ndaɗta givunna mba kay ndaŋgara ni na. Suu cuki kaɗna halaŋ fi lassa. Kay ndaɗta suu cuki kay ndaŋgarana ka kom tasi kiyo. Suuna hin hu ndaŋgara ni na ew daŋ.

Ҥoŋzina ɓeŋ ki wa sum ka oloɗi

⁷ Sum ma wilina ni hu hahawra, gu gugutluna ka oloɗi. Suu may suu min luuna u ci summa halaŋ ka oya.

⁸ Del dari ma jivi ma furira ka hum oloɗi, del diŋ ma furira ka oloɗi lay. Vun ma vi suuna ma soo ɦoŋzina a furira ŋguk ŋgukŋa seŋ wa.

⁹ Sa ka ci sum veŋ u koɗom oloɗi, suu ci sum ma ya cocona, nam mbuɗ ki funusi galaari.

¹⁰ Ҥoŋzi ma ŋgoo bagina ɓeŋ ki wa, vun ziginina halaŋ dugiya, sa ka kal hurusi oloɗi.

¹¹ Suuna tuɗ hu voɗta ni ka yoo tasi kay summa, furira halaŋ ka oloɗi, kay yam mbassa halaŋŋi sa ma furi kaɗi.

¹² Va maa hin ka hu ɦoŋzina oloɗi, vun goŋina halaŋ ki kusiya.

¹³ Hu mbassa halaŋ, duk suuna lay va hin ka ŋgol oloɗi, ni ko ndal vuɗ gugutluna maa hu li ma asi a duɗumma ɦawa na. Ɗowba ko ndal vuɗ cono ma maa ko suuna hu li ma asi duɗum kina na.

Furira liiɗ hin fokka

¹⁴ Suu wanna yow kolo furira. Asi ka geleɗ ŋgolla vi Yawe. Keŋ mbo lum ma ŋgolna asi ka ŋgaamu.

¹⁵ Ay u maɗiina na ni asi ka ŋga Yawe, ŋga sem Yawe Lo ma vi suu Israelna, duk daara hu lum ŋgolna.

¹⁶ Ha hu vun ndaŋgara dodora lay, ami ka hum soolla gira, «Ŋga suu may suu ɗegeena.» An hin ɓak tan ana, tuk ndaɗta kanni ana mege? Tuk ndaɗta ni ana mege? Hahawra fan wa. Suu maliyaŋ zina di ŋgeŋa, suu tlasi cona di ŋgeŋŋa.

Duu ma daɓ daganna

¹⁷ Agi suu kay ndaŋgarana halaŋ, ndaana, zulla, bayna ka guni fokogiya.

¹⁸ Sa ma pii ki ko walla suuna saaɗ ko ndaanana hin ndi hu zulla, sa ma taɓa ay ki hu zullana bayna hin vam may. Vun mbo ma ay kolona mal ki may. U ndaŋgara ŋgari gara geŋeɗ may.

¹⁹ Ndaŋgara to kiyo, ndaɗ hin njay ki kolo na dew dew.

²⁰ Ndaŋgara mbuɗ geŋeɗ ko ndal suu guruɗi u summa tuɗta na. Ndaɗ mbuɗ yak ki ko hum tlena na. Suluk maɗna mbuɗ kaɗ nekka. Ndaɗ ndi gaa, ka ndak a col kolo oloɗi.

²¹ Hu buu namma ni Yawe kaɓakŋa kay suu duu suu kolo huulonna u suu muli suu hu duliyarna halaŋ.

²² Nam hin tokosi halaŋ, njunusi, cukusi hu zulla, hin dukusi ga hu zulla daŋgayna, buuna ŋgolo ŋgoo dagan humum hin gam kasi tuwa.

²³ Tilna hin maŋ kiyo, faɗta hin mbuɗ ki ndufunda. Na daŋ may Yawe ma Saɓakŋa Kom Belna ni mul ŋgolna. Ay kay ɦinira Siyonda hu Yerusalem hu bibiŋil mamba fok suu ŋgolona halaŋ.