EZAYI 23 - Boy Lonana

Di dlara kay suu Tir u Sidonna

¹ Gola ni boy ma dam kay zi ma Tirna. Agi suu tuɗ hu lumma u lum kawinana tiirigiya. Tlegeyegi ɓalak ki wa kay zi ma agi cuki huna to kiwa u suu hurumma halaŋ miɗ ki wa. Agi suu mbay huna suu Siprena humugi boy namma ha kiyo.

² Agi suu may suu cuki doŋ lummana lakagi ni na en dagi vaɗi, suu Sidonna suu paa suu ka calaɗ mbo lum ma ŋgolna di vaɗi lay.

³ Asi taɓa lumma u tlesuu asi horokosi ay fun lumma Nil u feɗta Nilla mbaarasi ki hu Sidon. Asi fi mbo tlena ko njaf suuna halaŋ.

⁴ Aŋ zi ma eŋ ma Sidonna mbuɗ zolona wa kay lumma tuɗ u tlegeyeŋ wa. Lum ŋgolna hin di ana, «An li sun ay kaɗi, an vuɗ kaɗi lay. An wul go njuf kaɗi lay, wul go tama kaɗi lay.»

⁵ Hu li ma suu Egiptena hum dlara li ay hu Tirra na ni asi mbuɗ ki ndaa cocoo.

⁶ Tuɗugi ta ta hu Tarsis, tiirigiya agi suu cuki fun lummana.

⁷ Ni ɦoŋzi magi ma jivi ma somoyogi suu ay jewna kaam ay dayna, ma agi furi kam ɦayna su? Agi sun suu daŋŋa hu mbassa dayra lay.

⁸ Sa ma gaɗ dla ndaɗta eg suu Tirna na ni gege? Suu paa suu hu zi nammana ɦiz ki cocoo, suu gususi tlegeyesina asi ŋgaasi coco lay, asi ni suu ŋgolo suu kay ndaŋgarana.

⁹ Yawe, ma Saɓakŋa Kom Belna, gaɗ dla ndaɗta ni namu, kay a maŋ ŋga tara vi suu ŋga tasina kiyo, kay a maŋ suu ŋgolo suu kay ndaŋgarana ki halaŋ.

¹⁰ Agi suu Tarsisna horokogi sene magi ma doŋ lummana, vun voo ma suuna cuk tlena huna ka oloɗi.

¹¹ Yawe maɗ kom ki kay mbo lumma wa, cemmi nam mbuɗ mulla halaŋ dlak ndaana, nam di mbassa Kanaanda ana ndaɗ fi ziiɗ ma eŋ ma duuna oloɗi.

¹² Nam di ana, Aŋ ka ndak a li furira oloɗi, aŋŋi ko go tamara sana ɓalakaɗ kira na. Col koloo tuɗ hu Sipre, ha hu lay ni aŋ ka fi koɗ taraɗi.

¹³ Gol mbassa Kaldera gige, sa ka hu dew oloɗi, suu Asirina hin mbas ndaɗta ki ni a taa yoorina. Asi min zi fiyek ma juɓ suuna ki huwa. Zigini masi suu ŋgolona asi toosi ki halaŋ halaŋ. Liisina hin ki ni a li ma ki ɓalakina.

¹⁴ Agi suu Tarsis suu u lum kawina kogina, tiirigiya, kay ana ziigi ma eŋ ma duuna ka oloɗi.

¹⁵ Hu buu namma ni suuna hin maa dla Tir ki ta ta basara dok-kiɗisiya, ni basara vi mul ma dew ma ti mullana. Ŋgoo dagan basara dok-kiɗisiyara daɓ wa ni, hin li ni ko ndal soolla vi cara gawlaŋ taa dew gira na.

¹⁶ Tli diŋŋa, ŋguy ɦoŋzina ki halaŋ, gawlaŋga asi maarak dlak ki wa, gi soolla luu luu mak ma jewna kay a hum suuna gasi kagu.

¹⁷ Basara dok-kiɗisiyara daɓ wa ni Yawe hin njun u suu Tirna ni u tamba, asi hin hoŋ hu fiisi ma jewna, asi hin li gawlaŋŋa u mbassa ŋguyusira halaŋ.

¹⁸ Na may warak masina u fiisina halaŋ hin hinni maŋ Yawe. Nam ka hin njuni kolo moli ɦawaɗi. Warak masina u fiisina ni a ɦal tina maŋ suu ka cuki fok Yawena u baraw ma dereŋ ma cuk tasina.