EZAYI 22 - Boy Lonana

Dlara kay suu Yerusalemma

¹ Gola ni dlara ŋgayra waɗ kay ɦuɗugumba Yerusalemba. Suu maŋsina ɗiŋ ki kolo kay yam ziginina na halaŋ halaŋŋi amege?

² Ҥoŋzi ma jivina, vun ma dam damma oy hurum cocoo. Suu maŋ suu miɗina casi ka u ŋgewɗi, asi miɗ ka ni vun duuɗi lay.

³ Suu ŋgolo suu fok suu asgaa maŋsina halaŋ yow pii wa, suu daŋŋa asi vasi ni bay asi mun mbuurura dewra lay. Suu asi hin fasina halaŋŋi cukusi daŋgayna. Asi pii ki ni tuɗ ha ki ni na day.

⁴ Cemi ni an di ana ɦuɗugi ha ki egen na day, hinin an tii cocoo, loɓogi tagi a seŋendaɗi, an tii ni kay ɓalakka vi goora vi suu mansinara.

⁵ Kay cemmi ni Bu Suuna Yawe, ma Saɓakŋa Kom Belna, tinigi ni hu buu ma yoora, ma ndaana cocona, ma viɗ dlara ki ii suunana, hu ɦuɗugumba Yerusalemba, gulumunna bow ki wa, tiina tum ay kolo kay ɦinira cocoo.

⁶ Suu Elamma mbay u kul mbuuru masira kosi oy hu ziiɗu, fuli hu pus pus ma kulumina, suu hu mbasa Kirna cuk mbari masi ma duuna ay ki kiɗik may.

⁷ Mbassa jivira Yudara halaŋ oy ki u kulumi suu taɗ pus pusna, suu ha fuli hurusina col ki fun zina dew dew halaŋ.

⁸ Suu hu Yudana sa ma njun kasi ka oloɗi, asi peret irisi ni u kawi ma ha cuki ŋgoo hu zi mayra cuk kawi ma duuna hura.

⁹ Agi wi ki ana gulumun ma ŋguy kay zi ma vi njaf suu vi Davidna kawi ma vam eŋŋa duk cocoo. Agi ɗok yona kaŋga hu li ma vi mbona kaŋga hu ma gorina may.

¹⁰ Agi ndum zigini suu Yerusalemma ki dew dew halaŋ lay, agi to zigini suu daŋŋa ki a hin lina ki a ŋguy gulumunna ki kay ɦoŋzinara lay.

¹¹ Agi vek zulla vo mbona duk ɦoŋ gulumuna jak a taa yona hura. Na may agi saa ka kay Bu Suuna, ma ka li tle asinanaɗi. Agi wi sa ma ka li sunda tew tew namma kaɗi.

¹² Hu buu namma Bu Suuna Yawe, ma Saɓakŋa Kom Belna, yagi ana agi tiira, yoo tagiya. Kaa yagi kiyo, njun baraw ma doona hurugiya.

¹³ Agi may ni hin lini furira, agi ŋgaɗ yorina koma, ci summa, komogi tliwna tagiya cagi lay. Agi hin di ana, «Taygiya caygiya, kay vinni aygi hin miɗ kiyo».

¹⁴ Yawe, ma Saɓakŋa Kom Belna, takan dla ndaɗta ka ana, Suluk magi namma ka bulum kiɗi, agi hin miɗni hu dla coogi ndaɗta. Yawe, ma Saɓakŋa Kom Belna, suu tam ki na.

Eliyakim hin tli li ma vi Sebmana kiyo

¹⁵ Bu Suuna Yawe, ma Saɓakŋa Kom Belna, di ana, Tuɗ eg sa ŋgol ma hu zina vi mulnana Sebma.

¹⁶ Vaaŋ ma kon tanina ni mege? Zuluŋ tani ni ana mege, vekeŋ zuluŋ kolo kay li mbuyna, miniŋ li ma buuna ni duk zul ɦinira ni kay mege?

¹⁷ Yawe hin caŋ ci garaŋga na dew. Aŋ ŋgol lay nam ka waŋ ŋgol maŋgaɗi.

¹⁸ Hin ɗakaŋ ko suuna a ɗak guna na, lagaɗaŋ ko suuna a ci ballara na. Aŋ hin miɗ ni ko ndaɗta na u pupus maŋ ma jivi cocona, aŋ hin mbuɗ zolona taraŋ vi sa ŋgol maŋŋa.

¹⁹ An hin dikiŋ ki hu sun maŋga, dikiŋ ki hu li ma aŋ buu hu wanna lay.

²⁰ Hu buu namma an hin yi saan ma sununna. Ni Eliyakim ma goŋ Hilkiyahna.

²¹ An hin cukuŋ baraw maŋŋa ki tamu. An hin njunuŋ ganɗi maŋŋa ki hurum may, hin ɦaŋ ŋgol maŋga kini kom halaŋ, nam hin mbuɗ ni a Bu Suu Yerusalemma u suu Yudana lay.

²² An hin gaɓam vun goŋga vi zi ma vi Davidna ni kelemu. Nam mal wa ni sa ma ndak a duguɗ kaɗi, nam duguɗ wa ni sa ma ndak a malaɗ ki kaɗi may.

²³ An ŋgarammi ko ndal ponti ma ɓali hu li ma eŋ cocona na. Nam hin hu ziŋ bumma ni ko dlam mayra mulla bibiŋilla na.

²⁴ Suu vo taraŋ vi bumma halaŋ hin ɦam ŋgolla ni nam dew. Su ŋgolona u suu gorina halaŋ col ha kay gugunina ta ta doyogina lay ni um ga halaŋ halaŋ.

²⁵ Yawe, ma Saɓakŋa Kom Belna, di ana, Hu buu namma ni ponti ma ɓali hu li ma eŋ namma hin paɗ kiyo, nekka ay tli kamba halaŋ hin ɓalak kiyo. Yawe, ma saɓakŋa kom belna, di na.