EZAYI 21 - Boy Lonana

Babilon ndi gawa

¹ Gola ni dlara di ki kay ŋgoo bagi vun lum ma ŋgolna. Ko babaa ma col ay mbayawna na, ni na may mba hu fulla. Col ay i hu mbassa suuna laɗ ndaaraɗ cocora.

² Dla mayra mbuɗ mbuɗ coco ɦayra takanda ni ndaɗu. Suu di ŋgeŋŋa dam may, suu ɓalak tlena ɓalakasi may. «Suu Elamma yowogi koloo. Agi suu Medena mbaagi aya. An Bu Suuna min daɓ zi ma Babilonna kiyo.»

³ Dlara an waɗta ura an humuɗta lan tan ndaa cocoo. Dla ndaɗta tan tan ko ndal cara ndak ki a vuɗtara na. An cemi vun digin ɓigin cocoo kay an hum boy nammara, ndaana lan coco lay.

⁴ U dlara viɗ ki irin na halaŋ an dlak coco ko ndaana. Semeɗ ma sii jivi fiɗigi ma an minim ɦayna mbuɗ ki egenni va ma lan ndaana.

⁵ Suuna kak kay tabulla, asgaana ka juɓ ura may, suuna ka tiya, ci may. Aŋ sa ma ŋgol asgaana col ki koloo, purus mbona maŋ mbari maŋŋa.

⁶ Kay Bu Suuna dan ay ko ndaɗta na, «Tuɗa, col jekjekee, dlara aŋ waɗta aŋ daɗ ay kiyo.

⁷ Lini aŋ wi ni kulumi suu taɗ pus pusna mba ɗowba sana fuli kay korra, ɗowba kay jamballa ni nam li tam jiviya, gol tam jiviya.»

⁸ Sa ma ka juɓ u lina sawalla kolo ana, «Malanna, an ka juɓ u lina hu buuna tew tew faali lay, njeŋge lay.

⁹ Gola ni dlara ka mbayra, sana dew ay fuli hu pus pus ma kulumina. Nam ka njaɗ boyna di ana, nam ndi ki ga wa, nam ndi ki ga wa, Babilon ndi ga wa. Tlegeyesi suu asi goɓosi ko lona nana halaŋ cuk ki ga wa, to ki lay.»

¹⁰ Agi suu mansina, suu toogi ay ki ko suuna to wana hu maɗakŋa nana, dlara an humuɗ ay fun Yawe, ma Saɓakŋa Kom Belna, Lo ma vi suu Israelnana an dagira ha ni ndaɗu.

Dlara kay mbassa Edomba

¹¹ Gola ni dlara daɗ kay Dumara, asi yan ay kolo kay ɦinira Seirra, «Sa ma juɓ u lina, njeŋgera hin li ni ana mege? Sa ma juɓpa, njeŋgera hin li ni ana mege?»

¹² Sa ma juɓ u lina hoŋ dira ana, «Maɗiira foo, njeŋgera hoŋ ay olo, lini joɓpa daŋ ka kogi olo ni joɓogi aya.»

Dlara kay mbassa Arabira

¹³ Gola ni dlara njaɗ kay mbassa Arabira. Agi hin nda buu ki ŋgoo bagi hu mbassa Arabira, agi suu Dedan suu tuɗ u jamballana.

¹⁴ Tuɗugi ŋgafagi vok suu laara casina, tuɗusi yona haa. Agi suu hu mbassa Temara, ɦagi tina maŋ suu ka tuɗ koyrana may.

¹⁵ Kay asi pii ay ki ni ko duuna, asi pii ay ni ko ŋgew ma duuna. Ko mbuuru mayra ka munusira ni ko nek duu ma su kasina.

¹⁶ Bu Suuna hin dan olo ana, hin basara na dew, ni basara vi suu cuk tasi a li sundana. Bibiŋilla vi suu Kedarna ka li oloɗi.

¹⁷ Suu Kedarna mbuuru masira hin kosi na ew ɦawaa. Yawe Lo ma vi suu Israelna, di na ni namu.