EZAYI 19 - Boy Lonana

Lona min kaɓakŋa kay Egipte

¹ Gola ni dlara njaɗ kay Egiptera, Yawe ful ay kolo kay ɗugul mayra ɓaɗ cocora, nam mba hu Egipte, fuli suu Egiptena dlak ndaana kom cocoo. Saɓak ma vi suu Egiptena lammi hurusi kurufuu.

² An hin ɓeŋ huu suu Egiptena ki eg tasiya. Asi gegelay ni hin duu tam u wayamma, gegelay ni u ndaram ma vok zina. Ҥoŋzi ma ŋgolona hin duu duk tamu, mulina duu duk tasi may.

³ Saara vi suu Egiptenara hin jok kiyo, an hin bulumusi dlaasira jivira kiyo. Asi hin joɓ fulina tin garira u suu li dlara joɓpa.

⁴ An hin cuk suu Egiptena ga u mul ma dlam cona, mul ma saɓak cocona hin ti mulla kasiya. Bu Suuna Yawe, ma Saɓakŋa Kom Belna, di na.

⁵ Mbona ka li hu lum ŋgolna oloɗi, lum ma gorina hin so kiyo, sa ka wam oloɗi.

⁶ Mbo ma ɓaɗ ay hu mbassa Egiptera ka ɓaɗ oloɗi, nam hisa, mbo lum ma Nilna hoŋ ki gaa, hin so ki lay. Cerewna u usu ma daŋŋa ka ɗuf oloɗi.

⁷ Ŋgusu ma ɗuf doŋ lummana hin so kiyo, tlesuu li ɗuf doŋ lum ma Nilna halaŋ hin so kiyo, babaana hin siirisi kiyo, va ka hin hu dew oloɗi.

⁸ Suu ciwna hin yoora, suu gi jambatta hu lum ma Nilna halaŋ hin yoo tasiya. Suu gun bayna duk mbona hin ba kiyo.

⁹ Suu may suu cil barawna u motta li sun barawra ka fi sun oloɗi lay. Suu may suu cil baraw ma haɓma mbuɗ ki zolona.

¹⁰ Suu li summa hin mbuɗ ki maŋiya. Suu li sun summa huna hin yoo tasi cocoo.

¹¹ Muli suu hu ɦoŋzi ma Soanna saarasi jok ki cocoo. Suu ŋgolo suu lak eg mulna Faraw a neemma tok tasi lay ni ka ndak a li vaɗi. Agi hin a di Farawni ana mege? «Ana anni goŋ sa ma yalnana ni sa ma haɗina vi mulina na su?»

¹² Suu maŋ suu yal asina ni arage? Asi haɗaŋ dlara li wanda ɗaŋgi su? Dla mayra Yawe, ma Saɓakŋa Kom Belna, min a laɗ eg suu Egiptenara.

¹³ Muli suu hu Soanna viɗ ki wa ka wi dlara asi a laɗta oloɗi. Muli suu Memfisna halaŋ cuki hu dla cora, asi viɗ suu Egiptena ki hu boyna halaŋ.

¹⁴ Yawe gasi ŋgussa gasi irisi tirfinda kasiya, asi viɗ suu Egiptena ki hu dlara asi laɗta halaŋ halaŋ. Ko ndal sa ma gurɗi u summana a bulum ga duk vinimba na.

¹⁵ Sunda jivi ka li hu Egipte na dewɗi, yamba ɗowba njawra lay, manawna u cerewna lay kaɗi.

Egipte hin ŋga Yawe

¹⁶ Hu buu namma ni suu Egiptena mbuɗ ki ni ko boyogina na, dlak ndaana hu li ma asi wi ko Yawe ka geŋeɗna, ma Saɓakŋa Kom Belna hin col kolo duu u asiya.

¹⁷ Mbassa Yudara hin ki ni a mbassa suu Egiptena li ndaana koɗta, saɓagelay hu li ma asi ka saa kaɗna, asi dlak ndaana kay dlara Yawe, ma Saɓakŋa Kom Belna, min a laɗ egesira.

¹⁸ Hu buu namma ni ɦoŋzi ma ŋgolo ma vadl hu mbassa Egiptera hin ɓakŋi vun Hebrena, asi hin suu tasi ki vi banara u Yawe, ma Saɓakŋa Kom Belna, zi ma duk zi ŋgolo ma vadl namma yam ana Ir Haheres, ɦoŋzi ma ɓalak kina.

Yawe hin mbuɗ Egipte ki jiviya

¹⁹ Hu buu namma ni givin ma togolla maŋ Yawena hin li hu mbassa Egiptera. Asi hin min ɦinira ŋga Yawera ii hakara u mbassa Egiptera.

²⁰ Hin li ni a dlara tak ki kay Yawe, ma saɓakŋa kom belna, hu mbassa Egiptera halaŋ. Lini asi yi Yawe kolo kay suu ka lasasina ni, nam hin sunusi sa ma suɗusi ma njun kasina aya.

²¹ Yawe hin tak tam ki ii suu Egiptena, suu Egiptena hin wi Yawe ki hu buu namma may. Asi hin sunum u ɓivun ma ŋgaɗ tlena u ɦalla ɦal tlenara lay. Asi suu tasi kay dlara fok Yawe, hin li dla ndaɗta ki lay.

²² Lini Yawe ci suu Egiptena lay ni nam hin garaɗasi kiyo, asi hin hoŋ irisi ay eg Yawe, nam hin humusiya, garaɗasi ki lay.

²³ Hu buu namma ni voɗta col ha hu mbassa Egiptera day tuɗ ta ta Asiri. Suu Asirina hin mba hu Egipte, suu Egiptena hin tuɗ Asiri may. Suu Egiptena u suu Asirina taɓ dew ŋga Bu Suuna.

²⁴ Hu buu namma ni suu Israelna hin mbuɗ egesi a hindira, ni ana Egipte u Asiri. Mbassa hindi ndaɗta halaŋ hin fi paɗvunna.

²⁵ Asi hin yi sem Yawe, ma Saɓakŋa Kom Belna, ana, «Gi deɓ Egipte suu mansina, Asiri ni sunda an laɗ u bik konda, Israel ni suu mansina.»