EZAYI 18 - Boy Lonana

Lona min kaɓakŋa kay mbassa Etiyopira

¹ Hahawra ka kay mbas mayra lum kawina koɗta, suu cuki doŋ lum ma hu mbas Etiyopina.

² Asi sun vun sunda masisina hu lum kawi ma jaŋ duk mbo lum ma Nilna ni lum kawi ma asi cilim u usuna. Tuɗugiya agi suu vun sunda, tuɗugi vi suu may suu wuli fiyeki cocona, suu tasi weleɗ wilik wilikŋa, ni suu may suu suuna halaŋ lasi ndaarasina, suu may suu saɓak coco asina, ɓorowosi mbas masira ki kogiya.

³ Agi suuna halaŋ suu zuli kay ndaŋgarana, hu li ma suu duuna njaa ay kay ɦinira kolo tana wa ni, agi gologiya. Hu li ma tokolomma buwa ni agi humugiya.

⁴ Kay Yawe dan ana, An kakŋi na en, an gol ay ni hu liin ma an kaki huna na wana, ni ko ndal zamalla li hu li ma faɗta faalina na, ko ndal ɗugulla li kolo faali hu li ma suuna a feɗ wanara na.

⁵ Hu li ma til ma feɗ tlena vona ndak wa, ni hu li ma gugutlura ka ɓo oloɗi, ɓora mbuɗ ki vuɗta, ne ki lay, asi ŋgaɗaɗ ki voo, suu babilina hin ci suu Etiyopina ki ni ko ŋgewina ŋgaɗ vuɗ gugutlunara na may.

⁶ Li namma halaŋ hin ki ni maŋ kokolora lak kolo kay ɦinira, tle bagina hin ci ndolla ni huwa. Kokolora hu til faɗta, tle bagina hu til semeɗna may.

⁷ Hu buu namma ni suuna hin ɦal tlena maŋ Yawe, ma Saɓakŋa Kom Belna. Suu may suu wuli fiyeki cocona u suu tasi weleɗ ɦayna, ni suu may suu suuna hu duliyara halaŋ ka lasi ndaarasina, njaf suu saɓakaŋa suu ka las ndarayasinana, suu mbo lumma ɓorowosi irisi kina. Asi hin mbaa tle asina ay ni hu li ma Yawe ka kaki huna, ni kay yam ɦinira Siyonda.