EZAYI 15 - Boy Lonana

Lona kaɓakŋa kay Moab

¹ Gola ni boy ma ɓak kay zi ma Moabma. Ҥoŋzi ma Ar hu mbassa Moabba to ki ga wa hu njeŋgera wandara. Ҥoŋzi ma Kir hu mbassa Moabba to ki ga wa hu njeŋgera wandara.

² Suuna ɗiŋ kolo kay li ma teteɗna hu Dibon, diŋ kolo kay mbura mbuy ta kolo dayra a tiina. Kay ɦinira Nebora u ɦoŋzi Medebana suu Moabma ka yoo tasiya, suuna kaa yasi ki halaŋ halaŋ. Njeɓeresi halaŋ asi cawaɗ ki lay.

³ Suuna tuɗ hu voɗta ɦoŋzina Moab ni cuki tasi ni baraw bolna. Suu kolo kay yam zigininana u suu hu li ma suuna mol huna, suuna halaŋ ka yoo tasiya, asi halaŋ ka tii u simina.

⁴ Suu laki zina hu mbassa Hesebon u Elalena ka sawalla, delesi hum ha ki ta ta hu Yahas. Asgaa suu hu Moabma ka yi koloo, musukusi ka tin gaɗi.

⁵ Hurun ka yo coco kay mbassa Moabba, kay suu cuki huruɗna ka liŋ ta ta tew ha ki Soar u Eglat-Selisiya, asi ka ɗiŋ kolo kay mbura Luhitra ni u tiina. Ha hu voɗta tuɗ Horonaimba ni asi ka sawalla cocoo.

⁶ Mbo ma hu Nimrimma so ki halaŋ halaŋ, suuna kaɗi, usu ŋgolomma so ki lay, ka ɗuf oloɗi, va ma ŋgolom ka dew oloɗi.

⁷ Kay ndaɗta ɓege masira hin kosi vo tura asi tuɗuɗ ha ki ŋgoo lumma Solesna.

⁸ Tiina ŋguf ki kay yam mbassa Moabba halaŋ. Yoora tuɗ ta ta hu mbassa Eglaim, ta ta goloŋga Elim lay.

⁹ Mbo ma Dimonna ki ni busuna halaŋ halaŋ. Lassa daŋga an ndak cukuɗ ha kay suu Dimonna olo, dlona ci u suu suɗ ay ki dew dewna kiyo, u suu hin vo hu mbas ndaɗtana lay.