EZAYI 14 - Boy Lonana

Suu Israelna hoŋ ay voo

¹ Yawe hin wi hahaw Yakob. Nam hin man suu Israelna olo. Nam hin hoŋosi ay hu mbas masira. Suu koyogina hin taɓ ay u asiya, asi hin cuk tasi duk suu vi Yakobma.

² Suu daŋŋa ŋgolo hin vasiya, mba tinisi ki hu mbas masira. Kay yam ndaŋgara vi Yawera suu Israelna hin ɓorowoɗ kosiya, suu may suu asi ay varsi ŋgayrana, asi hin cukusi ki fokosi a mborɓii masisina, asi hin mbuɗ a ŋgolora kay suu lasasi ayna.

Mul ma Babilonna ka oloɗi

³ Agi suu Israelna, hu buu ma Yawe hin ɦagi koɗ tara ŋgoo lassa agi las ay cocora, u sunda mbaɓura agi laɗta.

⁴ Agi hin gi sool ndaɗta kay mul ma Babilonna ana, «Dla ndaɗta li ni ana mege? Mul ma las suuna cocona ka oloɗi. Furi mamba ŋga tam ɦayra hin daɓ ki na zakŋi nanage?»

⁵ Yawe kus tokolora vi suu dlasi cona ki wa, tokolora vi suu ti mulla kay suuna ka oloɗi.

⁶ Sa may ma hurum u yara las suuna cocona, sa ma waɗ suuna kom ka vi kay saɗina, sa ma u yaamba hom yam njaf suuna ki um ga halaŋŋa, digisi usi na gak gak ka hinisi a koɗ tasiɗi lay.

⁷ Cemi ni yam mbassa halaŋ koɗ tasi ɗaŋ. Suuna halaŋ ka gi soolla furira.

⁸ Ŋgusugina lay cemi furi coco kay dlaaŋga. Hu buu ma aŋ ndi ki gana, gu ma yam ana sedrena di ana, «Sa ma kaami ki cocona ka col kolo oloɗi.»

⁹ Lina vi suu miɗina ha ga day ni ka dlak tam a vaŋga, asi ka juɓmi buu ma aŋ kal hana. Suu ŋgolo suu kay yam mbassana halaŋ dliɗ ki koloo, muli suu laki hu dlam masira mulla yow ki kolo u sesi halaŋ halaŋ.

¹⁰ Vunusi halaŋ hin njaɗ ki daŋ ana, «Aŋ mbuɗ ki maŋi ko ami na lay su? Aŋ mbuɗ ki ni fun taŋ u ami na dew su?

¹¹ Bibiŋil maŋga kal hu lina vi suu miɗinawa u diŋ a bu varaŋŋa halaŋ. Aŋ buu ni kay matala njufulna, njufulna ni a baraw ma boɗi kaŋŋa gaw.»

¹² Dla ndaɗta li ni ana mege? Aŋ ay kolo huulona ndi ay ki ga wa, vel ma ɓo lina, Goŋ kiɗikkana, asi hin zuɗuŋ ay ki ga kay ndaŋgara ni nanage? Aŋŋi sa ma hoŋ njaf suuna ki dagannaɗi su?

¹³ Aŋŋi sa ma di ana, «An hin ɗiŋ kolo huulona, an hin tin dlam manda mulla ay kolo kay gi ciciwra vi Lonara. An hin kak ki kolo kay ɦinira vi suu vi Lonna. Ay ii mbayaw mayna do ay dona.

¹⁴ An hin kak ay ki kolo kay ɗugulla. An hin ki ni a ma ay Kolo Dayna.»

¹⁵ Na may cemi aŋ kalni hu lina vi suu miɗina. Kalni ga day hu zul mayra uɗ derewra.

¹⁶ Suu waŋŋa ŋgaras irisi ha kaŋ na ŋgaras asi goloŋ na ni ka waŋ oloɗi, asi ɓak tasi ana, «Ni ka sa ma li geŋeɗ ndaŋgara, las mulina coconaɗi su?

¹⁷ Ni ka sa ma mbuɗ ɦoŋzi ma ŋgolna ki ŋgoo bagiranaɗi su? Ni sa ma vi suuna daŋgayna ka hoŋosi vo oloɗinaɗi su?»

¹⁸ Mulina hu duliyara halaŋ, gegelay ka buuri u bibiŋil mamba. Gegelay ka koɗ tam hu zulumu.

¹⁹ Aŋ may ni asi gikiŋ ha ki na day, zul ka kaŋgi lay, ni ko ndal huu ma ndi ki ndiina ɦawa na. Ha ki duk suu casi kina, suu cokosi u saɓpa, casi u ŋgewina lay, cuk ay ki kay yam ɦini zulla, ɦarasi tay ki sem suuna.

²⁰ Ka ndak a paŋ u asi hu zulla dewraɗi lay. Kay aŋ ɓalak mbas maŋga kiyo, ci suu maŋsina ki lay, njaf suu li dla cora sa ka yasi sesi oloɗi.

²¹ Minigi tagi ci gorra kiyo, kay ci maɗ ma vi somoyosina ni kay a asi hin wul kolo las suu kay ndaŋgarana oloɗi, ka asi hin zul hu ɦoŋzi ma ŋgolona oloɗi lay.

²² An hin col kolo duu u asiya, Yawe, ma Saɓakŋa Kom Belna, di na ni namu suu hu Babilonna halaŋ an casi kiyo, bulumusi sesi ki duk suu warna, gasi njafasi kiyo. Yawe di na.

²³ An hin mbuɗusi ki ni li ma doroɓma, li ma cem cemma buu huna. An hin tok Babilon ki ni u samatna ni samat ma njayasi ki halaŋŋa. Yawe, ma Saɓakŋa Kom Belna, di na.

Lona min to zi ma Asirina kiyo

²⁴ Yawe, ma Saɓakŋa Kom Belna, suu tam ki di ana, «Dlara an saa a laɗta hin mbaa. Dlara an min a laɗta hin li kiyo.

²⁵ An hin to zi ma Asirina ki hu mbas manda. An hin tayam ki ga u ɦini manda. Suu may suu ziirimma jug mamma hin tli ki kelesiya, nek mamba hin tli ki kasiya.»

²⁶ Ni saa manda an hin a kaɓakŋa kay suu hu duliyarna ni na bel. Kon ki maɗi kay suuna ni na halaŋ.

²⁷ Hu li ma Yawe, ma Saɓakŋa Kom Belna, di dlara wani, sa ma hin a dooroɗ kina ni gege? Hu li ma nam maɗ kom ki wa, ni sa ma hin a vam kom kina ni gege?

Agi suu Filistinna furiyugi tuɗi

²⁸ Basara mulna Akaz a miɗ kira ndak wa, asi di ana.

²⁹ Agi suu Filistinna halaŋ furiyugi tuɗi. Di ana tokolora waɗagira kus ki wa naɗi, lini guyra miɗ ki wa ni, makira hin varak ay balamaɗu. Balam makira may ni dragoŋ ma pii piirina hin mbaa.

³⁰ Suu ay las cocona Bu Suuna hin ɦasi tina, suu hawra hin koɗ tasi u heɓpa, na may njafaŋ halaŋ an hin casi ki u mayra u suu maŋ suu hinna hin casi kiyo.

³¹ Vun grekŋa yoo taŋu, Ҥoŋzina sawalla koloo! Zi ma Filistinna halaŋ hin ŋgal kiyo. Kay ndoos ŋgolna hin col ay mbayaw na ni suu duuna, sa ma daŋ ma haɗ ay ki keŋ a suusi kaɗi.

³² Ay hin hoŋ dira maŋ suu may suu Filistinna sunusi ayna ni ana mege? Ay hin dasi ana, «Ko Yawe min Siyon koloo, a suu mam suu maŋina fi koɗ tara huwa.»