EZAYI 13 - Boy Lonana

Dlara kay zi ma Babilonna

¹ Ezayi ma goŋ Amosna di dlara nam waɗ kay zi ma Babilonnara kiyo.

² Kolo kay ɦinira yaɗ ki ɦawara tak dlara ay ki huwa, saagi walla koloo, kisigigi kogiya, kay a suu duuna ɦuɗ tasi ay vun grekŋa vi suu ŋgolona.

³ An u tanda ɦal voɗta maŋ suu man suu li tasi ki teteɗna. U hurun ma ɓeŋ kina an yi suu duuna ay wa, ni suu ka furi a ŋgaanna.

⁴ Humugi della ka yal ay kolo kay ɦinira, ni ko del suu bolowna na. Humugi vunna tum duk suu hu mulla dewra, njaf suuna tok tasiya. Yawe, ma Saɓakŋa Kom Belna, jak wasiya, suu duu mamsina hin duurusiya.

⁵ Asi yow ay ni hu mbassa dayra, ay ni u huulonara dodora. Yawe tak yaamba ki wa, nam hin dik zina ki halaŋ halaŋ.

⁶ Saagi walla, yorogi tagiya, Buu ma vi Yawena hin tok. Ko ndal sa ma ɓalak lina col ay a ɓalakam kira na.

⁷ Kay ndaɗta ko suuna halaŋ hin cuk ga fokomu, gegelay hin wi ni saɓakam ki daɓiya.

⁸ Asi halaŋ ndaana vasi ki cocoo. Asi huruf gaa las coco ko ndaana, asi mbuɗ goɓira ga ko boyogina a li sundara na. Asi gol ii tasi na welek welek ko ndaana. Vogosi mbuɗ ko asi tii tiiri na.

⁹ Gola Buu ma vi Yawena mba ni na, ni buu ma yara ma ka wi hahaw saɗina. U yara ŋgol ndaɗta nam hin ɓalak mbassa ki hoŋoɗ ki dagan cocoo. Suu li dla cora halaŋ nam hin daɓasi kiyo.

¹⁰ Ciciwra huulonara ugi dumussa, ka li kiɗik masira oloɗi. Faɗta day ay ki kolo na ni mbuɗ ki ndufunda, tilna ka li kiɗik mamba oloɗi lay.

¹¹ An hin kaɓakŋa kay duliyara ni kay dla co maɗta, kay suu ka wi Lonɗina ni kay ci maɗ masina. An hin daɓ ŋga tara vi suu ŋga tasina kiyo. Muli suu ŋga tasi cocona hin puk ga fok ndarayasina.

¹² Suu warna ka hin zuli ŋgol oloɗi, lor mayra col ay Ofir ta fi loɓ cocora hin mbuɗ ni zuli su suu warna.

¹³ Hu li namma ni an hin geŋeɗ huulona ki lay, ndaŋgara hin geŋeɗ coco ko ndaa yara vi Yawe, ma Saɓakŋa Kom Belna. Ni buu ma yaamba cora hin tak kina.

¹⁴ Ko ndal dukka sana digiɗ uɗta na, ko ndal yoori suu sa ka taarasiɗina na, gegelay hin tin irimmi duk suu mamsina, gegelay tuɗ ni hu li ma nam ay huna duk suu mamsina, gegelay hin pii ni hu mbas mamba.

¹⁵ Suu duuna suu asi fasina halaŋ hin casi kiyo, sa ma asi vamma hin cam ki u ŋgewna.

¹⁶ Goryosi suu gorina hin casisina ni irisi na gok gok, ɦurumusi ziisi ki lay, buu u boyogosi u saɓakŋa lay.

¹⁷ Lona di ana an hin cuk suu Medesna kay suu Babilonna, asi ni suu ka min dlara gursuraɗina, ka caa yasi kay lorraɗi lay.

¹⁸ Asi ci gorzoŋina ki u mbuuru masira, asi ka saa kay gooɗi, ka wi hahaw gorkembaɗi lay.

¹⁹ Babilon, ɦerew mayra mulla, zi ma suu Kaldena furi hu cocona, mbuɗ ki ni ko ndal zi ma Sodomma u Gomorra na. Lona toom ki ni nam u tamba.

²⁰ Ҥoŋzi namma suuna ka li hu coco oloɗi, ha hu basara gak gakŋi sa ka hin cuk huɗi. Sa ma Arabe lay ka hin a pi mbutluɓ huɗi lay. Suu taa yoorina ka taa hu mbas ndaɗtaɗi lay.

²¹ Tle bagi suu ŋgoo bagina hin buu hu ni asiya. Hikŋa hin oy ki hu ziginina ni namu. Erketta hin cuk ki hu ni ndaɗ may. Fulina hin luu ki hu ni asiya.

²² Goonira hin zul ki hu cocoo. Bayakka hin etl ki hu ziŋ mulnara, li namma hinni na tok gaw, buu namma hin ka nda fok dayɗi.